„შეღავათიანი აგროკრედიტის და სოფლის მეურნეობის პროდუქციის გადამამუშავებელი საწარმოების თანადაფინანსების ფარგლებში გასატარებელი ღონისძიებების შესახებ“ საქართველოს მთავრობის 2014 წლის 27 იანვრის №139 განკარგულებაში ცვლილებები შედის.
სოფლის მეურნეობის სამინისტროს ინფორმაციით ცვლილების შეტანა რამდენიმე გარემოებითაა განპირობებული:
_ ,,სოფლის მეურნეობის პროდუქციის გადამამუშავებელი საწარმოების თანადაფინანსების“ პროექტის ფარგლებში არ ფინანსდება შემნახველი საწარმოების შექმნა.
არსებულ ეტაპზე საქართველოში წარმოებული ხილისა და ბოსტნეულის სარეალიზაციო პერიოდი შეზღუდულია მოსავლის სეზონით.
მიღებული მოსავლის დასაწყობება შემდგომი რეალიზაციის მიზნით არ ხორციელდება, გამონაკლისს წარმოადგენს ცალკეული პროდუქციის უმნიშვნელო მოცულობები. ეს ყოველივე მნიშვნელოვან წილად განპირობებულია მოსავლის დაბინავებისათვის აუცილებელი ინფრასტრუქტურის ნაკლებობით პროდუქციის წარმოების არეალში.
წარმოების სრულფასოვანი ციკლის უზრუნველსაყოფად მნიშვნელოვანია შესაბამისი სიმძლავრისა და სტანდარტების მქონე შემნახველი ინფრასტრუქტურის შექმნა, ვინაიდან მოსავლის მიღების შემდგომ პროდუქციის სათანადო დაბინავებით ხელი შეეწყობა პროდუქცის შენახვას სეზონის დასრულების შემდგომ პერიოდის მანძილზე, რაც უზრუნველყოფს პროდუქციის რეალიზაციის შედეგად მეტი შემოსავლის მიღებას.
სხვადასხვა შეფასების მიხედვით, დღეისათვის საქართველოში არსებული სამაცივრე მეურნეობების ტევადობა შეადგენს 100 000 – 110 000 ტონას, მათგან ყველაზე დიდი მოცულობის მეურნეობები თავმოყრილია ორ ქალაქში – თბილისში (52,700 ტონა) და ფოთში (26 000) ტონა. არსებული სამაცივრე მეურნეობების საქმიანობა მიმართულია ძირითადად იმპორტირებული პროდუქციის შენახვაზე. გამონაკლისს წარმოადგენს ექსპორტიორი კომპანიების მიერ შექმნილი სამაცივრე მეურნეობები.
ამასთან აღსანიშნავია ის გარემობა, რომ სოფლის მეურნეობის სამინისტრო ახორციელებს სახელმწიფო პროგრამას „დანერგე მომავალი“, რომლითაც გათვალისწინებულია ინტენსიური და ნახევრად ინტენსიური მრავალწლიანი კულტურების ბაღების გაშენება საქართველოს სხვადასხვა მუნიციპალიტეტში. პროგრამის განხორციელების შედეგად ადგილობრივი ხილის წარმოება გაიზრდება უახლოესი 4–5 წლის განმავლობაში და შესაბამისად გაჩნდება დამატებითი ინფრასტრუქტურის აუცილებლობა.
მნიშვნელოვანია ის გარემოება, რომ პროგრამის ფარგლებში გაშენებული მრავალწლიანი კულტურები უმეტეს შემთხვევაში წარმოადგენს საექსპორტო პროდუქციას და შესაბამისად მიღებული მოსავლის პირველად დამუშავებას და შენახვას დიდი მნიშვნელობა ენიჭება, _ აცხადებენ სოფლის მეურნეობის სამინისტროშუი და ამის გათვალისიწნებით მიზანშეწონილად მიიჩნევენ, რომ პროგრამის ფარგლებში შემნახველი საწარმოების შექმნაც დაფინანდეს:
_ პროექტი ითვალისწინებს 12 მუნიციპალიტეტში (თიანეთი, ყაზბეგი, ჭიათურა, საჩხერე, ტყიბული, ხარაგაული, ცაგერი, ლენტეხი, ონი, მესტია, შუახევი და მარტვილი) თანადაფინანსების სპეციალური პირობების დადგენას, რაც განპირობებულია იმ გარემოებით, რომ „შეღავათიანი აგროკრედიტის“ პროექტის ფარგლებში 2013 წლის აპრილიდან 2015 წლის 26 ოქტომბრის ჩათვლით სულ გაცემულია 25 ათასზე მეტი სხვადასხვა რაოდენობისა და მოცულობის სესხი, მათ შორის აღნიშნულ 12 მუნიციპალიტეტში მოსახლეობაზე გაცემული სესხების ხვედრითი წილი მთლიანად გაცემულ სესხების რაოდენობაში არ აღემატება 0.1%-ს, ხოლო შესაბამისი რეგიონის ჭრილში არ აღემატება 10%-ს.
ასევე „სოფლის მეურნეობის პროდუქციის გადამამუშავებელი საწარმოების თანადაფინანსების“ პროექტის ფარგლებში 2014 წლის 1 თებერვლიდან 2015 წლის 26 ოქტომბრის ჩათვლით განსახილველად მიღებულია 230 პროექტი საქართველოს სხვადასხვა მუნიციპალიტეტიდან. ზემოთხსენებული 12 მუნიციპალიტეტიდან წარმოდგენილი ვალიდური პროექტების რაოდენობა ძირითად შემთხვევაში არ აღემატება ერთს ან საერთოდ არ არის წარმოდგენილი.
ზემოაღნიშნულ 12 მუნიციპალიტეტში ახალი საწარმოების შექმნის მოტივაციის ამაღლების მიზნით, მიზანშეწონილია მათზე ,,სოფლის მეურნეობის პროდუქციის გადამამუშავებელი საწარმოების თანადაფინანსების“ პროექტის ზოგადი პირობების გარდა დამატებით გავრცელდეს უფრო შღავათიანი სპეციალური პირობები, რაც ხელს შეუწყობს ზემოაღნიშნული 12 მუნიციპალიტეტის მოსახლეობის მიერ სოფლის მეურნეობის პროდუქციის გადამამუშავებელი საწარმოების შექმნას, _ აღნიშნავენ სამინისტროში.
