ლანჩხუთის მერიაში განათლების, კულტურის, სპორტისა და ახალგაზრდული სამსახურის უფროსის ვაკანტურ თანამდებობაზე რამდენიმე დღის წინ ჩატარებული კონკურსი ჩაიშალა.
მერია სამომავლოდ გასაუბრების ხელახლა გამართვას გეგმავს.
კომისიის ვერდიქტით, კონკურსის ვერცერთმა მონაწილემ ვერ წარმოადგინა კარგად დარგის განვითარებისთვის საკუთარი ხედვა, ვერც კანონების სათანადო ცოდნა გამოავლინეს.
სამსახურის უფროსობის ერთ-ერთი მაძიებლის რომან ბიწაძისთვის, რომელიც წინა მოწვევის საკრებულოში იურიდიულ კომისიას ხელმძღვანელობდა, მსგავსი არგუმენტი ნაკლებად სარწმუნოა. ბიწაძე თვლის, რომ მერია ცდილობს, “მწვანეთა” გამო გამოასწოროს ის ხარვეზი და კანონთან შეუსაბამობა, რასაც თავის დროზე საკონკურსო განაცხადის მიღებისას ჰქონდა ადგილი.
“საკუთარ თავზე არ ვისაუბრებ, მაგრამ თქმა, რომ ნათია ურუშაძე კანონების ცოდნაში ჩაიჭრა, სასაცილოა. უბრალოდ, უნდათ ის კანონდარღვევა გამოასწორონ, რაც განაცხადების მიღებისას დაუშვეს. დარგში მუშაობის გამოცდილება, რასაც კანონი ითხოვდა, მე მქონდა, ჰქონდა ურუშაძეს. სხვებს რა ჰქონდათ ვერაფერს ვიტყვი“, _ ამბობს ბიწაძე და ისევ აპირებს ზემოთ ნახსენები თანამდებობის დასაკავებლად კონკურსში მიიღოს მონაწილეობა, რომელსაც მერია რამდენიმე დღეში გამოაცხადებს.
