4 ოქტომბერს მსოფლიოში ცხოველების დღე აღინიშნება. ამ დღესთან დაკავშირებით თბილისში, მეტრო „რუსთაველთან“ „საქართველოს ცხოველთა დაცვისა და გადარჩენის საზოგადოებამ“ და საქართველოში მსოფლიო ცხოველთა დღის ამბასადორმა, თეიმურაზ წიქორიძემ, ცხოველების მიმართ სასტიკი ქცევა აქციით გააპროტესტეს.
აქციის ორგანიზატორები და ასევე აქციაზე დასასწრებად მოსული ადამიანები მიიჩნევენ, რომ ცხოველების მიმართ სასტიკი მოპყრობის შესაჩერებლად სისხლის სამართლის 259-ე მუხლში ცვლილებები უნდა შევიდეს.
გარდა ამისა, საზოგადოების ცნობიერება უნდა ამაღლდეს ცხოველებთან დამოკიდებულების შესაცვლელად.
როგორც „გურია ნიუსთან“ საუბარში „საქართველოს ცხოველების დაცვისა და გადარჩენის საზოგადოების“ წევრი, ირაკლი გელიაშვილი აღნიშნავს, ქვეყანაში ცხოველების მიმართ სასტიკი ქცევის ბევრი შემთხვევა ფიქსირდება.
„ორგანიზაცია უკვე რამდენიმე წელია რაც მსგავს აქციებს მართავს. დღევანდელი აქცია მიზნად ისახავს, რომ რაც შეიძლება მეტი ქმედითი ნაბიჯები გადაიდგას ცხოველების მიმართ სისასტიკის წინააღმდეგ. საქართველოში ძალიან ცუდი ვითარებაა. ბევრი ფაქტებია ცხოველების მიმართ სისასტიკის გამოჩენის და ერთ-ერთი მთავარი პრობლემა დახვეწილი კანონის უქონლობაა, რომელიც შეძლებს, რომ ამ პრობლემის წინააღმდეგ რამე გაკეთდეს. როცა არ არსებობს კანონი, რომელიც ამას შეაჩერებს, მაშინ არც არავის აქტივობას აზრი არ აქვს. სისხლის სამართლის კოდექსში 1 კანონია, რომელიც 
არის ამ სისასტიკის წინააღმდეგ, მაგრამ ეს კანონი საჭიროებს დახვეწას, გამკაცრებას და კიდევ არის დასამატებელი რამდენიმე პუნქტი, რომ ამ კანონმა რამე შედეგი გამოიღოს. ამ მიზნით შევქმენით, წიქორიძის ინიციატივით, შევქმენით პეტიცია, ვაგროვებთ ხელმოწერებს, რომელსაც შემდეგ პარლამენტში შევიტანთ. ადრე ცხოველების მიმართ გამოვლენილი სისასტიკის ფაქტების შესახებ ვერ ვიგებდით. ახლა უფრო დაიხვეწა სისტემა და ბევრი ფაქტი გამოჩნდა, ბევრიც არ ჩანს. ხალხის განათლება აუცილებელი არის, რომ შეიცვალოს დამოკიდებულება ცხოველების მიმართ. სკოლებში უნდა იყოს პროგრამები, რომ ბავშვებმა გაითვითცნობიერონ, რომ ცხოველი არ არის არსება, რომელიც ჩვენ გვემსახურება, მაგრამ ამავდროულად აუცილებელია კანონის გამკაცრებაც“, _ამბობს გელიაშვილი.
„საქართველოს ცხოველების დაცვისა და გადარჩენის საზოგადოების“ გამგეობის წევრი, თამარ ჩხეიძე კი აღნიშნავს, რომ საზოგადოების ჰუმანურობა ისევე ვრცელდება ცხოველებზე, როგორც ადამიანებზე.
„ძალიან მნიშვნელოვანია ამ საკითხის პოპულარიზაცია. ბოლო წლებში იმასთან შედარებით, რაც იყო, ხალხის განწყობა და შეგნება ცხოველების მიმართ გაუმჯობესდა, მაგრამ მდგომარეობა კვლავ ძალიან მძიმეა. მნიშვნელოვანია ამ საკითხზე ყურადღების მიპყრობა და რაც მთავარია არსებული კანონმდებლობის შესასრულებლად და გასამკაცრებლად კატეგორიული მოთხოვნილების დაყენება, რადგან არსებული კანონი ძალიან მსუბუქ სანქციებს ითვალისწინებს ცხოველისადმი სასტიკი მოპყრობისათვის. ამიტომ ჩვენი მოთხოვნაა, რომ გამკაცრდეს კანონმდებლობა, ისევე როგორც ეს სხვა ცივილიზირებულ ქვეყნებშია და შეუგნებელ ადამიანებს აღარ ჰქონდეთ დაუსჯელობის სინდრომი, რომ ცხოველის დაჩაგვრა დაუსჯელად შეუძლიათ. 
რაც მეტი ადამიანი შეიგრძნობს რას ნიშნავს ცხოველი და მისი გრძნობები, მით უფრო კარგია ეს ქვეყანაში სამართლიანობის დამკვიდრებისთვის და მარტო ცხოველებისთვის კი არა, თავად ადამიანებისთვის. საზოგადოების ჰუმანურობა ვრცელდება როგორც ადამიანებზე, ისე ცხოველებზე და ამათი გაყოფა ერთმანეთისგან არ შეიძლება“,_ამბობს ჩხეიძე.
ცხოველების მიმართ სისასტიკის წინააღმდეგ გამართულ აქციაზე მოსული ერთ-ერთი მოქალაქე, ლელა მიქაია „გურია ნიუსთან“ საუბრისას აღნიშნავს, რომ ცხოველების მიმართ სისასტიკე რუსთავში ხშირია.
„ აქციაზე იმიტომ მოვედი, რომ ძაღლები უზომოდ მიყვარს. ზოგჯერ ისეთ ფაქტებს ვხედავ რუსთავში, რომ მიკვირს ადამიანები ასეთი სასტიკები როგორ არიან. თუმცა ეს პრობლემა მარტო რუსთავში არ დგას. მქონდა შემთხვევა, როცა ქუთაისში ვიპოვნე ძაღი, რომელსაც ტირის თოფით ჰქონდა გახვრეტილი შუბლი. ვერ დადიოდა. ხერხემალი ჰქონდა დაზიანებული. გამოვიძახე ვეტექიმი, მაგრამ ამაოდ, ძაღლს ვერ ვუშველე. მხოლოდ 2 კვირა იცოცხლა. კანონი უნდა გამკაცრდეს და ყველას დაეკისროს პასუხისმგებლობა“,_ამბობს მიქაია.
როგორც აქციაზე მისული ფსიქოლოგი, გიორგი დონაძე ამბობს, საზოგადოებას ცნობიერების ამაღლება სჭირდება.
„საზოგადოებას უნდა დავანახოთ თუ რამდენად მნიშვნელოვანია დაუცველი ცხოველების დაცვა. მნიშვნელოვანია ასევე ცნობიერების ამაღლება და ჰუმანური მეთოდების დანერგვა ჩვენს ქვეყანაში. ასევე კანონის გამკაცრება იქნება ძალიან მნიშვნელოვანი, რომ ადამიანმა, რომელიც მკაცრად მოექცევა ცხოველს, იცოდეს, რომ შესაბამისი რეაგირება მოხდება და მხოლოდ 250 ლარით არ დაჯარიმდება. გარდა ამისა, ძალიან ბევრი სტერეოტიპია გავრცელებული. მშობლები ხშირად ბავშვებს ცხოველების მიმართ შიშს უნერგავენ, ზოგჯერ გამოთქმებით. ბუნებრივია, როდესაც ადამიანს გეშინია, მით უფრო სურვილი გიჩნდება მას გაერიდო. რა თქმა უნდა უსაფრთხოების ზომები მნიშვნელოვანია, მაგრამ არა ისე გამძაფრებულად, რომ ყველა ცხოველი საშიშ და აგრესიულად ჩაითვალოს, უფრო მეტიც, ზოგჯერ ადამიანები უფრო საშიშები და აგრესიულები არიან ვიდრე ცხოველები“,_ამბობს ფსიქოლოგი.
ამავე თემაზე:
მეტრო „რუსთაველთან“ ცხოველების უფლებადამცველები აქციას მართავენ
