საკონსტიტუციო სასამართლომ რამდენიმე დღის წინ კანაფის ანუ მარიხუანას დეკრიმინალიზაციის შესახებ გადაწყვეტილება მიიღო.
გაეროს ნარკოტიკების მარეგულირებელი კონვენციების თანახმად, კანაფი წარმოადგენს საერთაშორისო კონტროლს დაქვემდებარებულ ნივთიერებას და მისი მოხმარება ხორციელდება შემდეგი ფორმით: მცენარე კანაფი, გამხმარი ფოთლები და წვეროები ყვავილებით; კანაფის ფისი, კანაფის ზეთი და კანაფის ნაყენი (მანაგუა).
ის მედიცინაში სამკურნალო მიზნით გამოიყენება, თუმცა ამავე დროს, ყველაზე ხშირად მოხმარებად უკანონო ნარკოტიკის სახელითაა ცნობილი.
რა არის კანაფი, სახიფათოა თუ არა ჯანმრთელობისთვის მისი სისტემატიური მოხმარება და რა შემთხვევაში ნიშნავენ მას ექიმები სამკურნალოდ_ ამ საკითხებზე „გურია ნიუსს“ მედიცინის მეცნიერებათა დოქტორი, ჯანდაცვის პოლიტიკისა და მართვის სპეციალისტი, სერგო ჩიხლაძე ესაუბრა.
როგორც ის აღნიშნავს, მოსახლეობის ნაწილმა არ იცის რა სხვაობაა ლეგალიზაციასა და დეკრიმინალიზაციას შორის.
„მოსახლეობის ნაწილისთვის არეულია ეს მცნებები. არეულია ლეგალიზაცია და დეკრიმინალიზაცია. დეკრიმინალიზაცია ნიშნავს, რომ მოხმარების გამო ადამიანი ციხეში არ მოხვდება, თუმცა ეს არ ნიშნავს, რომ სრულად არის გათავისუფლებული პასუხისმგებლობისაგან. არსებობს ადმინისტრაციული სასჯელები და ეს არ გულისხმობს ლეგალიზაციას, დავუშვათ გაყიდვაში თავისუფლად ყოფნას, კაფეში მის მოწევას,“_ამბობს ჩიხლაძე.
მისი თქმით, მარიხუანას სისტემატიური მოხმარება ჯანმრთელობისთვის სახიფათოა, განსაკუთრებით კი მოზარდ ასაკში.
„მარიხუანა შეიცავს რამდენიმე ნივთიერებას, რომლებსაც სხვადასხვა სახის მოქმედება ახასიათებს. მან შეიძლება გამოიწვიოს მგრძნობელობის დარღვევა, ჰალუცინაციები, ნერვიული აღგზნება. განსაკუთრებით სახიფათოა მისი მოხმარება მოზარდებში. მათ მიერ კანაფის ხშირი გამოყენება, მახსოვრობის და აღქმის უნარის დაქვეითებით სრულდება. ისინი ნაკლებად ითვისებენ სასწავლო მასალას. ნაკლები აქვთ აკადემიური მოსწრება. ასე რომ მნიშვნელოვანია ასაკი და ასევე ის, თუ რა სიხშირით მოიხმარენ. სისტემატიურმა მოხმარებამ, კი შეიძლება გააჩინოს ჯანმრთელობის კუთხით პრობლემები, კერძოდ, გულ-სიხლძარღვთა სისტემის დაავადებები,“_ამბობს ჩიხლაძე.
მედიცინის მეცნიერებათა დოქტორის თქმით, მარიხუანა სამკურნალოდ ქრონიკული დაავადებების დროს ინიშნება.
„სამედიცინო მოხმარება გულისხმობს როცა ის არის ექიმის მიერ გამოწერილი. მის შემადგენელ კომპონენტებს აქვს სხვადასხვა სახის პარალელური მოქმედების ეფექტი. ის შეიძლება გამოყენებული იყოს მაგალითად, ქრონიკული დაავადებებისას, რომელსაც თან ახლავს უმადობა. აქვს მადის მომატების ეფექტი, გარდა ამისა, ტკივილგამაყუჩებელი ეფექტი სიმსივნური დაავადებების დროს. ამასთანავე, მედიცინაში, მაგალითად, ევროპის ზოგიერთ ქვეყანაში ამ პრეპარატის ფართოდ გამოყენება არ ხდება“,_ამბობს ჩიხლაძე.
მისი თქმით, არსებობს სხვა მედიკამენტები, რითაც მარიხუანას ჩანაცვლება შესაძლებელია.
„უნდა აღვნიშნო, რომ არსებობს სხვა მედიკამენტები, რითიც შეიძლება მარიხუანას ჩანაცვლება. გარდა ამისა, აღსანიშნავია ის, რომ სამკურნალო თვალსაზრისით დანიშნულ მარიხუანას აქვს ტაბლეტის ფორმა და შედარებით ნაკლებად მავნე ეფექტი, ვიდრე მოსაწევს“,_ამბობს ჩიხლაძე.
ამავე თემაზე:
რა შეიძლება გამოიწვიოს მარიხუანას დეკრიმინალიზაციის შესახებ მიღებულმა გადაწყვეტილებამ
