საქართველოს პრემიერ-მინისტრი გიორგი კვირიკაშვილი პარლამენტის არჩევნების მეორე ტურის დასრულებას ეხმიანება და აცხადებს, რომ ქვეყანამ დემოკრატიის ტესტი ჩააბარა.
"მინდა ყველას მოგილოცოთ საპარლამენტო არჩევნების წარმატებით დასრულება. დღეს ჩვენს ქვეყანაში გაიმარჯვა დემოკრატიამ ეს არის ქართველი ხალხის, საქართველოს გამარჯვება.
ყველა შეფასებით 2016 წლის საპარლამენტო არჩევნები იყო სამართლიანი, თავისუფალი, გამჭვირვალე და დემოკრატიული. დიდი მადლობა იმ მაღალი ნდობისთვის, რომელიც ჩვენს გუნდს გამოუცხადეთ. ეს არის უდიდესი პასუხისმგებლობა. მჯერა ამ პასუხისმგებლობას თავს გავართმევთ და ქვეყანას განვითარების ახალ ეტაპზე გადავიყვანთ.
"ქართული ოცნების" მხარდაჭერით თქვენ ხმა მიეცით თავისუფლებას, განვითარებას, სტაბილურობას და ჩვენი ქვეყნის ევროპულ მომავალს. ამ არჩევანის პოზიტიური შედეგები აუცილებლად აისახება ყოველი თქვენგანის ცხოვრებაზე. მადლობას გიხდით ყველას ასეთი ერთსულოვნებისთვის.
ჩვენმა ხალხმა გამოავლინა მაღალი სამოქალაქო კულტურა, პირნათლად მოიხადა თავისი მოქალაქეობრივი ვალი. პატივს ვცემ თითოეული ადამიანის თავისუფალ არჩევანს, იმის მიუხედავად, რომელ პოლიტიკურ ძალას მისცა ხმა. მთავარია, რომ ჩვენ ყველამ ერთად შევძელით საქართველიოს უახლეს ისტორიაში ყველაზე დემოკრატიული საპარლამენტო არჩევნების ჩატარება და ეს არის უდიდესი წინგადადგმული ნაბიჯი.
დიდი მადლობა მინდა გადავუხადო საერთაშორისო და ადგილობრივი სადამკვირვებლო მისიების წარმომადგენლებს არჩევნების მონიტორინგში ჩართულობისთვის, მადლობა მედიას, ჟურნალისტებს, რომლებიც აშუქებდნენ პროცესებს.
ჩვენი ხალხის გადაწყვეტილებით, "ქართულმა ოცნებამ" მიიღო საკონსტიტუციო უმრავლესობა. ჩვენ ამ მანდატს გამოვიყენებთ იმისათვის, რომ აღარავის მიეცეს შესაძლებლობა კონსტიტუცია რომელიმე ერთ პოლიტიკურ ძალას მოარგოს.
"ქართული ოცნებისთვის" საკონსტიტუციო უმრავლესობა ნიშნავს კიდევ უფრო დიდ პასუხისმგებლობას. რაც მეტია ხალხის ნდობა მით უფრო მომთხოვნია საზოგადოება ხელისუფლების მიმართ ჩვენ გვაქვს ძალიან დიდი და ამბიციური გეგმები, რომელიც განათლების სისტემის გაუმჯობესებაზე, ქვეყნის ინფრასტრუქტურის სწრაფ განვითარებაზე, თითოეული მოქალაქის კეთილდღეობაზეა ორიენტირებული.
დღეიდან იწყება აღმშენებლობის სრულიად ახალი ეტაპი საქართველოში და ჩვენ მზად ვართ ქვეყნის წინსვლისთვის გადამწყვეტი ნაბიჯები გადავდგათ.
კიდევ ერთხელ გილოცავთ დემოკრატიის ტესტის ჩაბარებას და ჩვენი ხალხის და ქვეყნის გამარჯვებას“, _ განაცხადა რამდენიმე წუთის წინ სპეციალურად გამართულ ბრიფინგზე გიორგი კვირიკაშვილმა.
