ენმ – ს ოზურგეთის რაიონული ორგანიზაციის თავმჯდომარემ დავით მჟავანაძემ დემოკრატიული ჩართულობის ცენტრში ბრიფინგი გამართა და ოზურგეთის მუნიციპალიტეტის სოფლებში წყალმომარაგების ქსელის რეაბილიტაციასთან დაკავშირებულ პრობლემებზე ისაუბრა. მჟავანაძის განცხადებით, ოზურგეთის მუნიციპალიტეტის სოფლებში ჭანიეთში, ასკანაში, ძიმითში, ჯუმათში წყლის სარეაბილიტაციო სამუშაობზე დახარჯულია მილიონობით ლარი, ხოლო სამუშაოები დაღვევებით არის შესრულებული:
"მინდა გაგაცნოთ ოზურგეთის მუნიციპალიტეტში უხარისხოდ შესრულებული ინფარსტრუქტურული სამუშაოების მცირე ჩამონათვალი. ამ ეტაპზე აქცენტი წყლის რეაბილიტაციის პროექტზე გავაკეთეთ. პირველი რაზეც დღეს გვინდა ვისაუბროთ, არის ასკანის წყალი, რომლის პრობლემაც დიდი ხანია დგას და ამაზე ჩვენ ვითხოვდით რეაგირებას, თუმცა ხელისუფლებამ აღნიშნულთან დაკავშირებით რეაგირება არ მოახდინა, რასაც მოჰყვა სავალალო შედეგი. მიუხედავად იმისა, რომ აღნიშნული პროექტის განსახორციელებლად დაიხარჯა 1 194 854 ლარი, პრობლემა ასკანელებისთვის კვლავაც მოუგვარებელი რჩება, ვინაიდან წყლის მილები ვერ უძლებს არსებულ წნევას, რის შედეგად ხდება მილების მასიური დაზიანება. გარდა ამისა სამუშაოების შესრულებისას არ იქნა გამოყენებული , ეგრეთწოდებული ქვიშის ბალიშები, რაც გამოიწვევს მომავალში მილების კვლავ დაზიანებას. ანალოგიური მდგომარეობა გვაქვს სოფელ ჭანიეთში. წარმოდგენილ ფოტოებში ნათლად ჩანს, რომ მილები დაუმარხავია, ფოტოები გადაღებულია პროექტის დასრულების შემდეგ"– ამბობს მჟავანაძე.
მისივე თქმით, სოფელ ჭანიეთში პროექტის ჩაბარების შემდეგ კონკრეტულ მონაკვეთებში ორჯერ მოხდა მილების შეცვლა, რადგან მანამდე არსებული მილები ვერ უძლებდა წნევას და ხდებოდა მისი დაზიანება. აღსანიშნავია რომ ჯამში ჭანიეთში წყლის რეაბილიტაციისთვის დახარჯულია 14 ათას ლარზე მეტი, თუმცა პრობლემა, სხვა სოფლების მსგავსად დღემდე მოუგვარებლია.
იგივე შეიძლება ითქვას ძიმითზეც, სადაც წყლის სარეაბილიტაციო სამუშაოებისთვის გამოყოფილია 33 977 ლარი. ასევე საყურადღებოა, სოფელ ჯუმათის მაგალითიც, სადაც ასევე წყლის სარეაბილიტაციო სამუშაოების ჩატარებისთვის გათვალისწინებულია 1 184 969 ლარი და ამ ამ ეტაპზე უხარისხოდ და ყველა ნორმების დარღვევით მიმდინარეობს სამუშაოები. კონკრეტულად კი შემიძლია, ვთქვა, რომ არ ხდება მილების ეგრეთწოდებული "ქვიშის ბალიშებში" მოქცევა და ხდება მისი დაფარვა ქვიანი მიწით. ჩვენ ხელისუფლებას შევახსენებთ, ეს არის ხალხის ფული და პასუხისმგებლობით მოეკიდონ აღნიშნულ საკითხებს, რადგან მხოლოდ ამ ოთხ შემთხვევაში ჩვენ საქმე გვაქვს 2 მილიონ ნახევარ ლარზე მეტი თანხის უხარისხოდ შესრულებილი სამუშაოებში დახარჯვასთან"_ განაცხადა "ერთიანი ნაციონალური მოძრაობის" ოზურგეთის რაიონული ორგანიზაციის თავმჯდომარემ.
ამ საკითხთან დაკავშირებით ოზურგეთის მუნიციპალიტეტის გამგებლის მოადგილე არჩილ ყაზაიშვილი ამბობს:
"საქართველოს ორგანული კანონის „ადგილობრივი თვითმმართველობის კოდექსი“-ს მე-16 მუხლის მე-2 ნაწილის "თ" ქვეპუნქტის მიხედვით მუნიციპალიტეტის საკუთარ უფლებამოსილებას განეკუთვნება მოსახლეობის წყალმომარაგებით და წყალარინებით უზრუნველყოფა. ამასთან, ამავე კანონის 163-ე მუხლის მე-1 ნაწილის შესაბამისად მუნიციპალიტეტი ამ კანონის მე-16 მუხლის მე-2 პუნქტის "თ" ქვეპუნქტით გათვალისწინებული უფლებამოსილების ფარგლებში სასმელი წყლის მიწოდებას და წყალარინებით მომსახურებას უზრუნველყოფს შესაბამისი ლიცენზიატი კერძო სამართლის სუბიექტების საშუალებით იმ დასახლებებში, სადაც სასმელი წყლის მიწოდებას და წყალარინების მომსახურებას შესაბამისი ლიცენზიატი მიმწოდებელი არ ახორციელებს. გასათვალისწინებელია, რომ მუნიციპალიტეტს, საქართველოს ენერგეტიკისა და წყალმომარაგების მარეგულირებელ ეროვნულ კომისიასა და მიმწოდებელ კერძო სამართლის სუბიექტებს შორის სამართლებრივი ურთიერთობის პირობები ამ კანონის მე-16 მუხლის მე-2 პუნქტის "თ" ქვეპუნქტით გათვალისწინებული უფლებამოსილების ფარგლებში განისაზღვრება შესაბამისი საკანონმდებლო აქტით.
აღნიშნული საკანონმდებლო აქტის პროექტი მზად იქნება 2015 წლის 31 დეკემბრამდე, რომელსაც ამზადებს საქართველოს რეგიონული განვითარებისა და ინფრასტრუქტურის სამინისტრო და მას საქართველოს პარლამენტს წარუდგენს საქართველოს მთავრობა. ამდენად, ამ აქტის მიღებით საბოოლოდ გაიმიჯნება სახელმწიფოს, მუნიციპალიტეტებსა და შესაბამისი მიმწოდებელ კერძო სამართლის სუბიექტებს შორის ფუნქციები. პარალელურ რეჟიმში, მუნიციპალიტეტში უკვე დაწყებულია შესაბამისი პროცესი და მუნიციპალიტეტის მიერ კერძო სამართლის იურიდიული პირის დაფუძნება, რომელიც უზრუნველყოფს მოსახლეობისათვის წყალმომარაგებისა და წყალარინების სერვისის ხარისხიან მიწოდებას." – აღნიშნავს ყაზაიშვილი .
