თაფლის ღვინო და არაყი უნიკალური პროდუქტებია. ამჯერად თაფლის ღვინოზე ვისაუბრებთ. ის არის ორგვარი: მაგარი, რომელიც 12 გრადუსს ზევითაა და რბილი, რომლის სიმაგრე 12 გრადუსამდეა.
ღვინო შეიძლება იყოს მშრალი, რომელშიც შაქარი 0,5-1,0 პროცენტამდეა და ნახევრად მშრალი ან ტკბილი. თუ შაქრის შემცველობა 1 პროცენტზე მეტია, ნახშირმჟავას შემცველობის მიხედვით არჩევენ ჩვეულებრივ შუშხუნას, შეფერილობით ღია ნათელი ფერისას და მუქი ფერისას.
თაფლის ღვინოს, როგორც მას ძველ საქართველოში ეძახდნენ _ “თაფლუჭას”, ჩვენში ორნაირი წესით ამზადებდნენ და ახლაც ასეა შესაძლებელი.
პირველი _ აუდუღებლად, როდესაც ღვინოს იღებენ, პირდაპირ გადადუღებულ წყალში თაფლის გახსნით და თაფლის ხსნარის ადუღებით. აუდუღებლად თაფლის ღვინის დამზადების დროს, თაფლის შემადგენელი ძვირფასი ნივთიერება დაუშლელად გადადის ღვინის შემადგენლობაში, რაც ძალზე სასარგებლოა ადამიანის ორგანიზმისთვის.
თაფლის მაგარი ღვინის დასამზადებლად იღებენ ერთ წილ წყალს და ერთ ან ორ წილ თაფლს, ხოლო რბილი სუფრის თაფლის ღვინის დასამზადებლად სამ წილ წყალს და ერთ წილ თაფლს.
რბილი სუფრის ღვინის მოსამზადებლად სამი ლიტრი წყალი და ერთი წილი თაფლის ხსნარი 30 გრადუსზე უნდა ვადუღოთ. როცა გაცივდება, სითხის მცირე ნაწილი ავიღოთ, ავურიოთ საფუარი _ თანამედროვე დედო მადუღარა ან ლუდის საფუარი სჯობს. მერე შევურიოთ მასას. მოვათავსოთ ასადუღებლად სპეციალურ ბალონში, ავზში. სახურავი მჭიდროდ არ უნდა დავახუროთ. უმჯობესია, ვიხმაროთ ისეთი კულტურული საფუარები, რომლებსაც ყურძნის ან კენკროვანი ღვინის დასამზადებლად იყენებენ. მასა შეიძლება, ქვევრშიც მოვათავსოთ. დუღილისთვის საჭიროა სითბო, 20 გრადუსს ზემოთ. დუღილი როცა იწყება, ისმის ნელი, ხის ფოთლების ცვენის მსგავსი ხმაური. როცა დუღილი დასრულება, ღვინო უნდა გადავწუროთ. ძირითადად, ეს არის სამკურნალო სითხე და მისით თრობა არაა სასურველი.
დამზადებული ღვინო შევინახოთ +10 გრადუს ტემპერატურაზე. რაც უფრო დიდხანს შევინახავთ, მისი გემოვნება და ბუკეტი თანდათან გაუმჯობესება. უმეტესად თაფლუჭა სადესერტოდ უნდა გამოვიყენოთ _ ის სუფრის ნამდვილი მშვენებაა.
