მოქალაქე ზვიად ფეიქრიშვილის საქმეზე პოლიციის ყოფილი თანამშრომლების მიმართ სისხლის სამართლებრივი დევნა დაიწყო.
ამის შესახებ ინფორმაციას "ადამიანის უფლებათა ცენტრი" ავრცელებს.
გავრცელებული ინფორმაციით, 2016 წლის აპრილში შიდა ქართლისა და მცხეთა-მთიანეთის საოლქო პროკურატურამ კასპის პოლიციის სამ ყოფილ თანამშრომელს ბრალი წაუყენა სისხლის სამართლის კოდექსის 333-ე მუხლით და პასუხისგებაში მისცა ზვიად ფეიქრიშვილის მიმართ ფიზიკური ძალადობის განხორციელების ფაქტზე.
ზვიად ფეიქრიშვილის მიმართ ფიზიკური ძალადობის შემთხვევა 2015 წლის 4 აპრილს მოხდა. აღნიშნული ინციდენტის წინაპირობა ფეიქრიშვილის მეუღლის მისამართით პოლიციის ერთ-ერთი თანამშრომლის შეურაცხმყოფელი საქციელი იყო, რის გამოც ზვიად ფეიქრიშვილმა პროტესტი გამოთქვა, ამას კი პოლიციელების მიერ უფლებამოსილების ბოროტად გამოყენება მოჰყვა.
ფაქტის შესახებ "გურია ნიუსი" არაერთხელ წერდა. ფეიქრიშვილმა ჩვენთან ინტერვიუში პოლიციელების ვინაობაც დაასახელა, რომლებმაც მას შეურაცხყოფა მიაყენეს.
კერძოდ, კრიმინალური პოლიციის ოთხმა თანამშრომელმა – ლევან ბაისონაშვილმა, ამირან ქასოშვილმა, მურად ბარნოვმა და მიხეილ მიგრიაულმა ფეიქრიშვილი საკუთარი სახლიდან ღამის 9 საათზე გაიყვანა და კასპის რაიონის სოფელ ზემო ხანდაკის სასაფლაოს ტერიტორიაზე სცემა.
როგორც ფეიქრიშვილი აცხადებდა, კრიმინალური პოლიციის თანამშრომელი ლევან ბაისონაშვილი მის მეუღლესთან რომანის გაბმას გეგმავდა.
"მიუხედავად იმისა, რომ აღნიშნული შემთხვევა 2015 წლის 4 აპრილს მოხდა, პოლიციის ყოფილ თანამშრომლებზე სამართლებრივი დევნა 1 წლის შემდეგ დაიწყო.
თბილისის ადამიანის უფლებათა სახლის უფლებადამცველთა მობილურმა ჯგუფმა არაერთხელ მოუწოდა შიდა ქართლისა და მცხეთა-მთიანეთის საოლქო პროკურატურას, საქმეზე ეფექტური და დროული გამოძიება ჩაეტარებინა. სწორედ თბილისის ადამიანის უფლებათა სახლის უფლებადამცველთა მობილური ჯგუფის ჩართულობის შედეგად დაიწყო პოლიციის ყოფილ თანამშრომლებზე სისხლისსამართლებრივი დევნა.
თბილისის ადამიანის უფლებათა სახლის უფლებადამცველთა მობილური ჯგუფი იმედოვნებს, რომ გორის რაიონულ სასამართლოში აღნიშნულ საქმეზე სამართალწარმოება იქნება ეფექტური და საბოლოოდ, საქმეზე იქნება მიღებული სამართლიანი გადაწყვეტილება", _ აღნიშნულია გავრცელებულ ინფორმაციაში.
დაზარალებულ ზვიად ფეიქრიშვილის სამართლებრივ ინტერესებს თბილისის ადამიანის უფლებათა სახლის პროექტში – "ადამიანის უფლებები რეგიონებში" ჩართული ადამიანის უფლებათა ცენტრის იურისტი ეკა ქობესაშვილი იცავს.
ამავე თემაზე:
პოლიციელებისგან ნაცემი მოქალაქე საქმის დროულად გამოძიებას ითხოვს
