„უფასო წამლების“ პროგრამა დაიწყო _ ჯანმრთელობისა და სოციალური დაცვის მინისტრის მოადგილის და სოციალური მომსახურების სააგენტოს დირექტორის ზაზა სოფრომაძის განცხადებით, ამ პროგრამის მეშვეობით, მედიკამენტების მიღება შეუძლია ნებისმიერი ასაკის სოციალურად დაუცველ მოქალაქეს, რომლის ოჯახის სარეიტინგო ქულა განსაზღვრულია 0-დან 100 000-ის ჩათვლით და აქვს შემდეგი ქრონიკული დაავადებები: გულ-სისხლძარღვთა დაავადებები; ფილტვის ქრონიკული დაავადებები; ფარისებრი ჯირკვლის დაავადებები; დიაბეტის ტიპი 2 (არაინსულინდამოკიდებული).
სოფრომაძის ინფორმაციით, მედიკამენტების ყოველი გატანისას. პირი აფთიაქში იხდის გატანილი მედიკამენტების ღირებულების 10%-ს, რომელიც არ აღემატება 1 ლარს, მაგრამ არანაკლებია 5 თეთრზე.
„პირველ ეტაპზე აღნიშნული პროგრამით სარგებლობის საჭიროება დაახლოებით რამდენიმე ასეულობით ათას მოქალაქეს ექნება. პროგრამაში სულ განსაზღვრულია 23 დასახელების მედიკამენტი. 1 ივლისიდან 13 მათგანის მიღება იქნება შესაძლებელი, ყველა დანარჩენი კი ივლისის ბოლომდე გახდება ხელმისაწვდომი”, _ აღნიშნა ზაზა სოფრომაძემ.
მინისტრის მოადგილემ მედიკამენტების ხარისხზეც ისაუბრა _ სატენდერო პირობებში მითითებულია, რომ მედიკამენტებს უნდა გააჩნდეს ჯანდაცვის მსოფლიო ორგანიზაციის მიერ აკრედიტირებული ხარისხის კონტროლის სერტიფიკატი. მედიკამენტებს შორის აბსოლუტური უმეტესობა ევროპული წარმოებისაა და აპრობირებულია საერთაშორისო ფარმაცევტულ ბაზარზე. მწარმოებელი ქვეყნებია: აშშ, საფრანგეთი, გერმანია, იტალია, ესპანეთი, უნგრეთი, პოლონეთი, სლოვაკეთი, ლატვია და ა.შ.
რაც შეეხება პროცედურებს მედიკამენტების მისაღებად _ ბენეფიციარი მიდის ოჯახის (სოფლის) ექიმთან ან ექიმ-სპეციალისტთან, რომელიც უწერს ქრონიკული დაავადების დამადასტურებელ „ფორმა 100“-ს. ექიმი უთითებს დაავადების დადასტურებულ დიაგნოზს და მედიკამენტის დღიურ დოზას; ექიმი წერს რეცეპტს, სადაც მითითებულია მედიკამენტის საერთაშორისო, არაპატენტირებული დასახელება;
ბენეფიციარი, „ფორმა 100“-ით, რეცეპტით და პირადობის დამადასტურებელი მოწმობის დედნით, მიდის სოციალური მომსახურების სააგენტოს უახლოეს განყოფილებაში, სადაც მას არეგისტრირებენ პროგრამაში.
ბენეფიციარმა ან მისმა ნდობით აღჭურვილმა პირმა რეგისტრაციისთვის თან უნდა იქონიოს პირადობის დამადასტურებელი მოწმობა _ დედანი და ცნობა ჯანმრთელობის მდგომარეობის შესახებ (ფორმა N IV -100/ა) _ დედანი. ნდობით აღჭურვილი პირი დამატებით უნდა ფლობდეს საკუთარ პირადობის დამადასტურებელ მოწმობას.
„ფორმა 100“ უნდა მოიცავდეს ქრონიკული დაავადების დადასტურებულ დიაგნოზს (ICD-10), მკურნალობისთვის საჭირო მედიკამენტების სახეობის და დღიური დოზის მითითებით (დღიური დოზის მითითება სავალდებულოა, წინააღმდეგ შემთხვევაში სააგენტო ვერ დაარეგისტრირებს ბენეფიციარს).
რეგისტრაციის შემდეგ, მედიკამენტის მისაღებად, პირი მიმართავს აფთიაქს, სადაც პირადობის დამადასტურებელი მოწმობის და ექიმის (ოჯახის ექიმი, სოფლის ექიმი, ექიმი-სპეციალისტი) მიერ გამოწერილი რეცეპტის საფუძველზე, მიიღებს კუთვნილ მედიკამენტებს.
პირი, აფთიაქიდან მედიკამენტების თითოეული გატანისას, იხდის მომსახურების ღირებულებას, რაც შეადგენს გატანილი მედიკამენტების ღირებულების 10%-ს, მაგრამ არანაკლებ 0,05 (5 თეთრი) ლარისა და არაუმეტეს 1 (ერთი) ლარისა (ღირებულება მრგვალდება მეტობით, თეთრის სიზუსტით), პირი ვერ მიიღებს აღნიშნული თანხის გადახდის დამადასტურებელ სალარო აპარატის ქვითარს (ჩეკი).
პირს შეუძლია ერთ ჯერზე მიიღოს მხოლოდ 3 თვის სამყოფი ოდენობის მედიკამენტი.
იმ შემთხვევაში, თუ პირი ერთ ჯერზე გაიტანს 3 თვის სამყოფ ოდენობაზე ნაკლებ მედიკამენტს, მიღებული მედიკამენტის ოდენობის შესაბამისი ვადის გასვლის შემდეგ, მას შეუძლია განმეორებით მიმართოს აფთიაქს და გაიტანოს მომდევნო 3 თვის ოდენობა.
თუ პირი, მომდევნო სამი თვის მედიკამენტის გასატანად, მიმართავს აფთიაქს 3-თვიანი ვადის ამოწურვამდე, დასაშვებია მედიკამენტის გაცემა, მაგრამ მომართვის პერიოდი შეიძლება იყოს სამთვიანი ვადის ამოწურვამდე არაუადრეს 10 დღისა.
დიაგნოზის ან მედიკამენტის ან დოზის ცვლილების შემთხვევაში, მოსარგებლემ სააგენტოში უნდა წარმოადგინოს განახლებული „ფორმა 100“, რომლის საფუძველზეც გახორციელდება ამ კონკრეტული პირის რეგისტრაციის განახლება.
აფთიაქიდან მედიკამენტის გაცემის მომენტში, თუ შეიცვლება პირის ოჯახზე მინიჭებული სარეიტინგო ქულა და იგი აღემატება 100 000 ერთეულს, იგი ვერ შეძლებს კუთვნილი მედიკამენტების მიღებას, მიუხედავად ელექტრონულ პროგრამაში რეგისტრაციისა.
პირს შეუძლია „ქრონიკული დაავადებების სამკურნალო მედიკამენტებით უზრუნველყოფის პროგრამის“ ფარგლებში შესყიდული მედიკამენტების შესახებ სრულ ინფორმაციას დასახელების, სერიის და მოქმედების ვადის თაობაზე გაეცნოს აფთიაქის საინფორმაციო დაფაზე განთავსებულ ფორმატზე.
თუ არ არის აღნიშნული ინფორმაცია გამოკრული თვალსაჩინო ადგილზე, მაშინ პირს შეუძლია მოსთხოვოს ფარმაცევტს აღნიშნული ინფორმაცია ან დარეკოს საქართველოს შრომის, ჯანმრთელობისა და სოციალური დაცვის სამინისტროს ცხელ ხაზზე 1505.
და კიდევ ერთი მნიშვნელოვანი ფაქტი _ წამლების მიღება ბენეფიციარებს მხოლოდ PSP-ს აფთიაქებში შეუძლიათ, თუმცა, ჩოხატაურში ამ აფთიაქს ფილიალი არ აქვს _ როგორც „გურია ნიუსმა“ გაარკვია, ჩოხატაურელებმა ამ შემთხვევაში შპს „ალიანსი 91“-ის აფთიაქს უნდა მიაკითხოს, რომელიც რუსთაველის #2-ში მდებარეობს და რომელიც PSP-ს პარტნიორია.
