ორი დღეა სოციალურ ქსელში ოზურგეთის ისტორიული მუზეუმის წარმომადგენლები სხვადასხვა პრობლემებზე საუბრობენ. ამჯერად მუზეუმში საჩქაროდ დასაწყებ სარემონტო სამუშაოებზე საუბრობენ და ადგილობრივ ხელისუფლებისგან დახმარებას ითხოვენ.
„იხსნება ფოლკლორის ცენტრი, ძალიან კარგი საქმეა, დიდებული რემონტი გაკეთდა, რეაბილიტაცია მოხდა და უახლოეს დროში ელოდებიან გახსნას. ყველას გვიხარია ეს ფაქტი, მაგრამ, რა ხდება გვერდზე? მუზეუმი შენობას სჭირდება რემონტი. ფოლკლორის ცენტრის სარეაბილიტაციო სამუშაოების დროს დაზიანებული იქნა მუზეუმის შენობა, არის სავალალო მდგომარეობაა, ექსპონატები, რომლთაც არის ცნობილი ჩვენი ოზურგეთი, თანდათანობით ფუჭდება და ესაჭიროება დროულად მიხედვა. ფოტოებსაც ეტყობა, როგორ ანადგურებს ნესტი. ვიცით, რომ ჩასმულია ეს საკითხი, მაგრამ დროულად უნდა მოხდეს ამ პრობლემის მოგვარება“, – ვიდეომიმართვა სოციალურ ქსელში მუზეუმის ერთ–ერთმა თანამშრომელმა ლალი კილაძემ გაავრცელა.
ოზურგეთის ისტორიული მუზეუმის თანამშრომლების თქმით, მუზეუმის შენობის წინა და გვერდით მხარეს მიწაა ასაღები, რათა პირველი სართული სრულად გამოჩნდეს. მათი თქმით, მიწა ანესტიანებს მუზეუმის პირველ სართულზე განთავსებულ ექსპონატებს.
ოზურგეთის მუნიციპალიტეტის მერიაში მუზეუმში განსახორციელებელ სარემონტო სამუშაოების შესახებ ამბობენ, რომ გამოცხადდება ტენდერი და მოხდება შენობის რეკონსტრუქცია.
„ამ ეტაპზე, მუნიციპალური განვითარების ფონდის დაფინანსებით შპს ,,გეო ანალიტიკის“ მიერ მიმდინარეობს ოზურგეთის ისტორიული მუზეუმის სარეაბილიტაციო სამუშაოების საპროექტო-სახარჯთაღრიცხვო დოკუმენტაციის მომზადება, რომლის დასრულების შემდგომაც გამოცხადდება ტენდერი და დაიწყება შენობის სრული რეკონსტრუქცია“.
