“საქართველომ დენი რუსეთისგან იყიდა და აფხაზეთს ისე მიაწოდა”

ენგურჰესის მიერ გამომუშავებული ელექტროენერგიის 40%, 1998 წელს საქართველოსა და აფხაზეთის დეფაქტო მთავრობებს შორის სიტყვიერი შეთანხმების საფუძელზე, უფასოდ მიაქვს აფხაზეთს, 60% კი  ქართულ მხარეს რჩება. აფხაზური მხარეც არ უარყოფს, რომ დე ფაქტო რესპუბლიკაში ელექტროენერგიის მოხმარება მაღალია – ისინი დღეში 8 მლნ კვტ/სთ ელექტროენერგიას იყენებენ და შესაბამისად, ბოლო წლებთან შედარებით, ელექტროენერგიის მოხმარება, 55%-ით არის გაზრდილი, ზამთარში ეს მაჩვენებელი 100 %-საც აღწევს. ქართული მხარის გადაწყვეტილებით, 15 თებერვლიდან სარემონტო სამუშაოების გამო, ენგურჰესი გაჩერდება და აფხაზეთს ელექტროენერგიის მიწოდება შეუწყდება.

როგორც საქართველოს ენერგეტიკის აკადემიის პრეზიდენტი რევაზ არველაძე აღნიშნავს, აფხაზური მხარე, წლებია, ელექტროენერგიას ჩვენიდან უფასოდ იღებს, დღეს კი დადგა ის დრო, რომ ფხაზურმა მხარემ პირველ რიგში მოლაპარაკება რუსეთთან უნდა აწარმოოს. არველაძის განცხადებით, შარშან გაზაფხულზე,როცა ენგურჰესის წყალსაცავი დაცლილი იყო საქართველომ რუსეთიდან იყიდა და უფასოდ  მიაწოდა ელექტროენერგია აფხაზურ მხარეს.

"აფხაზები ამით კარგად სარგებლობენ. თანაც, საქართველოს ენერგეტიკის სამინისტროსა და აფხაზეთის დე ფაქტო მთავრობას შორის 1998 წელს შედგა სიტყვიერი მოლაპარაკება, რომ ელექტროენერგიის 40% უნდა წაეღო აფხაზეთს და 60% _ საქართველოს. აქამდე ამ 40%-ს წლიურ ჭრილში ასრულებდნენ, ბოლო ორ წელიწადში კი, 40 პროცენტი უკვე 50% გახდა… არ ვიცი, ჩვენი მთავრობა რას გადაწყვეტს, მაგრამ მე მიმაჩნია, რომ საქართველომ აფხაზეთს ელექტროენერგია არ უნდა მიაწოდოს. თორემ გამოდის, რომ ჩვენ უნდა ვიყიდოთ და უფასოდ უნდა მივაწოდოთ. დე ფაქტო რესპუბლიკაში უნდა შეეჩვიონ იმ აზრს, რომ ელექტროენერგია ფული ღირს და უნდა გადაიხადონ. რუსეთი მათ ელექტროენერგიას ისე არ მისცემს, ფული თუ არ გადაიხადეს“, _ აღნიშნავს რევაზ არველაძე bpn-სთან საუბრისას.