14 ივნისს, საქართველოს ყოფილი პრემიერ-მინისტრი, ბიძინა ივანიშვილი ბეჭდური მედიის და საინფორმაციო სააგენტოს წარმომადგენლებს შეხვდა.
ყოფილმა პრემიერ-მინისტრმა "გურია ნიუსის" კითხვაზე: ხედავს თუ არა ყოფილი პრემიერი პარტიის შიდა სტრუქტურის პრობლემას- ივანიშვილმა ასე გვიპასუხა:
"როგორ არ ვხედავ?! – ვხედავ და არც არსებობს სრულყოფილი სტრუქტურა. არც სახელმწიფო არსებობს სრულყოფილი. ნებისმიერ სტრუქტურას განვითარება სჭირდება, კვირიკაშვილი აცნობიერებს ამას და შრომობს, ცდილობენ. რა გამოვა ვნახოთ, თუ ისინი კარგ ორგანიზაციას გააკეთებენ, მაქსიმალურ ორგანიზებულობას შეძლებენ, კიდევ გავუსვამ ხაზს რომ "ნაციონალებს" ძალიან გაუჭირდებათ ბარიერის გადალახვა", _ თქვა ბიძინა ივანიშვილმა.
ხედავს თუ არა შიდა სტრუქტურულ პრობლემებს პარტიის ადგილობრივი ლიდერები და რას აპირებს ისინი სამომავლოდ, ამას ჩვენს მიერ ჩაწერილ კომენტარებისგან გაიგებთ.
"ქართული ოცნება – დემოკრატიული საქართველოს" ჩოხატაურის რაიონული ორგანიზაციის თავმჯდომარის ირაკლი კუჭავას თქმით, პარტიაში სტრუქტურები დასახვეწია და ამ მიმართულებით ინტენსიური მუშაობა მიმდინარეობს.
"არჩევნებისთვის საოლქო ორგანიზაციები, დარწმუნებული ვარ, სრულ მზად ყოფნაში იქნება და სამართლიან გარემოში, განსხვავებით წინა ხელისუფლებისაგან, დამსახურებულ და დამაჯერებელ გამარჯვებას მოიპოვებს "ქართული ოცნება". – გვითხრა ირაკლი კუჭავამ.
"ქართული ოცნება – დემოკრატიული საქართველოს" ოზურგეთის რაიონული ორგანიზაციის თავმჯდომარე დავით დარჩია ამბობს, რომ ნებისმიერ ორგანიზაციას სჭირდება დახვეწა და განვითარება, მათ შორის გამონაკლისი არ არის პარტია "ქართული ოცნება-დემოკრატიული საქართველოს" ოზურგეთის რაიონული ორგანიზაცია.
"ჩვენ სულ რამდენიმე თვეა რაც ავირჩიეთ, ოზურგეთში პარტიის ბიუროს განახლებული შემადგენლობა, ყოველდღიურად ვმუშაობთ პარტიის სტრუქტურის შიდა მიმართულებების განვითარებაზე. დარწმუნებული ვარ, ამ პროცესის საბოლოო შედეგი იქნება, საპარლამენტო არჩევნებში პარტია "ქართული ოცნების" დამაჯერებელი გამარჯვება." – თქვა დავით დარჩიამ.
ამავე პარტიის ლანჩხუთის რაიონული ორგანიზაციის თავმჯდომარე, გოგი ხელაძე აღნიშნავს, რომ პარტიაში გარკვეულწილად პრობლემები მართლაც არსებობს, რომელთა აღმოფხვრაც ამჟამად აქტიურად მიმდინარეობს.
"უმოკლეს დროში საპარლამენტო არჩევნებში უკვე დავინახავთ სათანადო დადებით შედეგებს.“"- მიიჩნევს გოგი ხელაძე.
