„ა(ა)იპ -ი არ არის ჭიაყელა, რომელიც გაიწელება და ყველაფერს შეძლებს“, _ აღნიშნა ა(ა)იპ „საგარეო-ეკონომიკური კავშირურთიერთობების, ინვესტიციების, ტრანსპორტის, ტურიზმისა და მეწარმეობის განვითარების ცენტრის ხელმძღვანელმა გელა ზოიძემ აზიური ფაროსანას წინააღმდეგ გასატარებელ ღონისძიებებზე საუბრისას საკრებულოში.
ზოიძის თქმით, შეწამვლის ღონისძიებები სერიოზული ექსცესების გარეშე მიმდინარეობს, თუმცა, აქვე ისიც დასძინა, რომ ამ კუთხით არანაირი ხელშეწყობა არ აქვთ და პროგრამის გახორციელებისას მათ პრობლემას საჭირო ტრანსპორტისა და საწვავის უქონლობა უქმნით.
,,ჩვენ მაქსიმალურად ვცდილობთ, შეწამვლის პროცედურები წარიმართოს მაღალ დონეზე, შესაბამისად, არც გვაქვს სერიოზული ექსცესები, მაგრამ ამასთან, არ გვაქვს არანაირი ფინანსური ხელშეწყობა. ჩვენი მანქანა, რომელიც ემსახურება ამ საქმეს, არის ძალიან ძველი და ხშირად ფუჭდება. ჩვენი თანამშრომლები თავისით ახერხებენ იმას, რომ ვიფუნქციონიროთ, ზოგი საკუთარი ჯიბის ფულით ასხამს საწვავს, ზოგსაც ნისიად ვახერხებთ. უამრავი ფუნქცია აქვს ჩვენს სამსახურს, რასაც კიდევ დამატებით ეს პროგრამა დაემატა, შესაბამისად, თანხებია საჭირო.
ასე ვერ გაგრძელდება, ჩვენ არ ვითხოვთ ხელფასების მომატებას, თუმცა, ესეც პრობლემაა. იმის საშუალება მოგვეცით, რომ ტრანსპორტი იყოს მუშა მდგომარეობაში და საწვავის პრობლემა არ გვქონდეს, რომ ეს შეწამვლის პროცესი ჩავამთავროთ. რამდენჯერ უნდა შევაკეთოთ ნისიად მანქანა, ამ ნისიასაც ხომ უნდა მერე გადახდა. თუ გინდათ, ცენტრმა საქმე გააკეთოს, მოგვხედეთ “, _ ამბობს ზოიძე.
გელა ზოიძის თქმით, აზიური ფაროსანას წინააღმდეგ გასატარებელი ღონისძიებებისთვის, გრანტის სახით გამოყოფილი თანხა მხოლოდ ფართობის შესაწამლად საჭირო მუშახელის ანაზღაურებასა და ჰექტარზე ორ ლიტრ საწვავს ითვალისწინებს, რაც პროგრამის სრულყოფილი გახორციელებისთვის არაა საკმარისი და ხელისუფლების მხრიდან მეტ ხელშეწყობას საჭიროებს.
გამგებლის მოადგილის, ნუგზარ ცინცაძის თქმით, შესაბამისი სამსახურების მხრიდან არის პირობა, რომ ხსენებულ ა(ა)იპ-ის ამ კუთხით დახმარებას აღმოუჩენენ და საჭირო თანხებს გამოუყოფენ.
