სოციალურმა ქსელმა "ფეისბუქი" საკუთარ მომხმარებელს ახალ ფუნქციას სთავაზობს.
სოციალური ქსელის, მესენჯერის აპლიკაციის მომხმარებლებს ახალი ფუნქციის -საიდუმლო მიმოწერის გამოყენება უკვე შეუძლიათ.
საიდუმლო მიმოწერის გამოყენება მარტივია: მესენჯერში ახალი მიმოწერის (conversation) გახსნის შემდეგ, ზედა მარჯვენა კუთხეში დაინახავთ წარწერას SECRET, ან პატარა ბოქლომს – იმის მიხედვით, თუ რომელ ოპერაციულ სისტემას იყენებთ – "ანდროიდს", "ვინდოუსს", "აიფონს" თუ რომელიმე სხვას.
დიალოგის მონაწილის არჩევის შემდეგ, იწყებთ სტანდარტულ მიმოწერას, იმ განსხვავებით, რომ ორივე მხარის საუბარი დაშიფრული იქნება. გარდა ამისა, წამზომის დახმარებით თავად გადაწყვეტთ, თუ როდის უნდა გაქრეს თქვენი მიმოწერა.
დაშიფრული მიმოწერის წაკითხვა მხოლოდ გამგზავნსა და მიმღებს შეეძლება და ხშირ შემთხვევაში, მისი გაშიფვრა თავად Facebook-საც არ შეეძლება.
საიდუმლო დიალოგი ყველასათვის ერთდროულად ხელმისაწვდომი არ გახდება. Facebook-ის განცხადებით, მომხმარებელთა მცირე რაოდენობისთვის იგეგმება აპლიკაციის გამოშვება ბეტა-ტესტირების რეჟიმში, რის შემდეგაც, ზაფხულის მიწურულს, ის Facebook Messenger-ის ყველა მომხმარებლისათვის გახდება ხელმისაწვდომი.
მსგავს სერვისს უკვე იყენებენ სხვა სამესიჯო სერვისებიც, მაგალითად Facebook-ის კუთვნილი WhatsApp-ი, რომელმაც შიფრირება აპრილიდან დანერგა. ასევე Apple-ი თავის iMessages-ში და როგორც ცოტა ხნის წინ Google-მა განაცხადა, დაშიფვრას ისიც გამოიყენებს თავის ახალ სამესიჯო აპლიკაციაში Allo.
Facebook-ის შემთხვევაში, WhatsApp-ისგან განსხვავება ის იქნება, რომ დაშიფვრა არა საწყის რეჟიმში, არამედ არჩევით პარამეტრებში გამოჩნდება. ეს კი იმას ნიშნავს, რომ თქვენ მიერ გაგზავნილი წერილები მხოლოდ "საიდუმლო საუბრის" ფუნქციის ხელით გააქტიურების შემდეგ დაიშიფრება.
Facebook Messenger-ს თვეში 900 მილიონზე მეტი აქტიური მომხმარებელი ჰყავს და შესაბამისად, კომპანიის ეს ქმედება მომხმარებელთა პირადი უსაფრთხოებისკენ გადადგმული უზარმაზარი, გლობალური ნაბიჯი იქნება.
საიდუმლო რეჟიმი, რომელიც აქამდე სატესტო რეჟიმში იყო გაშვებული, ახლა უკვე ხელმისაწვდომია "ფეისბუქის" 900 მილიონივე მომხმარებლისთვის.
პერსონალურ მონაცემთა დაცვის ინსპექტორის აპარატის "ფეისბუქის" ვებგვერდზე ვკითხულობთ, რომ იმ აპლიკაციებისგან განსხვავებით, რომლებიც შეტყობინებებს შიფრავენ, "ფეისბუქის" შემთხვევაში, საიდუმლო მიმოწერა მაშინვე მთავრდება, როგორც კი მესენჯერიდან გამოხვალთ. ყოველი ახალი საუბრის წამოწყებისას SECRET რეჟიმის ჩართვა ხელახლა მოგიწევთ.
"ფეისბუქმა" დაშიფვრის მექანიზმი WhatsApp-ის აპლიკაციისთვისაც ჩაუშვა.
მომზადებულია newsmaritime.com -ისა და techcrunch.com-ის მასალების მიხედვით
