ლანჩხუთის ქუჩებს წინასაახალწლო სამზადისი უკვე დაეტყო. ქალაქის ცენტრალურ ნაწილში დღითიდღე მატულობს მოვაჭრეთა რაოდენობა; უხვად იყიდება ხილი, ბოსტნეული, თევზეული და სხვა ათასი წვრილმანი. მოსახლეობა საკუთარი ფინანსური შესაძლებლობის ფარგლებში, ცდილობს, სადღესასწაულო სუფრისთვის პროდუქტი წინასწარ მოიმარაგოს.
რა ღირს და არის თუ არა შარშანდელთან შედარებით სიძვირე ბაზრებში, ამის გასარკვევად “გურია ნიუსი” თავად მოვაჭრეებს გაესაუბრა. აღმოჩნდა, რომ ლანჩხუთელი მოვაჭრეები კლიენტის ნაკლებობას უჩივიან, როგორც ბაზარში, ისე ქუჩის ბაზრობებზე.
“15 ლარი ღირს ერთი კილოგრამი ხორცი, ყველს ათ ლარზე იაფად ვერ იყიდი. ახალი წლის მოახლოებასთან ერთად შეიძლება ფასები კიდევ გაიზარდოს.
უფულობა და გაჭირვებაა ხალხში. 400 ლარი მაინცაა საჭირო ნორმალური საახალწლო სუფრა რომ გაშალო ოჯახში, არადა პენსია 180 ლარია მხოლოდ. რას ვიზამთ, საბანი სადამდეც გაგწვდება, იქამდე დაიფარეო, ნათქვამია”, _ ამბობენ ფასების ზრდით შეწუხებული მომხმარებლები.
თუმცა, არიან ისეთებიც, რომლებიც ამბობენ, რომ მათთვის მდგომარეობა ამ კუთხით არ გაუარესებულა:
“შარშანდელთან შედარებით ვერ ვიტყვი, რომ ბაზარში ხილსა და ბოსტნეულზე ფასებმა მოიმატა, მაგრამ ხალხში ფული არაა და მყიდველი შედარებით ნაკლებია. სოფლებში უმუშევარია ხალხი, გასაყიდიც ბევრი არაფერი აქვთ და რა უნდა ქნან? უფულო კაცისთვის 20 თეთრიც კი ძვირია. მანდარინი მაქვს ჩამოტანილი, მთელი დღე ვდგავარ და ძლივს ვყიდი”.
აღმოჩნდა, რომ ლანჩხუთში წინასადღესასწაულო დღეებში შედარებით ძვირად ხორცი და ყველი ფასობს. ერთი კილო საქონლისა და ღორის ხორცის ფასი 14-15 ლარია, სულგუნი 15 ლარი ღირს, სოფლის ყველი კი _ 10 ლარი. გაძვირებულია ნიგოზიც, ე.წ. “კერკეტა” ნიგვზის ფასი15 ლარია, ხოლო ქართული ნიგოზი კილოგრამი 30 ლარამდე ღირს. როგორც თავად გამყიდველები ამბობენ, ფასის გამო, “კერკეტაზე” მეტი მოთხოვნილებაა. ერთი ლიტრი ღვინის ფასი ექვსი ლარია, ხოლო ლიტრი არაყი შვიდი ლარი ღირს.
თევზეულიდან ყველაზე იაფი ქაფშიაა (“ხამსა”) _ იგი 3 ლარი ღირს, ხოლო დანარჩენი სახეობის ნედლი თევზის ფასი კი 7-დან 12 ლარამდეა. მაღაზიებში გაყინული თევზის ფასი 4,5 ლარიდან იწყება.
ბაზრებში შედარებით დაბალი ფასებია ხილსა და ბოსტნეულზე. ერთი კილოგრამი ვაშლის ფასი ერთი ლარიდან იწყება და სამ ლარამდე ადის, ყურძენი ოთხი ლარი ღირს, მანდარინი _ ერთი ლარი. ყველაზე იაფად კომბოსტო, ხახვი და კარტოფილი ფასობს _ 65-70 თეთრი ღირს კილოგრამი.
რაც შეეხება პურს, ლანჩხუთში მასზე სხვადასხვა ფასებია. როგორც ირკვევა, საყოველთაო გაძვირების ფონზე ზოგმა მწარმოებელმა წონაში შეამცირა ნაწარმი, ზოგმა კი ფასს მოუმატა. 80 თეთრის ნაცვლად ერთ ლარზე ავიდა თონის პურის ფასი. თუმცა, როგორც საცხობის მეპატრონეები ამბობენ, ფასის ზრდის მიუხედავად, თონის პურზე მოთხოვნილება არ შემცირებულა და პურის ამ სახეობას მყიდველი მაინც ჰყავს.
ზოგადად, ლანჩხუთში სავაჭრო ობიექტებში პურის რამდენიმე სახეობა იყიდება. შემოდის სამტრედიის, ფოთის და ოზურგეთის პური. თუმცა, ძირითადად, მაღაზიებს ადგილობრივი მეწარმეები ამარაგებენ. ერთ-ერთი შპს “მარგის” დამფუძნებელი აკაკი იმნაიშვილია, რომლის თქმითაც, მის ნაწარმზე, ჯერჯერობით, ფასი არ გაზრდილა.
“ადრინდელი ფასით შემოტანილი ფქვილი გვქონდა და ჯერჯერობით, არც ფასი გაგვიზრდია და არც წონაში შეგვიმცირებია პური, თუმცა, რა იქნება მომავალში, ამას ვერ გეტყვით”, _ ამბობს იმნაიშვილი.
რაც შეეხება საახალწლო სუფრის მთავარ ატრიბუტს _ გოჭსა და ინდაურს, ჯერჯერობით, ბაზარში არ გვხვდება, თუმცა, მოვაჭრეთა თქმით, ინდაურის ფასი 40-დან 70-ლარამდე იქნება:
“შარშან 40-70 ლარს შორის მერყეობდა ინდაურის ფასი. სიდიდის მიხედვითაა ფასები. გააჩნია, როგორი ინდაური იქნება და წონაში რამხელა. სიმართლე რომ გითხრათ, ნაკლებად იყიდება, უჭირს ხალხს. გოჭის ფასი აქამდე 8-9 ლარი იყო და აწი რა იქნება, არ ვიცით. ისე არ გვგონია, დიდი მოთხოვნილება იყოს გოჭზე _ ღორის წელი მოდის და იმიტომ. როგორც წესი, წინასაახალწლოდ პროდუქტებზე ყოველ წელს მოთხოვნილება იმის მიხედვით იცვლება, თუ რის წელი მოდის”.
წინასაახალწლოდ მოვაჭრეთა უმეტესობისთვის წუხილის მთავარი მიზეზი კლიენტის ნაკლებობაა. მყიდველები კი შიშობენ, რომ ახალი წლის მოახლოებასთან ერთად ბაზარში პროდუქტის ღირებულება კიდევ უფრო არ გაიზარდოს.
