"ქართული ოცნება-დემოკრატიული საქართველოს" აღმასრულებელი მდივანი, ირაკლი კობახიძე საქართველოს შინაგან საქმეთა ყოფილი მინისტრის, ვანო მერაბიშვილის საქმესთან დაკავშირებით კომენტარს აკეთებს.
"სტრასბურგის სასამართლოს გადაწყვეტილებასთან დაკავშირებით, "ნაციონალური მოძრაობის" მხრიდან არაერთგზის გავრცელდა ცრუ ინფორმაცია. ამის საპასუხოდ გვსურს მოსახლეობას გავაცნოთ რეალური ინფორმაცია ამ გადაწყვეტილების რეალური შინაარსის შესახებ. სტრასბურგის სასამართლომ დღეს გაავრცელა ოფიციალური განცხადება, რომლის სათაურში სიტყვასიტყვით აღნიშნულია, რომ ივანე მერაბიშვილის წინასწარი პატიმრობა იყო როგორც კანონიერი, ისე დასაბუთებული. უნდა აღინიშნოს, რომ სტრასბურგის სასამართლომ მხოლოდ წინასწარი პატიმრობის მიზანშეწონილობასა და ამ პერიოდში მერაბიშვილის უფლებრივ მდგომარეობაზე იმსჯელა. სასამართლოს კითხვები არა აქვს მერაბიშვილის ბრალეულობასთან დაკავშირებით. შესაბამისად, სასამართლოს გადაწყვეტილება არავითარი ფორმით არ ცვლის ივანე მერაბიშვილის სამართლებრივ მდგომარეობას."- ამბობს ირაკლი კობახიძე.
მისივე თქმით, სასამართლომ ივანე მერაბიშვილის სარჩელი ძირითად ნაწილში უსაფუძვლოდ ცნო და დაადგინა მხოლოდ ორი ხარვეზი, რომელის არ არის ივანე მერაბიშვილის არც წინასწარი პატიმრობის უკანონობის დადგენის და მითუმეტეს, არც მისი ბრალეულობის უარყოფის საფუძველი. "ნაციონალური მოძრაობის" განცხადება იმის თაობაზე, რომ სტრასბურგის სასამართლოს აზრით, თითქოს, ივანე მერაბიშვილი პოლიტიკიდან მისი ჩამოშორების მიზნით იქნა დაკავებული, არის მტკნარი სიცრუე. როგორც უკვე აღინიშნა, სტრასბურგის სასამართლოს გადაწყვეტილებით, ივანე მერაბიშვილის წინასწარი პატიმრობა შეფასდა როგორც კანონიერი და დასაბუთებული. გადაწყვეტილების არც ერთ ფრაზაში მინიშნებაც კი არ გვხვდება მერაბიშვილის შესაძლო პოლიტიკურ პატიმრობაზე."– თქვა ირაკლი კობახიძემ.
ამავე თემაზე:
მანანა კობახიძე: "ეს არის სპეკულირება, რომელიც ჩვენ მოვისმინეთ ადვოკატისგან"
"ივანე მერაბიშვილის წინასწარი პატიმრობა კანონიერია"- რას აცხადებენ იუსტიციის სამინისტროში
სტრასბურგის სასამართლოს დადგენილებით მერაბიშვილის პატიმრობა არის კანონიერი – თეა წულუკიანი
