ოზურგეთის რაიონულ სასამართლოში ბრალდებულ გ. დ.-ს მიმართ სისხლის სამართლის საქმეზე არსებითი განხილვა და ბრალდების მხარის მიერ გამოკვლეული მასალების მტკიცებულებების გამოქვეყნება მიმდინარეობს.
საქმე ეხება 2017 წლის 12 თებერვალს, ოზურგეთის მუნიციპალიტეტის სოფელ დვაბზუს ცენტრალურ გზაზე მომხდარ ინციდენტს _ ბრალდების მხარის მტკიცებით, გ. დ.-მ ცეცხლსასროლი იარაღის გამოყენებით რამდენიმე სასიკვდილო ჭრილობა მიაყენა “ბახვი -ჰესის” წარმომადგენელს გია კილანავას.
ბრალდებული შსს გურიის პოლიციის დეპარტამენტის თანამშრომლებმა თბილისში დააკავეს.
დაზარალებულ გია კილანავას რამდენიმე მძიმე ოპერაცია ჩაუტარდა, მისი ჯანმრთელობის მდგომარეობა დღესაც უმძიმესია და სამართალდამცავების მიერ მისი დაკითხვა ამ დრომდე ვერ მოხერხდა. შესაბამისად, მას ბრალდებულის წინააღმდეგ ჩვენება არ მიუცია. სამართალდამცავების თქმით, ინციდენტს ჰყავს ერთი თვითმხილველი, სოფელ დვაბზუში მცხოვრები ხ.ტ. და როგორც ბრალდების მხარე აღნიშნავს, სწორედ ის არის მთავარი მოწმე, რომელმაც სასამართლო პროცესზე ბრალდებული გ. გ.-ს წინააღმდეგ ჩვენება უნდა მისცეს.
როგორც “გურია ნიუსთან” დაზარალებული მხარის უფლებების დამცველი ვასილ მამულაშვილი აღნიშნავს, მისი ვარაუდით, მოწმეზე გახორციელდა ფსიქოლოგიური ზეწოლა და ძალადობა ჩვენების მისაცემად.
დღეს, სასამართლოში ჩვენებები მისცეს პოლიციელებმა _ უბნის ინსპექტორების სამმართველოს გამომძიებელმა უჩა ლომჯარიამ და დეტექტივების სამსახურის უფროსმა მიხეილ დარჩიამ.
ორივე მათგანმა სასამართლოზე ისაუბრეს, რომ გ. დ.-მ ცეცხლსასროლი იარაღის გამოყენებით რამდენიმე სასიკვდილო ჭრილობა მიაყენა გია კილანავას და შემთხვევის ადგილიდან მიიმალა. მათივე თქმით, ბრალდებული ორი დღის შემდეგ წავიდა თბილისში, ხოლო ცეცეხლსასროლ იარაღი დაბა ნასაკირალის ერთ-ერთ მოსახვევთან დააგდო.
მიხეილ დარჩიას განცხადებით, როცა სამართალდამცავებმა ბრალდებული თბილისში დააკავეს, ოზურგეთში ტრანსპორტირებისას მან პოლიციელებთან საუბრისას დანაშაული აღიარა, რასაც ისინი ერთერთ მტკიცებულებად მიიჩნევენ.
ვასილ მამულაშვილი, ადვოკატი: “გ. დ.-ს ბრალად ედება სისხლის სამართლის კოდექსით გათვალისწინებული რამდენიმე მუხლი: მკვლელობის მცდელობა, ძალადობა, იარაღის შეძენა-შენახვა. თუმცა, საქმეში არ არის საკმარისი მტკიცებულებები იმისა, რომ ბრალი დადასტურდეს.
ბრალდებული არ აღიარებს დანაშაულს. დაზარალებული დაკითხული არ არის, ბრალდების მხარე ეყრდნობა რაღაც გარკვეული მოწმეების ჩვენებებს, რომლებზეც ჩვენ ვფიქრობთ, რომ გახორციელდა ფსიქოლოგიური ზეწოლა და ძალადობა. აქედან გამომდინარე, ბრალდება არის შეთითხნილი”.
“გურია ნიუსი” დაუკავშირდა დაუკავშირდა ინციდენტის თვითმხილველს, მთავარ მოწმეს ხ.დ.-ს რომელზეც, ბრალდებულის ადვოკატის თქმით, გახორციელდა ზეწოლა ბრალდებულის წინააღმდეგ ჩვენების მისაცემად. მოწმემ „გურია ნიუსთან„ არც უარყო და არც დაადასტურა ინფორმაცია იმის შესახებ, მის მიმართ გახორციელდა თუ არა ზეწოლა და აღნიშნა, რომ ის ამის შესახებ სასამართლოზე ილაპარაკებს: “ყველაფერს ვიტყვი სასამართლოზე,” _ გვითხრა მან.
“გურია ნიუსი” აღნიშნულ თემაზე მუშაობას აგრძელებს.
ამავე თემაზე:
