ქრთამის აღების ბრალდებული დაკავებული ქალაქ ოზურგეთის საკრებულოს თავმჯდომარის გელა კობალაძის საქმეზე დღეს წინასასამართლო სხდომა ჩატარდა.
_ წინასასამართლო სხდომა იყო და პრინციპში გადაიდო. მხოლოდ ერთი საკითხი დავაყენეთ, აღმკვეთი ღონისძიების შეცვლას ვითხოვდით, თუმცა, არ დაგვიკმაყოფილეს, _ აღნიშნა ჩვენთან საუბრისას კობალაძის უფლებადამცველმა ხათუნა კეჭაყმაძემ, რომლის თქმით სასამართლო სხდომა 11 მაისს გაიმართება.
შეგახსენებთ, რომ საგამოძიებო უწყების ცნობით, სახელმწიფო უსაფრთხოების სამსახურის ანტიკორუფციული სააგენტოს და სახელმწიფო უსაფრთხოების დეპარტამენტის თანამშრომლებმა, ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად, ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე ქრთამის აღების ფაქტზე დააკავეს.
„გამოძიებამ დაადგინა, რომ 2015-2016 წლებში ქალაქ ოზურგეთის მერიამ შპს „პირამიდას“ საქართველოს ფილიალთან გააფორმა ხელშეკრულებები ქალაქ ოზურგეთის დაზიანებული ქუჩების რეაბილიტაციისა და მდინარე ,,ბჟუჟი“-ს ნაპირსამაგრი სამუშაოების ჩატარებასთან დაკავშირებით.
აღნიშნულმა კომპანიამ ვერ შეძლო ხელშეკრულებებით გათვალისწინებულ ვადაში სამუშაოების დასრულება, რის გამოც, დღის წესრიგში დადგა მასთან ხელშეკრულებების შეწყვეტის საკითხი.
ქალაქ ოზურგეთის საკრებულოს თავმჯდომარე გელა კობალაძე შეხვდა შპს „პირამიდას“ საქართველოს ფილიალის ტექნიკურ მენეჯერს და თავისი თანამდებობის გამოყენებით დაჰპირდა ზემოხსენებული ხელშეკრულებების ვადების გაგრძელებას და უკვე შესრულებულ სამუშაოებზე მისაღები დაახლოებით 150 000 ლარის ჩარიცხვას, რის სანაცვლოდაც ქრთამის სახით მოსთხოვა და აიღო ფულადი თანხა 50 000 ლარის ოდენობით, რა დროსაც იგი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დააკავეს.
გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს ( საქართველოს სისხლის სამართლის კოდექსის 338-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას ვადით 11 – დან 15 წლამდე)“, _ აღნიშნულია უწყების მიერ გავრცელებულ განცხადებაში.
თუმცა, ამ საქმეში ბევრი კითხვის ნიშანია, რომელზეც “გურია ნიუსი” არაერთხელ წერდა _ მათ შორის ყველაზე მნიშნელოვანი ის არის, რომ პროკურატურის მთავარი მოწმე თაღლითობაშია ბრალდებული და მის წინააღმდეგ მტავარ პროკურატურაშ არაერთი განცხადებაა შესული.
ამავე თემაზე: ის, რაც კობალაძის დაკავების ფაქტზე არ უთქვამთ _ რა ჩანაწერები აქვს გამოძიებას
თაღლითობაში ბრალდებული მთავარი მოწმე და ბევრი თეთრი ძაფი კობალაძის საქმეში
რა უთხრა გელა კობალაძემ გამომძიებლებს _ საკრებულოს თავმჯდომარის ოთხტომიანი საქმე
რატომ მოითხოვა გამოძიებამ კადრების ექსპერტიზა _ ახალი დეტალები კობალაძის საქმეში
