ხმაური და სიტყვიერი დაპირისპირება იყო ლანჩხუთის საოლქო-საარჩევნო კომისიის სხდომაზე, სადაც საუბნო კომისიების დამოუკიდებელი წევრების არჩევა მიმდინარეობდა. სხდომას გაერთიანებული ოპოზიციის წარმომადგენლებმა უნდობლობა გამოუცხადეს და პროტესტის ნიშნად დატოვეს. მათ შორის იყო ირმა მგელაძე, რომელიც საოლქო საარჩევნო კომისიაში გაერთიანებული ოპოზიციის წარმომადგენელია.
საოლქო კომისიაში განვითარებულ მოვლენებთან დაკავშირებით ოპოზიციის ადგილობრივი შტაბის ლიდერმა კახა ასკურავამ პრესკონფერენციაც გამართა.
„სამწუხაროდ, იმ ადამიანებზე მიწევს საუბარი, რომელთანაც ერთად ბევრი არჩევნები ჩამიტარებია. მათ დღეს კანონის სახელით #61 საარჩევნო ოლქში სრული ფარსი დადგეს. მაგალითად, #1 საარჩევნო უბანზე წარმოდგენილ კანდიდატებს შორის, ირმა ჩხარტიშვილს არანაირი საარჩევნო გამოცდილება არ აქვს, რაც შეეხება თამარ ურუშაძესა და ასმათ ჯორბენაძეს, 2005 წლიდან საარჩევნო ადმინისტრაციაში მუშაობენ. და რა მოხდა საოლქო კომისიის სხდომაზე?! ცხრა ხმა აიღო ირმა ჩხარტიშვილმა, სამი კი ურუშაძემ და ჯორბენაძემ. ანუ გამოცდილების არმქონე კადრს ხმა, ე.წ. დამოუკიდებელმა ოლქის წევრებმა მისცეს.
„ქართულ ოცნებას“ სხვა არაფერი დარჩენია, გარდა ერთისა, რომ სალომე ზურაბიშვილის კანდიდატურა არჩევნების ტოტალურად გაყალბების გზით გაათრიოს. სამწუხაროდ, #61 საარჩევნო ოლქი არის „ქართული ოცნების“ დანამატი და ისინი „ოცნებიდან“ იღებენ დირექტივებს“, _ აღნიშნა ასკურავამ.
ოპოზიციის შტაბის წევრმა გივი ცინცაძემ კონკრეტულ გვარებზე ისაუბრა, რომლებიც მისი თქმით, მითითებებს „ოცნების“ შტაბიდან იღებენ.
„გიგა ნიკოლაიშვილი, რომელსაც „ოცნების“ ხელისუფლებაში მოსვლის შემდეგ აქვს მიღებული ვითომ გამოცდილება. ის 2012 წლიდან იყო კომისიაში და ერთ-ერთი ყველაზე აქტიური წევრია „ქართული ოცნების“. კიდევ ნათია ხიშტოვანი, რომელიც 2006 წლიდან არის ჩართული საარჩევნო კომისიის მუშაობაში, მაგრამ პირდაპირ მიცხადებს, რომ „ქართული ოცნების“ წევრია 2012 წლიდან. კიდევ ვალერი ბუცი, რომელიც ასევე „ოცნების“ აქტიური მხარდამჭერი და აქტივისტია“-აღნიშნა ცინცაძემ, რომელმაც ჩანაწერებიც წარმოადგინა, სადაც ისმის თუ როგორ ადასტურებენ ზემოდასახელებული პირები მასთან საუბარში, რომ დაუკავშირდნენ „ოცნების“ შტაბიდან და თხოვეს საოლქოში განცხადება დაეწერათ., რათა კომისიებში წარმოდგენილი ყოფილიყვნენ როგორც დამოუკიდებელი კანდიდატები.
თუმცა, ოპოზიციის მხრიდან გაჟღერებულ ბრალდებას არ იზიარებს ლანჩხუთის საოლქო კომისიის თავმჯდომარე თამარ ბისიეშვილი, რომლისთვისაც საოლქოს მისამართით გაჟღერებული პრეტენზიები აბსოლუტურად მიუღებელია.
„არავითარი სიები არ არსებობს, საოლქო კომისიამ იმოქმედა საქართველოს ორგანული კანონის შესაბამისად. ექვს რიცხვში დამთავრდა კონკურსში მონაწილეობის მსურველთა რეგისტრაცია, ამის შემდგომი დღეები იმუშავა საოლქო კომისიამ და თითოეულმა მისმა წევრმა დღეს სრულიად დამოუკიდებლად მიიღო გადაწყვეტილება. ვერავითარ შემთხვევაში ვერ გავიზიარებ ასკურავას მხრიდან გაჟღერებულ ბრალდებებს, რომელმაც #1 უბნის წევრის არჩევის შემდეგ დატოვა სხდომა და მერე რა მოხდა საერთოდ არ იცის“, _ გვითხრა ბისიეშვილმა.
