,,ევროპული საქართველოს“ წევრი გიგა ბოკერია ხელისუფლებას ოთხოზორიას მკვლელობასთან დაკავშირებით არაქმედითუნარიანი ნაბიჯების გადადგმაში სდებს ბრალს. მისი თქმით, დღეს პრემიერ-მინისტრს მორალის წაკითხვის უფლება არ აქვს.
,,ეს ის მთავრობაა, რომელმაც ოთხოზორიას საზარელი მკვლელობის შემდეგ, პრაქტიკულად, არაფერი გააკეთა. კერძოდ, პრემიერ-მინისტრი და მისი გუნდი „ევროპულ საქართველოსთან” მოსმენაზე სრულ ისტერიკაში ჩავარდნენ, როდესაც ეს კითხვა დავუსვით. ეს ტატუნაშვილის მკვლელობამდე იყო.
დღეს პრემიერ-მინისტრი მორალს ნუ გვიკითხავს. მით უმეტეს, პარლამენტის რეზოლუციის შემდეგ, რომელმაც მთავრობას მკაფიო დავალება მისცა, მუშაობა თვითონ და მისმა გუნდა დაიწყოს. მე მათი ეფექტური მუშაობის იმედი არ მაქვს, მაგრამ მაქსიმუმი თუ რამე შეუძლიათ, მათი ღრმა არაკომპეტენტურობის ფონზე, მოვუწოდებ, ახლა მაინც რეალური ნაბიჯები გადადგან“, _ განაცხადა ბოკერიამ.
ფრაქცია ,,ქართული ოცნება- მრეწველების თავმჯდომარის სიმონ ნოზაძის, თქმით, ოპოზიციის წევრის ბრალდებები საფუძველს მოკლებულია და გიგა ბოკერიას უფლება არ აქვს, პრემიერი გიორგი კვირიკაშვილი ამ ფორმით მოიხსენიოს.
,,რეაგირება არ მოუხდენია, რას ჰქვია?! დოკუმენტი, რომელიც ჩვენ შევიმუშავეთ, შევიყვანეთ ტატუნაშვილი-ოთხოზორიას სია. მეორე _ პრემიერის ასე ხსენების უფლება მას ნამდვილად არ აქვს.
მინდა აღვნიშნო, რომ პრემიერის და მთავრობის მხრიდან ყველაფერი გაკეთდა, რომ ტატუნაშვილის ცხედარი გადმოცემოდა ქართულ მხარეს და ახლა უნდა გაგრძელდეს ურთიერთობა ცივილიზებული ფორმით ჩვენს სტრატეგიულ მხარდამჭერ მოკავშირეებთან ერთად. გაცილებით მეტი აქვს ნაკეთები ჩვენს პრემიერს, ბატონ გიორგი კვირიკაშვილს, ვიდრე სხვას ერთად აღებულს“, _ განაცხადა ნოზაძემ „გურია ნიუსთან” საუბრისას.
