ოზურგეთი მუნიციპალიტეტის მერიაში, „გურია ნიუსის“ წყაროს ინფორმაციით, მალე დამლაგებლებისთვის კონკურსს ჩაატარებენ.
„გურია ნიუსს“ ესაუბრა ერთ-ერთი ქალბატონი, რომელიც შეწუხებულია იმის გამო, რომ მალე დამლაგებლის პოსტიდან გაათავისუფლებენ, გამოცდაზე ჩაჭრის მოტივით.
_ გვითხრეს, რომ მალე გამოცდა უნდა ჩავაბაროთ დამლაგებლებმა. ეს დღემდე არავის მოსვლია აზრად. ახლა კი, ვითომ გამოცდაზე ჩაჭრის პრინციპით, თავიდან მოგვიშორებენ და სანაცნობოში გამოძებნიან „კარგ მეცოცხეს“, რომელიც ოზურგეთის მუნიციპალიტეტის მერიას, გამოცდის წარმატებით ჩაბარების შემთხვევაში, დაგვის. სინამდვილეში ხომ ეს იქეთაა მიმართული, დამლაგებლის ადგილზე მაინც თავისი კანდიდატურა მოიყვანოს მერმა. საჯარო სამსახურის თანამშრომლებს ვერ მოერივნენ და ახლა ხელშეკრულებით აყვანილ დამლაგებლებს დაგვერივნენ. გამოცდა ცოცხის ხელში დაჭერის ხელოვნებაშია თუ სხვა უნარებიც საჭიროა? პურის ფულს ვიღებდი და ახლა, დარწმუნებული ვარ, სახლში გამიშვებენ. ესაა სამართალი? ესაა ქვეყანა? _ გვითხრა ქალბატონმა, რომელიც ამჯერად საკუთარი ვინაობის დასახელებისგან თავს იკავებს. იგი, ასევე, გვთხოვს, ჟურნალისტები საგანგებოდ დაესწრონ გამოცდას „დამლაგებლობაში“ და თუ რაიმე სერიოზული სიახლეა, საზოგადოებას გავაცნოთ.
„გურია ნიუსი“ ოზურგეთის მუნიციპალიტეტის მერიის საზოგადოებასთან ურთიერთობის სამსახურის ხელმძღვანელს, ეკა მგელაძეს დაუკავშირდა და აღნიშნულ საკითხზე კომენტარი სთხოვა. მან კი ასეთი პასუხი მოგვაწოდა:
„საჯარო სამსახურის შესახებ საქართველოს კანონის 38-ე მუხლის პირველი ნაწილის შესაბამისად, პირის შრომითი ხელშეკრულებით საჯარო სამსახურში მიღებისთვის, როგორც წესი, ცხადდება გამარტივებული საჯარო კონკურსი, ბიუროს მიერ, ადმინისტრაციულ ვებგვერდზე. ამ შემთხვევაში, განცხადების წარდგენისთვის განისაზღვრება 10 კალენდარული დღის ვადა, ხოლო გადაწყვეტილებას იღებს უფლებამოსილი პირი მხოლოდ შერჩეულ კანდიდატებთან გასაუბრების საფუძველზე.
რაც შეეხება დამლაგებლებს, ისინი სამსახურში მიიღებიან გასაუბრების წესით. მთავარი კრიტერიუმებია შენობა-ნაგებობების დასუფთავების გამოცდილება და სანდოობა“, _ გვითხრა მგელაძემ.
