“გურია ნიუსის“ წყაროს ინფორმაციით, ოზურგეთის მუნიციპალიტეტის საკრებულოს საფინანსო-საბიუჯეტო კომისიის თავმჯდომარე გიორგი ჩაგანავა, იურიდიულ საკითხთა კომისიის თავმჯდომარე და მერიის საბიუჯეტო დაგეგმვისა და ანალიზის განყოფილების უფროსი პავლე ჭყონია, ასევე საფინანსო სამსახურის უფროსი გია მამაკაიშვილი რამდენიმე დღის წინ თბილისში, ფინანსთა სამინისტროში იყვნენ დაბარებულები, სადაც განიხილეს ოზურგეთის ბიუჯეტი და ასევე შეეხენ ხელფასების მატების საკითხს. როგორც “გურია ნიუსისთვის“ ხდება ცნობილი, სამინისტროში მათ მოსთხოვეს დასაბუთება, თუ რის საფუძველზე მოიმატეს ხელფასები. თუმცა, აღნიშნული პიროვნებები ამ ფაქტს “გურია ნიუსთან“ საუბრისას არ ადასტურებენ.
იურიდიული საკითხთა კომისიის თავმჯდომარე ეროდი გორდელაძე ამბობს, რომ სამინისტროში საუბარი იყო იმ ზღვარზე, რითაც განსაზღვრულია საჯარო მოხელეების ხელფასის ოდენობა:
_ ჩვენ ზღვრულ ნორმაში ვჯდებით, ამიტომ ჩვენ ეს არ გვეხება.
საფინანსო-საბიუჯეტო კომისიის თავმჯდომარე გია ჩაგანავა ამბობს, რომ მათ ხელფასების ზრდასთან დაკავშირებით ყველაფერი დასაბუთებული აქვთ:
_ ჩვენ ძალიან კარგად გვაქვს დასაბუთებული, უბრალოდ, რეკომენდაციის სახით გვითხრეს, ყველაფერი არის ფაქტიდან გამომდინარე. ორი მუნიციპალიტეტის შერწყმასთან დაკავშირებით, კანონში შესაბამისად იყო ეს სამინისტროში დაბარება. ჩვეულებრივი მუშა პროცესია, განვიხილეთ ბიუჯეტი მთლიანად და არა მხოლოდ ხელფასების კუთხით. გაზრდილი ხელფასები ძალაში რჩება.
ოზურგეთის მუნიციპალიტეტის საკრებულოს თავმჯდომარე დავით დარჩია ამბობს, რომ ის ზუსტ ინფორმაციას არ ფლობს თუ რასთან დაკავშირებით იყვნენ დაბარებული თბილისში საკრებულოს კომისიის თავმჯდომარეები:
_ ვერ გეტყვი, ყოველ შემთხვევში, რომ ჩამოვიდნენ თბილისიდან არ მინახავს არცერთი, რადგან ახლა მე ვარ თბილსში. არ ვფლობ ინფორმაციას. ბიუჯეტის განხილვა იყო და შეეხო შრომის ანაზღაურებასაც _ ეს ჩვეულებრივი თემაა. რაც შეეხება ხელფასების მოკლებას, არა მგონია, არ ვფლობ ინფორმაციას, _ამბობს დარჩია.
_ბატონო დავით, თქვენ არ იყავით დაბარებული?
_ ჩემთან არაფერი საქმე არ ჰქონიათ, ჩემთან რა უნდოდათ.
ოზურგეთის მუნიციპალიტეტის მერის მოადგილე ირაკლი სირაძე:
_ არა მარტო ჩაგანავა, იყვნენ სხვებიც. როგორც მე მაქვს ინფორმაცია, რომ გააცნეს და სხვადასხვა რეკომენდაცია მისცეს, როგორ უნდა დაიგეგმოს ბიუჯეტი, არა მარტო ხელფასების კუთხით.
საბიუჯეტო დაგეგმვისა და ანალიზის განყოფილების უფროსი პავლე ჭყონია განმარტავს, რომ სამინისტროში ბიუჯეტი მუხლობრივად განიხილეს:
_ ხელფასების მატება დასაბუთებული არ არისო, ეს არ არის მართალი. შეხვედრა მთლიანად ეხებოდა ბიუჯეტის მუხლების განხილვას, სადაც შენიშვნა არ ყოფილა. ჩვეულებრივ, მშვიდ რეჟიმში ჩაიარა, რეკომენდაცია არის, რომ თანხები, რომელიც შეიძლება იყოს დაზოგილი, მაქსიმალურად იყოს მიმართული არაფინანსური აქტივების ზრდაზე.
“გურია ნიუსი“ ოზურგეთის მუნიციპალიტეტის ჩინოვნიკების ხელფასების ზრდის შესახებ უკვე წერდა.
