“წლებია, რაც საზოგადოების ნაწილის მხრიდან სხვადასხვა პიროვნებების დადანაშაულება ხდება “გურიას” სტადიონის დაშლასთან დაკავშირებით. ამ პრესკონფერენციის მიზანიც სწორედ ისაა, რომ გავერკვეთ, რა მოხდა რეალურად”, _ ამ სიტყვებით დაიწყო პრესკონფერენცია ლანჩხუთის საკრებულოში მოქმედი ოპოზიციური ფრაქციის _ “ლანჩხუთელები ძლიერი თვითმმართველობისთვის” თავმჯდომარემ ლელა ჩახვაძემ და საკითხთან დაკავშირებით, დეტალებზე სასაუბროდ სიტყვა თანაფრაქციელებს გადაულოცა.
სოსო ჩხაიძემ, რომელიც იმ პერიოდში გამგეობის ინფრასტრუქტურის სამსახურის უფროსის პოსტს იკავებდა, ხაზგასმით აღნიშნა, რომ “გურიას” სტადიონის დემონტაჟი 2012 წელს იმ მოტივით მოხდა, რომ მის ნაცვლად ახალი აშენებულიყო:
“არსებობს შესაბამისი პროექტიც, როგორი ტიპის სტადიონის გაკეთება იგეგმებოდა და საამისოდ თანხას ცენტრალური ხელისუფლება გაიღებდა. პირველ ეტაპზე 800 ათასი ლარი ჩამოირიცხა, რაც საპროექტო სამუშაოებზე, გეოლოგიურ გამოკვლევაზე, საინჟინრო-ტექნიკურ კვლევაზე, ტოპოგეოდეზიური ნახაზების შედგენასა და “გურიას” სათადარიგო სტადიონზე გარკვეული ინფრასტრუქტურული სამუშაოებისას დაიხარჯა”, _ აღნიშნა ჩხაიძემ. მისივე თქმით, სტადიონზე სხვადასხვა სამუშაოების შესასრულებლად, მაშინდელმა გამგეობამ ორჯერ გააფორმა ხელშეკრულება შპს “ოქტან-მედეასთან”, რაც შემდგომ ბევრისთვის სალაპარაკო თემა გახდა.
პრესკონფერენციაზე ჩხაიძემ სათანადო დოკუმენტაციაც წარმოადგინა. სწორედ ამ მონაცემების საფუძველზე, ვეცდებით, გავაანალიზოთ რეალურად რა მოხდა, რა გაკეთდა და იყო თუ არა სტადიონის დასავლეთი ტრიბუნა დასანგრევი.
დავიწყოთ იმით, რომ ახალი სტადიონის პროექტი ითვალისწინებდა მხოლოდ აღმოსავლეთის ტრიბუნის არსებული სახით დატოვებას. თავისთავად უნდა დანგრეულიყო ჩრდილოეთი ტრიბუნა, რომელიც ისედაც ავარიულ მდგომარეობაში იყო. რაც შეეხება დასავლეთის მხარეს, იქ არსებული ტრიბუნა, პროექტის თანახმად, უნდა შეცვლილიყო და უფრო პატარა ტევადობის გამხდარიყო, თავისი გადახურვით და ტრიბუნებს ქვემოთ სხვადასხვა ინფრასტრუქტურით.
როგორც თავშივე ითქვა, ზემოთ ხსენებული 800 ათასი ლარის სამუშაოებიდან ძირითადი შპს “ოქტან-მედეამ” შეასრულა, რომელმაც მუნიციპალიტეტის გამგეობასთან სახელმწიფო შესყიდვების შესახებ ორი ხელშეკრულება გააფორმა. პირველი ხელშეკრულება 2012 წლის 7 აგვისტოთი თარიღდება და მისი ღირებულება 240 685 ათას ლარს შეადგენდა. ხელშეკრულების თანახმად, კომპანიას უნდა გაეხორციელებინა სტადიონის დასავლეთ და ჩრდილოეთ ტრიბუნების დემონტაჟი, ასევე, მინდვრის სარწყავი სისტემისა და სატუმბი სადგურის მონტაჟი.
ამავე კომპანიასთან გაფორმებული მეორე ხელშეკრულება იმავე წლის 17 სექტემბრითაა დათარიღებული და სტადიონის კაპიტალური შეკეთების მეორე ეტაპს მოიცავს. აქ სამუშაოების ღირებულება 419 289 ლარითაა განსაზღვრული და როგორც ხელშეკრულების განმარტებით ნაწილში ვკითხულობთ, არსებული მონოლითური რკინა-ბეტონისა და ლითონის კონსტრუქციების დემონტაჟისთვის 27 579 ლარი უნდა დახარჯულიყო, ხოლო ყველაზე დიდი თანხა (308 033 ლარი) სადემონტაჟო და აღდგენით სამუშაოებს უნდა მოხმარებოდა. აქ იგულისხმება შემდეგი სამშენებლო სამუშაოები: აღმოსავლეთ ტრიბუნის ქვეშ კვანძების გაძლიერება, გამყოფი დროებითი ღობის მოწყობა, სალაროსთან, ტაბლოსა და ძველ ადმინისტრაციულ შენობასთან სიცარიელეების შევსება ლითონის ღობით და რკინა-ბეტონის საძირკვლით, ლითონის ღობის მოწყობა გარე პერიმეტრზე, ასევე შიდა ნიშნულებზე, აღმოსავლეთ ტრიბუნის ჩამონგრეული ელემენტების შეკეთება-შეღებვა, ამავე ტრიბუნის მარჯვენა და მარცხენა მოაჯირების მთელ პერიმეტრზე მონტაჟი, ლითონის სადგარების გაწმენდა, აღდგენა და შეღებვა, საჯდომებისთვის ლითონის კონსტრუქციის (“ტრუბაკვადრატების”) მონტაჟი და შეღებვა, აღმოსავლეთ ტრიბუნის იატაკის შეღებვა, სტადიონის მთელ პერიმეტრზე მოაჯირების აღდგენა და შეღებვა, სტადიონზე მწვანე საფარსა და მოაჯირს შორის არსებული მონაკვეთების ღორღით შევსება, პნევმატური მექანიზმით დატკეპვნა და გასწორება, ხელოვნური მწვანე ბალახის დაგება, განათების ანძების დამუშავება და შეღებვა, აღმოსავლეთ ტრიბუნის წინ არსებული ასფალტ-ბეტონის საფარის აყრა და აღდგენა, ტროტუარების დაგება, ძველი ადმინისტრაციული შენობის შეფუთვა ბადით და სხვა კოსმეტიკური სამუშაოები.
თუ ხელშეკრულებით ვიმსჯელებთ, შედარებით სოლიდური თანხები დაიხარჯა ღორღით ტერიტორიის შევსებაში (41 250 ლარი), განათების ანძების შეღებვაში (47 500 ლარი) და ხელოვნური მწვანე ბალახის დაგებაში (31 500 ლარი). რაც შეეხება ხელშეკრულებით ნაკისრ კიდევ 20 ათას ლარამდე თანხას, ამით აღნიშნულ ფირმას სატუმბი სადგური და ავტოსადგომი უნდა მოეწყო.
მოკლედ, შპს “ოქტან-მედეამ” ხელშეკრულებით ნაკისრი ვალდებულებები, ფაქტობრივად, სრულად შეასრულა, გარდა ერთისა _ როგორც პრესკონფერენციაზე კახა ასკურავამ აღნიშნა, რომელიც იმ პერიოდში გამგებლის მოვალეობის შემსრულებელი გახლდათ, ხელშეკრულებით გათვალისწინებული პირობების შესაბამისად, დემონტაჟისგან მიღებული ნარჩენები სამუშაოების მწარმოებელ კომპანიას ობიექტიდან 500 მეტრში უნდა დაესაწყობებინა, რაც რეალურად ასე არ მოხდა.
როგორც ასკურავა ამბობს, მაშინ ყველაფერი გაკეთდა იმისთვის, რომ ეს შემთხვევა რეაგირების გარეშე არ დარჩენილიყო:
“ამ ფაქტთან დაკავშირებით გამგეობაში შემოვიდა შპს “გურია 2000″-ის ხელმძღვანელის წერილი, რომლის საფუძველზე დავიბარე ამ ფირმის წარმომადგენელი (გვარი არ მახსოვს) და მოვთხოვე, უკანონოდ გატანილი მასალა დაებრუნებინა ადგილზე. მან განმიცხადა, რომ ეს მისი ქონება იყო და სადაც უნდოდა, იქ წაიღებდა, მით უმეტეს, რომ ყველაფერი გარკვეული ჰქონდა ამ მხრივ როგორც ძველ, ისე ახალ ხელისუფლებასთან. ამის შემდეგ, გამგეობის იურიდიული სამსახურის უფროსთან ერთად მომზადდა ოფიციალური წერილი და ფაქტის შესახებ პროკურატურას მივმართეთ”, _ ამბობს ასკურავა.
ის, რომ “გურია 2000”-ის ხელმძღვანელის წერილის შემდგომ გამგეობამ წერილობით ჩააყენა საქმის კურსში პროკურატურა, “გურია ნიუსთან” საუბარში ადასტურებს მერიის იურიდიული სამსახურის უფროსი შოთა ჩაგუნავა, რომელიც ასკურავას ხელისუფლებაში ყოფნის პერიოდშიც იგივე მოვალეობას ასრულებდა. ჩაგუნავას თქმით, ამ საკითხთან დაკავშირებით გამოძიებაც მიმდინარეობდა.
პრესკონფერენციაზე სტადიონის კონსტრუქციული კვლევის დასკვნაც წარმოგვიდგინეს, რომელიც 2012 წლის 25 ივნისით თარიღდება და მას ხელს ვინმე თ. ლაზარიაშვილი აწერს. დასკვნაში ვრცლადაა ასახული დასავლეთ ტრიბუნის იმდროინდელი მდგომარეობა, დადებითი და უარყოფითი მხარეები. არადა, დღემდე ბევრი მიიჩნევს, რომ ეს ტრიბუნა არ იყო დასანგრევი და მცირედ შეკეთებას მოითხოვდა მხოლოდ. ზოგიერთებს ისიც აეჭვებთ, რომ ხომ არ მოხდა ამ კონსტრუქციის დანგრევა საკმაოდ დიდი ოდენობის ჯართის მითვისების სანაცვლოდ.
დასკვნაში საუბარია საკმაოდ მნიშვნელოვან ხარვეზებზე, რომლებიც ეჭვქვეშ აყენებს თავის დროზე ნაჩქარევად აშენებული ობიექტის ხარისხს _ აქ ვკითხულობთ, რომ “ჩასხმული ბეტონის ცუდი ხარისხის გამო, რკინა-ბეტონის კონსტრუქციას არ აქვს სათანადო სიმკვრივე, მთლიანად ეროზირებულია გარე ზედაპირები, მუშა არმატურები კოროზირებულია, გრძივი შემკრავი რ/ბ რიგელების პილონებთან შეერთების კვანძები არაა სათანადოდ მოწყობილი, გრძივი შემკრებები რამდენიმე ადგილას შეღუნულია, სუსტად გამოიყურება ლითონის სვეტებისა და შემკრავების შეერთების კვანძები, ცუდადაა დამონტაჟებული ანაკრეფი რ/ბ ფილების ჩარჩოს რიგელებზე და ა.შ.”
დასკვნაში წერია, რომ ნაგებობის მდგრადობის საერთო სურათის შეჯამებისას, ნაგებობა იმყოფება არასაკმარისი მდგრადობის პირობებში და საჭიროებს გაძლიერებითი ღონისძიებების ჩატარებას.
ამ დასკვნიდან გამომდინარე, ჩანს, რომ აღნიშნული ტრიბუნის შეკეთებაც იყო შესაძლებელი და ამიტომ ჩნდება ლოგიკური კითხვა, თუ რატომ დაინგრა დასავლეთის ტრიბუნა. ამ საკითხზე სოსო ჩხაიძე გვპასუხობს, რომ ინფრასტრუქტურის სამინისტრომ აღდგენითი სამუშაოების ნაცვლად ახლის აშენება არჩია: “რადგან არ არსებობდა “გურიას” სტადიონის პროექტი, ვინაიდან თავის დროზე “გურიას” სტადიონი ფორსმაჟორულ ვითარებაში აშენდა, “თბილქალაქპროექტმა” გადაწყვიტა ხელახლა დაეწყო სტადიონის გეოლოგიური კვლევებისა და კონსტრუქციების ხარისხიანობის შესწავლა, რისთვისაც მოწვეული იყვნენ შესაბამისი სპეციალისტები, რომლებმაც დადეს დასკვნა. რაც შეეხება დასავლეთი ტრიბუნის აღდგენას, მას ესაჭიროებოდა დამატებითი რკინის კონსტრუქციებით გამაგრება, მაგრამ ვინაიდან ტრიბუნის ქვემოთ, პროექტის თანახმად, უნდა გაკეთებულიყო გასახდელები, საშხაპეები, სამსაჯო ოთახები, საპრესკონფერენციო დარბაზი და სხვა ინფრასტრუქტურა, ეს კონსტრუქციები კი, ბუნებრივია, ხელს შეუშლიდა ამ ყველაფერს, გადაწყდა ძველის დაშლა და ახალი, რკინის კონსტრუქციის ტრიბუნის აშენება. ეს გადაწყვეტილება ჩვენ არ მიგვიღია და რატომ გვბრალდება ამ ტრიბუნის დაშლა, გაუგებარია”, _ ამბობს ინფრასტრუქტურის სამსახურის ყოფილი უფროსი.
კახა ასკურავას თქმით, გარდა იმისა, რომ არსებობდა შესაბამისი დასკვნა ნაგებობის არამდგრადობასთან დაკავშირებით, გათვალისწინებული იყო რომ “გურიას” სტადიონი უეფას სტანდარტებში ჩამჯდარიყო:
“ეს სტადიონი უნდა გადაკეთებულიყო უეფას სტანდარტების შესაბამისად, რაც ნაცვლად 30 ათასისა, გათვლილი იქნებოდა რვა ათას გულშემატკივარზე და რომც არ ყოფილიყო იქ კოროზიული პროცესები დაწყებული, მისი რეკონსტრუქცია ნებისმიერ შემთხვევაში მოხდებოდა. ეს სტადიონი ისე არ დაშლილა, როგორც დღეს ბევრი ამას ამბობს _ თითქოს ყოფილ გამგებელს მოუნდა და დაშალა. ჩვენი ხელისუფლების პირობებში “გურიას” ახალი სტადიონის მშენებლობა 2013 წლის ბოლოსთვის უნდა დამთავრებულიყო, ინფრასტრუქტურის სამინისტროში საამისოდ სამ მილიონნახევარი ლარიც იყო გამოყოფილი. თუმცა, ხელისუფლების შეცვლის შემდეგ პრიორიტეტები შეიცვალა და ამ თანხას ლობირება სჭირდებოდა. დანამდვილებით ვიცი, რომ ყოფილმა გამგებელმა, გია გოგუაძემ თავის დროზე დაურეკა მაჟორიტარ დეპუტატს, თემურ ჩხაიძეს და სთხოვა, მისულიყო ინფრასტრუქტურის სამინისტროში და ამ საკითხისთვის ყურადღება მიექცია. როგორც ჩანს, ასე არ მოხდა და ეს თანხა შემდეგ წყალტუბომ წაიღო, სადაც ახალი სტადიონი გაკეთდა კიდეც”, _ ამბობს ასკურავა.
თუმცა, ამ საკითხზე გოგუაძესთან სატელეფონო კომუნიკაციას არ ადასტურებს ექსმაჟორიტარი თემურ ჩხაიძე:
“ტყუილია! გოგუაძეს არ დაურეკავს ჩემთვის და არც რამე საუბარი მქონია მასთან. რა უნდა ეთქვა? რაღაც შეალამაზეს ვითომ და სამარცხვინო ღონისძიება გამართეს სტადიონზე”, _ გვითხრა ჩხაიძემ, რომელთანაც იმის გარკვევაც ვცადეთ, დაინტერესდა თუ არა ის, როგორც მაჟორიტარი დეპუტატი და როგორც ყოფილი ფეხბურთელი, “გურიას” სტადიონზე შექმნილი მდგომარეობით და შეეცადა თუ არა არსებული მდგომარეობის გამოსწორებას. თუმცა, ყოფილმა დეპუტატმა ამ საკითხზე კომენტარის გაკეთება არ ისურვა და ტელეფონი გაგვითიშა.
