12 აპრილს, ჩოხატაურში, საქართველოს საფეხბურთო ჩემპიონატის რეგიონლიგის მატჩი გაიმართა „ბახმაროსა“ და მაჭახელას შორის.
ტური გადამწყვეტი იყო იმის გამო, რომ არცერთ გუნდს მანამდე წაგებული არ ქონდა და ლიდერობისთვის უშეღავათო ბრძოლა იყო მოსალოდნელი.
მატჩის დასაწყისი გარდამავალი უპირატესობით წარიმართა _ სტუმრები კონტრშეტევებზე თამაშობდნენ და რამდენიმე სახიფათო მომენტიც შექმნეს. მასპინძლები კი, შეტევის დაგვირგვინების დროს შეცდომებს უშვებდნენ და ამიტომაც, პირველი ტაიმი უგოლოდ დასრულდა.
მეორე ტაიმში „ბახმარო“ აშკარად დაეუფლა უპირატესობას, მომრავლდა საგოლე მომენტები „მაჭახელას“ კართან, სტუმრები კი, ბურთის მოგერიებით იყვნენ დაკავებული. აშკარა იყო, რომ მათ ფრეც აძლევდათ ხელს და შედეგის შენარჩუნებას თავდაუზოგავად ცდილობდნენ.
მატჩის მიწურულს, ბახმაროს მთავარმა მწვრთნელმა რამდენიმე შეცვლა გამოიყენა, რასაც ტაქტიკური გადადგილება მოჰყვა _ შედეგად კი „ბახმარომ“ ზეწოლას მოუმატა.
რამდენჯერმე სასწაულებრივად გადარჩა „მაჭახელა“ გაშვებულ გოლს. მატჩის დასრულებამდე წუთი იყო დარჩენილი როცა „ბახმაროს“ ბომბარდირმა გიგა კვერენჩხილაძემ საოცარი გოლი გაიტანა _ ჩაწოდებული ბურთი შეუჩერებლად, ულამაზესი მაკრატელა დარტყმით გაახვია მოწინააღმდეგის კარის ბადეში და მატჩის ბედიც გადაწყვიტა.
1:0 გაიმარჯვა „ბახმარომ“ და მეტოქეები სატურნირო ცხრილში უკვე 5 ქულით ჩამოიტოვა.
ჩოხატაურელთათვის სასურველი ანგარიშით დამთავრდა ტურის სხვა მატჩებიც. ოზურგეთის „მერცხალისა“ და „ზანას“ შეხვედრა ფრედ 1:1 დასრულდა, ასევე ვერ მოიგო ხულოში “ლესიჭინემ” (0:0).
5 ტურის შემდეგ „ბახმარო“ სატურნირო ცხრილს დამაჯერებლად ლიდერობს. თანაც ისე, რომ ჯერ გოლი არ გაუშვია, რაც არამარტო სარეკორდო მაჩვენებელია, არამარტო ამ, არამედ, ყველა ლიგაში.
მომდევნო მატჩს “ბახმარო” 20 აპრილს „საირმესთან“ გამართავს.
