საქართველოს შინაგან საქმეთა სამინისტროს ვებ-გვერდზე განთავსებული ინფორმაციის თანახმად, 16 თებერვლიდან დღემდე პოლიციისთვის დაუმორჩილებლობის, არასრულწლოვნისთვის თავისუფლების აღკვეთის, იარაღის უკანონო შეძენა-შენახვის და მკვლელობის რამდენიმე ფაქტი მოხდა. გავრცელებული ინფორმაციით,18-19 თებერვალს განხორციელებული საპოლიციო კონტროლის შედეგად, გამოვლინდა სისხლის სამართლის 101 და ადმინისტრაციულ სამართალდარღვევათა 769 ფაქტი.
ასევე, საქართველოს შინაგან საქმეთა სამინისტროს ოფიციალური მონაცემებით 2016 წლის იანვარში საქართველოს ყველა საგამოძიებო უწყების მიერ 3183 დანაშაულია რეგისტრირებული, რომელთაგან 1121 გაიხსნა, ხოლო გასული წლის ანალოგიურ პერიოდთან შედარებით დანაშაულის პროცენტული მაჩვენებელი 3, 95%-ით გაიზარდა.
რაც შეეხება, შინაგან საქმეთა სამინისტროს ტერიტორიული დანაყოფების საგამოძიებო ქვემდებარეობის მონაცემებს, 2016 წლის იანვარში 2125 დანაშაულია რეგისტრირებული, რომელთაგან 1103 გაიხსნა, ხოლო წინა წლის ანალოგიური პერიოდის მონაცემებთან მიმართებაში დანაშაულის პროცენტულმა ზრდამ 1, 87 % შეადგინა.
ეს ის სტატისტიკური მონაცემებია, რომელიც შსს-ს ვებგვერდზე ოფიციალურად გამოქვეყნდა, თუმცა ოპოზიციური პარტიების წარმომადგენლების მხრიდან ბოლო დროს კეთდება განცხადებები, რომ ქვეყანაში კრიმინალი გაიზარდა, შსს კი ქმედით ნაბიჯებს ვერ დგამს.
"გურია ნიუსი" დაინტერესდა რას ფიქრობს მოსახლეობა, მოიმატა თუ არა ქვეყანაში კრიმინალმა? – ამის გასარკვევადაც თბილისის ქუჩებში მოქალაქეები გამოვკითხეთ:
მოქალაქე ქეთევან კოპლატაძეს თქმით, კრიმინალმა საგრძნობლად მოიმატა.
"იმ ინფორმაციებიდან გამომდინარე, რაც საინფორმაციო გადაცემებით ვრცელდება ქვეყანაში კრიმინალმა საგრძნობლად მოიმატა, "_თქვა კოპლატაძემ.
ქვეყანაში დანაშაულის ზრდაზე საუბრობს ასევე ნონა ქარდავაც.
"დიახ, ამ ბოლო დროს ბევრი დანაშაული ხდება, რის გამოც საღამოობით ვნერვიულობ თუ ჩემი ოჯახის წევრები სახლში არ არიან,"_ამბობს ქარდავა.
მოქალაქე გიორგი ყაველაშვილი კი მიიჩნევს, რომ დღეს არ ხდება იმდენი დანაშაული, როგორც ადრე ხდებოდა.
"დანაშაული ყოველთვის ხდება, მაგრამ დღეს არ არის ისეთი საგანგაშო მდგომარეობა როგორიც ადრე იყო,"_თქვა ყაველაშვილმა.
როგორც "გურია ნიუსთან" საუბრისას დიანა ალიევამ აღნიშნა, საინფორმაციო გადაცემებით გავრცელებულ ინფორმაციებზე დაყრდნობით საღამოს საათებში ქალაქის ქუჩებში მოძრაობა უსაფრთხო აღარ არის.
"ჩემი აზრით, ქვეყანაში ბევრი პრობლემაა გადასაჭრელი, მაგრამ როცა ტელევიზიით მესმის ან სოციალურ ქსელში მხვდება თითქმის ყოველდღე სხვადასხვა ყაჩაღობის, დაჭრის ან მკვლელობის შესახებ ინფორმაცია, ვხვდები, რომ ქალაქში გადაადგილებაც კი აღარ არის უსაფრთხო, განსაკუთრებით საღამოს საათებში, შესაბამისად, მივიჩნევ, რომ კრიმინალმა მოიმატა,"_ ამბობს ალიევა.
ნიკა ბასიაშვილი კი ამბობს, რომ საერთოდ არ უყურებს საინფორმაციო გადაცემებს, შესაბამისად, კრიმინალის ზრდაზე ვერაფერს იტყვის.
"საერთოდ არ ვუსმენ საინფორმაციოებს და არც ის ვიცი რა ვითარებაა კრიმინალთანდაკავშირებით, ამიტომ ვერაფერს გეტყვით,"_თქვა ბასიაშვილმა.
დანაშაულის რიცხვის ზრდაზე საუბრობს კიდევ ერთი მოქალაქე მზია სამხარაული, რომელიც ამბობს, რომ ხალხმა არ იცის თავი როგორ ირჩინოს და ამის გამო სასურსათო მაღაზიებსა და ბანკებს აყაჩაღებენ.
"დიახ, მივიჩნევ, რომ დანაშაულების რიცხვმა მოიმატა. ბოლო დროს საინფორმაციო გადაცემებიდან მესმის სასურსათო მაღაზიებისაა თუ ბანკების დაყაჩაღების შესახებ, რაც ალბათ იმის ბრალია, რომ ხალხს ცხოვრება უჭირს და არ იციან თავი როგორ ირჩინონ,"_ ამბობს სამხარაული.
ზურა ბოლქვაძე კი ამბობს, რომ ქვეყანაში კრიმინალი არ გაზრდილა.
"არის შემთხვევები, რომელიც არასასიამოვნოა, მაგრამ არ მგონია ქვეყანაში დანაშაული სტატისტიკის მიხედვით ძალიან გაზრდილი იყოს,"_ამბობს ბოლქვაძე.
