შეფასებისა და გამოცდების ეროვნული ცენტრის ინფორმაციით, ერთიანი ეროვნული გამოცდების ნაშრომების გასწორება დაიწყო.
როგორც ცენტრში განმარტავენ, საგამოცდო ნაშრომების გასწორება საგამოცდო პროცესის პარალელურად მიმდინარეობს.
"პროცესი ქართული ენისა და ლიტერატურის ნაშრომების გასწორებით დაიწყო. საგამოცდო ნაშრომები სწორდება შეფასებისა და გამოცდების ეროვნული ცენტრის სპეციალისტების მიერ შექმნილი კომპიუტერული პროგრამით (eMarker)", _ ნათქვამია ცენტრის განცხადებაში.
მათივე ინფორმაციით, ელექტრონული გასწორება სრულიად გამორიცხავს ნაშრომის იდენტიფიცირების შესაძლებლობას.
"პროცესი ანონიმურობასა და კონფიდენციალობას სრულად უზრუნველყოფს. გამსწორებელი კოდირებულ ნაშრომს სრულად ვერ ხედავს და მასთან მხოლოდ ცალკეული დავალებები მიდის. თითოეულ დავალებას ორი გამსწორებელი ასწორებს. იმ შემთხვევაში, თუ მათი შეფასებები ერთმანეთს არ დაემთხვევა, ნაშრომი მესამე სპეციალისტს გადაეგზავნება", _ აღნიშნავენ შეფასებისა და გამოცდების ეროვნულ ცენტრში.
ცენტრი შედეგების გამოცხადებას ივლისის ბოლოდან ეტაპობრივად დაიწყებს. მიღებულ ქულებს აბიტურიენტები გასწორების დამთავრებისთანავე შეიტყობენ. შედეგებთან ერთად თითოეულ აბიტურიენტს საკუთარი ნამუშევრის ელექტრონული ვერსიის ნახვაც შეეძლება.
