„ნინო ბურჯანაძე – დემოკრატიული მძრაობის“ ლიდერმა პარლამენტის საპროცედურო კომიტეტს კიდევ ერთხელ მიმართა, რომ დროულად შეასრულონ საკუთარი ვალდებულებები. მისი თქმით, როგორც მოსალოდნელი იყო, პარლამენტის საპროცედურო საკითხთა კომიტეტის სხდომა არ შედგა და შესაბამისად, კვლავ არ ეძლევათ შესაძლებლობა, რომ დაიწყონ ხელმოწერების შეგროვების პროცესი საქართველოს უბლოკო სტატუსის თაობაზე.
„მინდა, კატეგორიულად მივმართო პარლამენტის წევრებს, რომლებიც მთელი ამ წლების განმავლობაში მოსახლეობის ხარჯზე მრავალნულიან ხელფასებს იღებდნენ. თქვენი პირველი მოვალეობა, ბატონებო და ქალბატონებო, არის პარლამენტის და კომიტეტის სხდომებზე დასწრება. ნუ გვიშლით ხელს! საპროცედურო კომიტეტის წევრები, თხუთმეტი ადამიანიდან რვა „ქართული ოცნების“ წევრია. შესაბაისად, „ქართულმა ოცნებამ“ პოლიტიკური ნების არსებობის შემთხვევაში ნამდვილად უნდა შეაგროვოს ქვორუმი, რომელიც სჭირდება ჩვენი ხელმოწერების შეგროვებისათვის შესაბამისი პროცედურების დაწყებას“, _ განაცხადა ნინო ბურჯანაძემ.
მისი განცხადებით, ჩნდება სერიოზული ეჭვი, რომ ეს არის პოლიტიკური პროცესი.
„ერთხელ ჩავარდა ბიუროს სხდომა, პრაქტიკულად, უკვე მესამე კვირაა, ჩვენ არ გვეძლევა მუშაობის დაწყების შესაძლებლობა, ამავდროულად, მინდა ვთქვა, რომ ის, რასაც ახლა საქართველოს პარლამენტის წევრები აკეთებენ, არის, უბრალოდ, სისხლის სამართლის დანაშაული. ეს არის სიხლის სამართლის კოდექსის 166 მუხლი, სადაც პირდაპირ წერია, რომ პოლიტიკური პარტიისთვის საქმიანობაში ხელის შეშლა, მათ შორის, სამსახურებრივი მდგომარეობის გამოყენებით, ეს არის დანაშაული. დიახ, ბატონებო და ქალბატონებო, თქვენ თქვენი სამსახურებრივი მდგომარეობის გამოყენებით, ჩვენ ხელს გვიშლით პოლიტიკური საქმიანობის გახორციელებაში. პარტიას ხელს უშლით საარჩევნო კამპანიის წარმოებაში.
მესმის, რომ თქვენ ამ ინიციატივის გეშინიათ, რადგან ძალიან კარგად იცით, რომ საქართველოს მოსახლეობის ძალიან დიდი ნაწილი მხარს უჭერს სწორედ უბლოკო სტატუსს და იმას, რომ არცერთი სახელმწიფოს, მათ შორის, არც რუსეთის, ჯარი საქართელოს ტერიტორიაზე აღარ იდგეს.
ჩვენ ამას ყველა შემთხვევაში მივაღწევთ, ჩვენ გავამთლიანებთ სამშობლოს, ჩვენ გავაძლიერებთ ქვეყანას, მაგრამ თქვენი ხელის შეშლის გამო, ამ პროცესის დაწყება გვიჭიანურდება.
შეასრულეთ თქვენი უფლება-მოვალეობა, მიბრძანდით პარლამენტში და მოგვეცით საშუალება, დავიწყოთ ხელმოწერების შეგროვება უბლოკო სტატუსის თაობაზე“, _ განაცხადა ნინო ბურჯანაძემ.
