რამდენიმე საათის წინ აშშ-ში, ეროვნული საკალათბურთო ასოციაციის ფლეი ოფის პირველი ფინალური შეხვედრა გაიმართა. ზაზა ფაჩულიას „გოლდენ სტეიტმა“ კლუბ „კლივლენდს“ უმასპინძლა და დამაჯერებელი გამარჯვება მოიპოვა – 113:91. საქართველოს ეროვნული გუნდის ცენტრალურმა თავდამსხმელმა მოედანზე 14 წუთი გაატარა და რვა ქულა მიითვალა.
გუშინ ცნობილი გახდა, რომ საქართველოს საფეხბურთო ნაკრების ყოფილი თავკაცი თემურ ქეცბაია ახალი სეზონიდან რუსულ კლუბ „ორენბურგს“ უხელმძღვანელებს. რამდენიმე დღის წინ გუნდმა რუსული პრემიერ ლიგა დატოვა. ქეცბაიას უმთავრეს ამოცანას „ორენბურგის“ უმაღლეს დივიზიონში დაბრუნებაა. საინტერესოა, რომ ამ კლუბში ქართველი თავდამსხმელი ელგუჯა ლობჟანიძე თამაშობს.
დღეს საფრანგეთში მიმდინარე ჩოგბურთელთა „როლან გაროსის“ ტურნირზე მესამე წრის შეხვედრები დაიწყება. ქართველი ნიკოლოზ ბასილაშვილი მრისხანე მეტოქეს – ესპანელ რაფაელ ნადალს დაუპირისპირდება. ორთაბრძოლა თბილისის დროით 15.30 საათზე დაიწყება. ვიტოვებ იმედს რომ ბასილაშვილი მორიგ სასიამოვნო სიურპრიზს შემოგვთავაზებს და ჟილ სიმონისა და ვიქტორ ტროიცკის შემდეგ ესპანელის დამარცხებასაც შეძლებს. ობიექტურად რომ ვიმსჯელოთ ნადალი ქართველს ოსტატობით, ასევე გამოცდილებით აღემატება, მაგრამ მისი საუკეთესო წლები უკან დარჩა. ასე რომ, მიმაჩნია, ქართველი უშანსოდ არ არის და თუ საკუთარ ყველა დადებით საჩოგბურთო თვისებას გამოავლენს კიდევ ერთი გამარჯვების მოპოვებას მოახერხებს.
გუშინ კატალონიური „ბარსელონას“ ახალი მთავარი მწვრთნელის, 53 წლის ერნესტო ვალვერდეს ოფიციალური პრეზენტაცია გაიმართა. ღონისძიება „კამპ ნოუს“ ოფისში ჩატარდა.
რუსული სპორტული მასმედიის მტკიცებით, სანკტ-პეტერბურგის „ზენიტის“ მთავარ მწვრთნელად იტალიელი ფეხბურთის სპეციალისტი რობერტო მანჩინი დაინიშნა. „მანჩესტერ სიტისა“ და მილანის „ინტერის“ ყოფილმა თავკაცმა რუსულ გუნდში რუმინელი მირჩა ლუჩესკუ შეცვალა. მანჩინის კონტრაქტი სამწლიანია და მისი მიზანი რუსეთის ჩემპიონატის მოგება იქნება.
ხვალ ქალაქ კარდიფის „მილენიუმის“ სტადიონზე ევროპის ჩემპიონთა ლიგის ფინალური შეხვედრა გაიმართება. ტურინის „იუვენტუსი“ მადრიდის „რეალს“ დაუპირისპირდება.
გუშინ ცნობილი გახდა, რომ გამარჯვების შემთხვევაში თითოეული იტალიელი ფეხბურთელი კლუბის ხელმძღვანელობისგან პრემიის სახით 350 ათას ევროს მიიღებს. მადრიდის „რეალის“ უფროსობა უფრო „ხელგაშლილი“ აღმოჩნდა და წარმატების შემთხვევაში, საკუთარი გუნდის თითოეულ მოთამაშეს 1.5 მილიონი ევროთი დაასაჩუქრებს.
