დღეს, ოზურგეთის მუნიციპალიტეტის საკრებულოს ფრაქცია „ქართული ოცნება-დემოკრატიული საქართველოს“ სხდომა შედგა, სადაც საბავშვო ბაღებში მიმდინარე პროცესებთან დაკავშირებით ოზურგეთის მუნიციპალიტეტის ბაღების გაერთიანების ხელმძღვანელის ინფორმაცია მოისმინეს.
სკოლამდელი აღზრდის ცენტრის ხელმძღვანელმა მაკა ჭყონიამ ისაუბრა რეორგანიზაციის შემდგომ პერიოდზე, როცა ქალაქის და სოფლების ბაღები კვლავ ერთ გაერთიანებაში მოექცა და დღეისთვის სულ 43 საბავშვო ბაღი ფუნქციონირებს. აქედან 8 _ ქალაქის ტერიტორიაზეა, ხოლო _ 35 სოფლებში.
საბავშვო ბაღებში ხელფასების ზრდასთან დაკავშირებით, მაკა ჭყონიამ განმარტა, რომ აპრილში მოხდება გათანაბრება, რაკი აქამდე ქალაქის ბაღებში მეტი რაოდენობით იყო ხელფასი, ხოლო მაისიდან დაიწყება მატება. თუმცა, კონკრეტულად ვის რა რაოდენობით მოემატება ხელფასი, როგორც მან აღნიშნა, ჯერ დადგენილი არ არის.
_ ვფიქრობთ, ერთჯგუფიანი და ორჯგუფიანი ბაღების მენეჯერების ხელფასები უნდა განსხვავდებოდეს. სოფლის ერთჯგუფიანი ბაღის მენეჯერის ხელფასი 320 ლარია. ასე რომ, 380 ლარიდან მაინც უნდა დაიწყოს ხელფასი და 20-30 ლარით მეტი იყოს, _ თქვა მან.
მან, ასევე, ისაუბრა მაცივრების ტენდერის ჩავარდნის შესახებ, რომელიც თავიდან უნდა გამოცხადდეს. რაც შეეხება ბაღების ავტორიზაციას, მაკა ჭყონიამ თქვა, რომ 2022 წლამდე, 4 წლის განმავლობაში გაგრძელდება და რომელი ბაღებიც მოახერხებენ, ისინი გაივლიან. შემდგომში კი საბავშვო ბაღები ა.ა. იპ ორგანიზაციებად ჩამოყალიბდება.
დეპუტატმა ხათუნა ცერცვაძემ დასვა კითხვა საბავშვო ბაღებში შტატების ზრდის შესახებ. კონკრეტულად, დაენიშნათ თუ არა მენეჯერებს მოადგილეები და ა. შ.
მაკა ჭყონიამ პასუხად თქვა, რომ არცერთ მენეჯერს არ ჰყავს მოადგილე, მხოლოდ გააუქმეს მატერიალურ-ტექნიკური დარგის სპეციალისტის დასახელება.
დეპუტატმა ლალი სიჭინავამ იკითხა, „მატერიალურად პასუხისმგებელი“ რატომ არის უფრო ცუდი სახელი, ვიდრე თანაშემწე და იქვე განმარტა, რომ მნიშვნელოვანი ის კი არ არის, რა სახელს დავარქმევთ, არამედ არის თუ არა ეს კადრი საჭირო? თუ ერთგან ინიშნება, შემდეგ რით ვართ დაზღვეული, რომ სხვაგან არ მოითხოვენ თანაშემწის თუ მოადგილის დანიშვნას? ასე შეიძლება ყველა ბაღის მენეჯერს დაენიშნოს თანაშემწე, _ თქვა მან.
დეპუტატმა მარი ჩხიკვიშვილმა კითხვა დააკონკრეტა და საფინანსო-საბიუჯეტო სამსახურის უფროსს, გია მამაკაიშვილს მიმართა, გაგვარკვიე, ბიუჯეტი თუ გაგვიშვებს იქამდე, რომ ვთქვათ, 28 ბაღმა რომ მოინდომოს მენეჯერის თანაშემწის დანიშვნა, რა უნდა ვქნათო?
გია მამაკაიშვილი: კითხვა ლოგიკურია. 400 ათასი ლარი, რაც ბიუჯეტში ჩავდეთ ბაღებისთვის, ამით ხელფასების მატება ვერ მოხდება, თუ ტენდენცია ასე წავიდა. შტატების მატება თუ მოხდა, ხელფასების მომატება შეუძლებელი გახდება. ვიმეორებ, კითხვა ლოგიკურია, _ თქვა მან.
დეპუტატმა ლელა საჯაიამ კატეგორიულად მოითხოვა ახალი კადრების დამატებისგან თავის შეკავება.
_ ბაღებში კადრების დამატებაზე, ამ სამარცხვინო ხელფასების გაზრდის შემდეგ ვიფიქროთ და ახლა თავი შევიკავოთ. იყო საბავშვო ბაღები და მისი მენეჯერები თანაშემწეების გარეშე და თავს ძალიან კარგად ართმევდნენ საქმეს, _ თქვა მან.
საკრებულოს თავმჯდომარემ, დავით დარჩიამ საკუთარი აზრის გამოთქმა, როგორც რიგითმა დეპუტატმა, ისე ითხოვა და თქვა, რომ მთლიანად ეთანხმება დეპუტატ საჯაიას გამოსვლას.
_სახელმწიფო კიდევ ამისთვის თანხებს ვერ გამოყოფს. კადრების დამატება არაა საჭირო. ხელფასი მოვუმატოთ აღმზრდელებს, თორემ ასე რეფორმა ვერ გახორციელდება, _ თქვა მან.
დეპუტატმა ლავრენტი ბიგვავამ კონკრეტულად მოითხოვა მაკა ჭყონიასგან პასუხის გაცემა:
_ მაინტერესებს, დაემატა თუ არა შტატები საბავშვო ბაღებს?
_ არა, არ დამატებია, _ უპასუხა ჭყონიამ (თუმცა, მან ცოტა ხნით ადრე „გურია ნიუსს“ უთხრა, რომ ბაღების გაერთიანებას 8-10 კადრი დაემატა. ავტ.)
ლავრენტი ბიგვავამ ფაქტის გადამოწმება სთხოვა საფინანსო-საბიუჯეტო კომისიის თავმჯდომარეს, გია მამაკაიშვილს _ მართლა დაემატა თუ არა კადრები სკოლამდელ დაწესებულებებში.
რაც შეეხება დეპუტატების კითხვებს, სამომავლოდ საბავშვო ბაღების ა(ა)იპ ორგანიზაციებად ჩამოყალიბების შემთხვევაში, თუ რა მოუვა სკოლამდელი აღზრდის ცენტრს, მაკა ჭყონიამ უპასუხა, რომ, სავარაუდოდ, ეს ცენტრიც ა(ა)იპ ორგანიზაციად გადაკეთდება. მისი ძირითადი ფუნქცია კი შესყიდვები, ასევე, მონიტორინგის ფუნქციის შესრულება იქნება.
