ორგანიზაცია “გირჩის” პრეზიდენტობის კანდიდატმა, ზურა ჯაფარიძემ, გუშინ ღამის კლუბებში ჩატარებული სპეცოპერაციისა და საკუთარი დაკევების შესახებ დღეს საგანგებოდ გამართულ ბრიფინგზე ისაუბრა.
ჯაფარიძის თქმით, დაკავების პროცესში ტელევიზიებს კომენტარს აძლევდა.
„მითხრეს, რომ ვიგინებოდი, მე ვუთხარი, რომ ასე არ იყო. შემდეგ გამახსენდა, რომ როდესაც ტელევიზიებს კომენტარებს ვაძლევდი, ცოტა უცენზურო სიტყვა ვთქვი. ეს რომ ვუთხარი, გაუხარდათ, ჯიგარი ხარ, თვითონ რომ აღიარებო”, – ამბობს ჯაფარიძე.
გირჩის პრეზიდენტობის კანდიდატი 12 მაისს, 05:17 საათზე რუსთაველზე, პარლამენტის ძველი შენობის წინ გამართულ აქციაზე დააკავეს, საიდანაც გლდანი-ნაძალადევის განყოფილებაში გადაიყვანეს. 3-საათიანი თავისუფლების აღკვეთის შემდეგ კი, ადმინისტრაციული სამართალდარღვევის ოქმი შეუდგინეს.
ჯაფარიძის შეფასებით, მისი დაკავების რეალური მიზეზი ის იყო, რომ მისი დაკავების მიზეზი არ ყოფილა ის, რომ რაიმეს აშავებდა.
„თუ ვინმეს აინტერესებს, ჩემი დაკავების რეალური მიზეზი იყო ის, რომ იმ წუთში ვიყავი ერთერთი აქტიური პირი, რომელიც იქ იყო და, უბრალოდ, გამაცილეს ტერიტორიას,” – თქვა ჯაფარიძემ ბრიფინგზე.
საპროტესტო აქციამ, რომელიც კლუბებში, BASSIANI და გალერი, სპეციალური დანიშნულების რაზმის შეჭრას მოჰყვა, დინამოს მიმდებარე ტერიტორიიდან პარლამენტის ძველი შენობის წინ მას შემდეგ გადაინაცვლა, რაც სამართალდამცველებმა მომიტინგეები ძალადობრივი გზებით დაშალეს.
„ის, რაც ვნახეთ ჩვენ ყველამ გუშინ ღამით, თუ როგორ განვითარდა მოვლენები ჯერ ბასიანთან, შემდეგ პარლამენტის ძველი შენობის წინ, იყო წარმოუდგენელი ამბავი. მე მგონი, არავინ ამ ქვეყანაში მსგავს ქმედებას სახელმწიფოს და კონკრეტულად პოლიციის მხრიდან არ ელოდა. გარდა იმისა, რომ ეს არის თავდასხმა კონკრეტულ ბიზნესსექტორზე, გარდა იმისა, რომ პოლიცია მათ მიერ ჩადენილი ქმედებების „გაპრავებას” ცდილობს, თითქოს რეალიზატორები დაიჭირეს, ჩვენ ვნახეთ ძალის გადამეტების კონკრეტული ფაქტები – როგორ ურტყამდნენ ადამიანებს, როგორ ტენიდნენ მანქანაში, მათ შორის, მეც. 900 კამერა მიღებდა და ყველამ ნახა, რომ არაფერი დამიშავებია, უბრალოდ, ვითხოვდი, რომ გამოსულიყო პასუხისმგებელი პირი და დამლაპარაკებოდა,” – ამბობს ჯაფარიძე.
ზურა ჯაფარიძის თქმით, გუშინ ღამით განვითარებული მოვლენების შემდეგ, ყველას გაუქრა ილუზია, რომ შესაძლოა, ოდესმე ქვეყანაში ძალადობრივი ნარკოპოლიტიკა შეიცვალოს:
„გუშინ სახელმწიფომ ძალიან გასაგებად გაგვცა ყველას პასუხი. ვისაც იმედი გვქონდა, რომ ამ ქვეყანაში ნარკოპოლიტიკა ერთხელ და სამუდამოდ შეიცვლებოდა, გვითხრეს არა უბრალოდ „არა”, არამედ გვითხრეს, რომ უფრო ველურები და უფრო თავხედები იქნებიან, ვიდრე ოდესმე ყოფილან. ეს გვანახეს გუშინ ღამით”.
გირჩი მხარს უჭერს დღეს 15:00 საათზე პარლამენტის ძველი შენობის წინ დაგეგმილ აქციას, სახელწოდებით „ჩვენი თავისუფლებისთვის”. ჯაფარიძის შეფასებით, მნიშვნელოვანია, რომ აქციაზე რაც შეიძლება მეტი ადამიანი მოვიდეს.
„რატომ? იმიტომ, რომ სინამდვილეში რაც ახლა ხდება, ეს აღარ არის უკვე ნარკოპოლიტიკის საკითხი, ეს არის ჩვეულებრივი ცივილიზაციური ომი და გასარკვევია კონკრეტული ამბავი – ჩვენ უნდა ვიცხოვროთ გუგული მაღრაძის და ზაქარია ქუცნაშვილის ქვეყანაში, თუ უნდა ვიცხოვროთ ისეთ ქვეყანაში, სადაც ჩვენ ერთად თანაცხოვრება შეგვეძლება. ეს ამბავია გასარკვევი. ამის გარკვევა შეიძლება, მხოლოდ და მხოლოდ, ერთი გზით – უნდა დაინახონ ძალა. უნდა დაინახონ, რომ ამ ქვეყანაში ცხოვრობს ბევრი ადამიანი (და მე იმედი მაქვს, რომ ეს ადამიანები, ძირითადად, ახალგაზრდები არიან), რომელიც ამ ხალხს ეტყვის, რომ ჩვენც ვცხოვრობთ აქ და ეს ქვეყანა ჩვენიცაა. ჩვენ მათ არსად არ ვყრით, მათგან განსხვავებით, არ ვუშლით ხელს ცხოვრებაში, მაგრამ მათაც უნდა გვაცადონ ჩვენ ცხოვრება. მე აქციაზე მისვლას ვაპირებ სწორედ ამ მიზეზით და მგონია, რომ თუ ვინმეს სურს, ეს ქვეყანა როგორმე დაემსგავსოს ცივილიზებულ ქვეყანას, სადაც პოლიციელები ისე არ იქცევიან, როგორც გუშინ ღამით იქცეოდნენ, ყველა მათგანი უნდა დადგეს იქ”, – განაცხადა ზურა ჯაფარიძემ ბრიფინგზე.
