შინაგან საქმეთა სამინისტროს ინფორმაციით, რუსთავში, რამდენიმე დღის წინ „იმპექსის“ აფთიაქში მომხდარ ქურდობაში ერთი პირი ფიგურირებს.
როგორც შსს-დ პრესსამსახურში „გურია ნიუსს“ უთხრეს, მედიასაშუალებებით გავრცელებული ინფორმაცია, რომ აფთიაქი რამდენიმე ქალმა გაქურდა, არასწორია.
უწყების ინფორმაციით, ასევე არ არის სწორი გავრცელებული ინფორმაცია იმის შესახებ, რომ ნაქურდალი ნივთების ღირებულება 1000 ლარამდეა. პრესსამსახურში ამბობენ, რომ ქურდობა ერთმა ქალმა ჩაიდინა, აფთიაქიდან წაღებულია შამპუნი და კრემი.
“2017 წლის 12 იანვარს, რუსთავში, „იმპექსის“აფთიაქი გაქურდეს. შეტყობინება ქურდობის შესახებ აფთიაქის თანამშრომლებისგან რუსთავის პოლიციის საქალაქო სამმართველოში მომხდარიდან რამდენიმე დღის შემდეგ, მიმდინარე წლის 19 იანვარს შემოვიდა.
შეტყობინების საფუძველზე, გამოძიება საქართველოს სისხლის სამართლის კოდექსის 177-ე მუხლით დაიწყო, რაც ქურდობას გულისხმობს.
აფთიაქის თანამშრომლების მიერ პოლიციაში გაკეთებული შეტყობინების თანახმად, დაახლოებით, 240 ლარის ღირებულების კრემი და დეოდორანტია მოპარული.
ვიდეოკამერების ჩანაწერიდან დგინდება, რომ აფთიაქში ორი ქალი შევიდა, რომელთაგან ერთმა ქურდობის ფაქტი ჩაიდინა.
ამ ეტაპზე სავარაუდო ბრალდებულის ვინაობის დადგენის და დაკავების მიზნით შესაბამისი ღონისძიებები მიმდინარეობს”- აცხადებენ შსს -ში.
ცნობისთვის, „იმპექსის“ აფთიაქების ქსელის საზოგადოებასთან ურთიერთობის სამსახურის ხელმძღვანელი ლელა ლეჟავა აცხადებს, რომ „რამდენიმე ქალბატონმა აფთიაქიდან სხვადასხვა დასახელების ჰიგიენური საშუალებები მოიპარა“.
„ ამჟამად მიმდინარეობს დათვლა, თუ რა თანხის პროდუქციაა წაღებული. წინასწარი ინფორმაციით, 1000 ლარამდე ღირებულების ჰიგიენური საშუალებები და კრემებია მოპარული,“ _ განაცხადა ლელა ლეჟავამ.
ამავე თემაზე:
