დედაქალაქის მთავრობის სხდომაზე თბილისის მერმა პარკების რეაბილიტაციისა და ახალი პარკების გაშენების შესახებ ისაუბრა.
კალაძის თქმით, დედაქალაქს უახლოეს მომავალში 3 ახალი პარკი შეემატება, გარდა ამისა, წელს 2 პარკის, მომავალ წელს კი 12 დიდი პარკის რეაბილიტაცია გახორციელდება.
დედაქალაქის მერის განცხადებით, რეკრეაციული სივრცის შექმნის მიზნით კვლევა გახორციელდება დიღმის ჭალების ტერიტორიაზე და ასევე თემქის ხევზე.
როგორც კალაძე ამბობს, თემქის ხევის ირგვლივ 80 000-მდე მოსახლეა, ახლოს არის თბილისის ზღვასთან და საპარკე-სარეკრეაციო სივრცის შექმნის თვალსაზრისით, ძალიან დიდი პოტენციალი აქვს.
დედაქალაქის მერი პარკის მოწყობას ასევე გლდანის მეექვსე მიკრორაიონში აპირებს.
„აღნიშნული პარკის პროექტი არსებობდა, თუმცა მასში გარკვეული ხარვეზები იყო. ზოგადად, ქალაქში მწვანე სივრცეების არსებობა უმნიშვნელოვანესია და ჩვენი მხრიდან ყველაფერი გაკეთდება, რომ არსებული ეკოლოგიური მდგომარეობა გავაუმჯობესოთ. მოსახლეობის თანადგომა და მხარდაჭერა ძალიან მნიშვნელოვანი იქნება, რადგან ჩვენ რაღაც მიმართულებებით არაპოპულარული ნაბიჯების გადადგმა მოგვიწევს, მაგრამ ეს ყველაფერი ქალაქის ინტერესებიდან, თითოეული ჩვენგანისა და მომავალი თაობების ჯანმრთელობის ინტერესებიდან გამომდინარე იქნება“,_აცხადებს კალაძე.
თბილისის მერის თქმით, ქალაქში არსებული პარკების მდგომარეობა სახარბიელო არ არის და 12 დიდი პარკის სარებილიტაციო სამუშაოების პროექტების მომზადებას მაია ბითაძეს ავალებს.
„წელს უკვე პროექტები უნდა მომზადდეს და მომავალ წელს, 12-ვე დიდი პარკის სარეაბილიტაციო სამუშაოები დავიწყოთ. ჩვენ ყველაფერი უნდა გავაკეთოთ იმისთვის, რომ პარკების კულტურა დავაბრუნოთ და ადამიანებს შევუქმნათ ისეთი კომფორტი, რომ პარკებში შესვლა სასიამოვნო იყოს. ამას საზოგადოებაც ითხოვს. არსებულ ინფრასტრუქტურას მოწესრიგება სჭირდება. რაც არ გაგვაჩნია, იმ ადგილას ახალი უნდა შევქმნათ“,_აცხადებს კალაძე.
როგორც კალაძე აცხადებს, წელს 2 პარკის რეაბილიტაცია გახორციელდება.
„ეს არის ე.წ. წურწუმიას პარკი, რომელიც აბსოლუტურად ამორტიზებული და მოძველებული იყო. უკვე იწყება ინფრასტრუქტურული სამუშაოები. ასევე, იწყება გოძიაშვილის სახელობის ე.წ. წითელი პარკის სრული რეაბილიტაცია. წლის ბოლოს, თბილისელებს საშუალება ექნებათ, რომ ამ ორი დიდი პარკის განახლებული ფორმით ისარგებლონ“,_აცხადებს კალაძე.
