საერთაშორისო ურთიერთობების ექსპერტი თორნიკე შარაშენიძე ჟენევის ფორმატის ცვლილებასთან დაკავშირებით ლტოლვილთა და განსახლების მინისტრის სოზარ სუბარის განცხადებას გამოეხმაურა. როგორც შარაშენიძე “გურია ნიუსთან“ საუბრისას აღნიშნავს, ჟენევის დისკუსიების ფორმატში ქვეყნის პირველი პირების ჩართვა საფუძველს მოკლებულია.
,,საქართველოსა და რუსეთს შორის ურთიერთობები მწვავე არ არის. ომი აღარ გვემუქრება და ამაზე მეტი შანსი რაღა გვექნება. სოზარ სუბარს თუ უნდა, რომ დონე ანახოს თვითონ წავიდეს რუსეთში, ამაზე მეტი ამაღლება რა შეიძლება იყოს.
ჟენევის მოლაპარაკებებში რამდენად სერიოზული იქნება პრემიერ-მინისტრის ჩართვა, საკითხავია. პრემიერს თუ ჰგონია, რომ პასუხად პუტინი ჩამოვა, ძალიან ცდება.
ცხედრის გადმოცემა რომ გაუხარდება ადამიანს, ნიშნავს იმას, რომ კატასტროფულ მდგომარეობაში ვართ. ცხედარი მაინც გადმოგვეცითო ეხვეწება პრემიერ-მინისტრი და წერს ისეთ ტექსტს, რაც, ჩემი აზრით, არ უნდა დაეწერა. ეს არის ყველაზე ცუდი.
საინტერესოა, რამდენად სწორად იყო გათვლილი და გაანალიზებული ეს განცხადება, ჯერჯერობით, პასუხი რუსეთიდან საერთოდ არ მოსულა. პასუხი მოვიდა ცხინვალიდან და დაცინვაც, რაც ამ სიტუაციაში სრულიად მოსალოდნელი იყო. როცა გაუაზრებელ განცხადებას აკეთებ, როცა საამისოდ წინასწარ გაკეთებული არაფერი გაქვს, პასუხად მიიღებ დაცინვას, რაც მივიღეთ“, _ განაცხადა ,,გურია ნიუსთან“ საუბრისას შარაშენიძემ.
შეგახსენებთ, ჟენევის დისკუსიების ცვლილებაზე ისაუბრა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა. მისი თქმით, ჟენევის დისკუსიის მოლაპარაკებები ქვეყნის პირველი პირების ჩართვით უნდა წარიმართოს.
,,უნდა ვისაუბროთ ჟენევის ფორმატის ცვლილებაზე, იმიტომ, რომ ჟენევის ფორმატი თავიდანვე მე ვფიქრობ, არაეფექტურად იქნა ჩაფიქრებული თუ გახორციელებული. ქვეყნის პირველი პირების დონეზე იქნებოდა სასურველი“, _ განაცხადა სოზარ სუბარმა.
ცნობისთვის, გასული წლის ბოლოს პარლამენტში მთავრობის დამტკიცების დროს პრემიერ-მინისტრმა გიორგი კვირიკაშვილმა ჟენევის დისკუსიების ფორმატის მინისტრის დონეზე ამაღლების და მასში პირადად ჩართვის მზადყოფნა გამოთქვა.
