ლანჩხუთის მუნიციპალიტეტის კუთვნილი 9 800 ჰექტარი ფართობის დაცული ტერიტორიების საკუთრებაში დაარეგისტრირებას ადგილობრივი საზოგადოების ფართო სპექტრში მკვეთრად უარყოფითი რეაქცია მოჰყვა.
"ეროვნული პარკი ქართველი ადამიანისთვის არაა მოგონილი, მისმა ჩამოყალიბებამ შეიძლება ჩაყლაპოს საქართველო თავისი ბუნებრივი სიმდიდრით. თუ ვერ შევძელით ეროვნული პარკის ჩამოყალიბების შეჩერება, დავკარგავთ ტერიტორიებს. ხალხი მიეძალება მთას და თუ მთა გაიჩეხა, ბუნებრივია, ამას არ მოჰყვება კარგი შედეგი.
ლანჩხუთის ტერიტორიების ისევ გაველურებაზე ოცნებობს ისეთი ხალხი, რომლებმაც არ იციან, რომ რამდენიმე ათეული წლის წინ ეს ტერიტორიები იყო დაჭაობებული, ადამიანები იხოცებოდნენ მალარიით. უზომო რაოდენობით იყო მალარიის გამავრცელებელი კოღოები და ცხოვრება შეუძლებელი იყო. არა მგონია, ჭაობმა და კოღომ უფრო მეტი სიკეთე მოუტანოს მოსახლეობას, ვიდრე გაკულტურებულმა ტერიტორიებმა.
ამ ტერიტორიების ეროვნული პარკის საზღვრებში მოხვედრა ნიშნავს, რომ, იქ, ნადირობიდან დაწყებული, ფიჩხის შეგროვებით დამთავრებული, მოსახლეობას ყველაფერი კატეგორიულად ეკრძალება. აქვე გასათვალისწინებელია ისიც, რომ აღნიშნულ ტერიტორიაზე რამდენიმე მოქმედი მცირე ფერმერული მეურნეობაა მოწყობილი, ასევე, ტყეკაფით სარგებლობს ადგილობრივი მოსახლეობა", _ ამბობენ ის ლანჩხუთელები, რომლებიც უკვე წლებია კატეგორიულად ეწინააღმდეგებიან ეროვნული პარკის საზღვრებში მუნიციპალიტეტის კუთვნილი ტერიტორიების მოხვედრას.
აღსანიშნავია, რომ 1998 წლიდან, როდესაც ჩამოყალიბდა დაცული ტერიტორია, რომლის საზღვრებშიც თავიდანვე მოხვდა ზემონახსენები 9 800 ჰექტარი ფართობი და შეიქმნა კოლხეთის ეროვნული პარკი, ლანჩხუთის მოსახლეობის სრული უმრავლესობა იმთავითვე აფიქსირებდა საკუთარ უარყოფით დამოკიდებულებას მისადმი _ შეგროვდა ხელმოწერები, არა ერთი წერილი გაიგზავნა პარლამენტში, მთავრობაში, პრეზიდენტთან და სხვადასხვა ინსტანციაში, სადაც ცალსახად იყო დაფიქსირებული ლანჩხუთელთა უარყოფითი დამოკიდებულება საკითხისადმი; ბევრჯერ შემდგარა ლანჩხუთში შეხვედრები გარემოს დაცვის მინისტრებთან, თუ ამა თუ იმ მოწვევის პარლამენტის წევრებთან, მაგრამ კომპრომისის მიღწევა მაინც ვერ ხერხდებოდა. მოსახლეობა და ადგილობრივი ხელისუფლება ყოველთვის ერთ აზრზე იყო და დათმობას არასდროს აპირებდა _ არც ერთ გამგებელს არ მოუწერია ხელი მიღება-ჩაბარების აქტზე.
ბოლო ასეთი შინაარსის წერილით, რომელზეც 14 ათასი ადამიანის ხელმოწერა იყო დაფიქსირებული, მოსახლეობამ გასულ წელს მიმართა ლანჩხუთის საკრებულოს თავმჯდომარეს _ ისინი ითხოვდნენ, რომ საკრებულოს შეესწავლა საკითხი და მოემზადებინა წერილები, როგორც პარლამენტში, ასევე, სხვა ინსტანციაში გასაგზავნად, სადაც დაფიქსირებული იქნებოდა მოსახლეობის პოზიცია _ დაუბრუნდეს ხალხს კოლხეთის ეროვნულ პარკში დაბლოკილი ბუნებრივი რესურსები და საერთოდ გაუქმდეს ეს პარკი". საკრებულომ გასული წლის მაისში საგანგებოდ მოწვეულ სხდომაზე იმსჯელა ამ საკითხთან დაკავშირებით და გარემოს დაცვის სამინისტროში შესაბამისი წერილიც გააგზავნა, სადაც კიდევ ერთხელ იყო დაფიქსირებული უარი ტერიტორიის გადაცემაზე.
თუმცა, აღმოჩნდა, რომ აქედან ორ თვეში, იმ მოტივით, რომ ეს ტერიტორიები ეკონომიკის სამინისტროს დაქვემდებარებაში იყო და თავისუფლად შეეძლოთ ადგილობრივი ხელისუფლების დაუკითხავად გაესხვისებინათ, დაცული ტერიტორიების სააგენტომ 9800 ჰექტარი დაირეგისტრირა, რაც მუნიციპალიტეტის ხელმძღვანელობისთვის მხოლოდ მიმდინარე წლის მარტში გახდა ცნობილი.
ამ ფონზე რამდენიმე დღის წინ ლანჩხუთში სტუმრად იმყოფებოდა დაცული ტერიტორიების სააგენტოს ხელმძღვანელი ლაშა მოისწრაფიშვილი, რომელსაც გურიის გუბერნატორი, გია სალუქვაძე, ლანჩხუთის მუნიციპალიტეტის გამგებელი ზაზა ურუშაძე, საკრებულოს თავმჯდომარე გოგი ხელაძე შეხვდნენ და კოლხეთის ეროვნული პარკის ლანჩხუთის უბნის ტერიტორიის პრობლემის გადაჭრის გზებზე იმსჯელეს.
შეხვედრაზე იმყოფებოდა, ასევე, საკრებულოს შესაბამისი კომისიის ხელმძღვანელი გიორგი ჩახვაძეც, რომელმაც "გურია ნიუსს" გააცნო, თუ რა შეთანხმება შედგა მუნიციპალიტეტსა და სააგენტოს შორის აღნიშნულ საკითხთან მიმართებაში: "ამ წლების განმავლობაში, ლანჩხუთის მოსახლეობა ყოველთვის აფიქსირებდა უარყოფით დამოკიდებულებას ეროვნული პარკის მიმართ _ ფაქტობრივად, მოსახლეობის 99% ამის წინააღმდეგი იყო. 2015 წელს, მოსახლეობის მოთხოვნიდან გამომდინარე, საკრებულოს ინიციატივით, გაიმართა სესია, სადაც განიხილებოდა ეს საკითხი. სესიაზე კიდევ ერთხელ ეთქვა უარი ეროვნული პარკის ფარგლებში ლანჩხუთის ფართობების დარეგისტრირებას. მაშინ საკრებულოს წევრთა ეს შეკრება გამოწვეული იყო იმითაც, რომ გარემოს დაცვის სამინისტროს დაქვემდებარებაში მყოფმა დაცული ტერიტორიების სააგენტომ დაიწყო ამ ტერიტორიების დემარკაციის პროცესი.
სააგენტომ ჩვენი ტერიტორიიდან 626 ჰექტარი ზემონახსენებ სესიამდე დაირეგისტრირა, ხოლო დანარჩენი _ ორი თვის შემდეგ, ივლისში. ამასთან დაკავშირებით, საქმის კურსში არ იყო ადგილობრივი ხელისუფლება, თუმცა, მას შემდეგ, რაც გაცხადდა, რომ რეესტრში უკითხავად დარეგისტრირდა ეს ფართობები, მოვიწვიეთ დაცული ტერიტორიების სააგენტოს ხელმძღვანელობა.
ამ შეხვედრაზეც ლანჩხუთელების მიერ დაფიქსირდა უარყოფითი დამოკიდებულება ტერიტორიების გადაცემის მიმართ. სააგენტოს ხელმძღვანელი გააფრთხილეს კიდეც, თუ შესაბამისი რეაგირება არ მოხდება აღნიშნულ საკითხთან დაკავშირებით, ლანჩხუთში საპროტესტო აქციებს დავიწყებთო.
სააგენტოს ხელმძღვანელის მიერ შეხვედრაზე გაკეთებული განმარტებით, თუ ადგილობრივი ხელისუფლებისგან დაიწყება შესაბამისი პროცედურების გახორციელება, სააგენტო არ არის წინააღმდეგი ამ 9800 ჰექტარ მიწის ფართობზე, რომელიც ამჟამად დაცული ტერიტორიების საზღვრებშია, შექმნას მრავალმხრივი გამოყენების მუნიციპალური ტყე, რომელიც ლანჩხუთის დაქვემდებარებაში იქნება", _ გვითხრა ჩახვაძემ.
გიორგი ჩახვაძე იმასაც დასძენს, რომ ეს საკითხი წარმომადგენლობითი ორგანოს განცხადების საფუძველზე ჯერ პარლამენტის შესაბამისმა კომიტეტმა უნდა განიხილოს და, შესაბამისად, ცვლილება პარლამენტმა უნდა განახორციელოს.
