საქართველოს მთავრობის გასული წლის 24 იანვრით დათარიღებული განკარგულების შესაბამისად, რომელსაც ხელს პრემიერი კვირიკაშვილი აწერდა, გაზიფიცირებისთვის საჭირო სამუშაოები 2017 წელს ლანჩხუთის მუნიციპალიტეტის რამდენიმე სოფელში შესრულდა. ამ ჩამონათვალში მოხვდა ნიგოითის ადმინისტრაციულ ერთეულში შემავალი ხუთივე სოფელი.
ახლა, გაზიფიცირებისთვის საჭირო სამუშაოების შესრულების შემდეგ, ნიგოითის ზონის მოსახლეობისთვის მთავარ პასუხგაუცემელ კითხვად რჩება, როდის მოხდება მათთვის ბუნებრივი აირის მიწოდება.
“სანამ გაზიფიცირების პროექტში ჩაგვსვამდნენ, ჩვენი თემის მოსახლეობამ არაერთხელ გამართა აქცია. გასულ წელს, მთელი ზაფხული მიდიოდა მუშაობა, შემოდგომაზე მილების გაყვანა უკვე დამთავრებული იყო. ვფიქრობდით, რომ წლის ბოლოს ოჯახებში ბუნებრივი აირი გვექნებოდა, მაგრამ იმედები გაგვიცრუვდა. საქმეს ისეთი პირი უჩანს, არც ამ გაზაფხულზე ჩართავენ. ნახევარი წელია, რაც გაზიფიცირებისთვის საჭირო სამუშაოები დასრულდა და უკვე ნათლად უნდა იყოს გარკვეული, როდის ექნება ნიგოითის ზონას ბუნებრივი აირი.
ვის არ დავუსვით ეს კითხვა, მაგრამ კონკრეტული პასუხი, როდის იქნება აირი ჩვენს ზონაში, ვერავისგან მივიღეთ.
მარტო ის, რომ მილები გაიყვანეს, საქმეს არ შველის. გაგვაგებინონ, როდის დასრულდება საბოლოოდ ეს პროცესი და ოჯახებში გაზი როდის გვექნება”, _ ამბობენ “გურია ნიუსთან” საუბრისას ნიგოითის ზონის მაცხოვრებლები და მათთვის ამ უმნიშვნელოვანესი და პრიორიტეტული საკითხით დაინტერესებასა და პრობლემის გადაჭრაში დახმარებას ითხოვენ.
“გურია ნიუსი” სიტუაციაში გასარკვევად ნიგოითის მაჟორიტარ დეპუტატს ზაზა წულაძეს დაუკავშირდა, რომლის თქმითაც, ლანჩხუთის მერია ობიექტს ამ დღეებში ჩაიბარებს:
“თავიდან, სამუშაოების დასრულების შემდეგ იყო გარკვეული ტექნიკური ხარვეზები, რომლებიც გამოსწორდა და მაგისტრალი მზადაა ჩასაბარებლად. ამ დღეებში მერიის შესაბამისი სამსახური ჩაიბარებს ნიგოითის ზონიდან ჯაპანის, ჭყონაგორის და ჩოლობარგის მაგისტრალს. სოფლებში ნიგოითსა და ქვიანში დაზიანებებია და მათი გამოსწორებაც მოხდება. სწორედ ამის შემდეგ მოხდება მოსახლეობის გამრიცხველიანება და მათთვის ბუნებრივი აირის მიწოდება”, _ გვითხრა ზაზა წულაძემ.
