სისხლის ბანკის დირექტორი დავით ლოლიაშვილი ჯანდაცვის მინისტრის კრიტიკას ეხმაურება და ამბობს, რომ მინისტრს არასწორი ინფორმაცია მიაწოდეს მათ განცხადებასთან დაკავშირებით. დავით ლოლიაშვილი მზად არის დაინტერესებულ პირებს და მედიას კონკრეტული ციფრები წარუდგინოს, თუ რამდენია გახარჯული და რა რაოდენობის სისხლის მარაგია ამ ეტაპისთვის. მისივე თქმით, ბოლო ერთი კვირის განმავლობაში სისხლის ბანკმა ორჯერ გამოაცხადა, რომ ქვყანაში სისხლის კომპონენტების დეფიციტია:
„გადაამოწმეთ არქივი და ნახავთ, რომ რამდენიმე მედიასაშუალებაში ბოლო ერთი კვირის განმავლობაში ორჯერ გამოვაცხადეთ, რომ ქვყანაში არის სისხლის კომპონენტების დეფიციტი. მე ვერ ვიგებ ეს გაღიზიანება რამ გამოიწვია. ბავშვების ტრავმამ, რა თქმა უნდა, დეფიციტი არ შექმნა. ჩვენ გვქონდა სისხლის კომპონენტები, მივაწოდეთ ყველას, მაგრამ განვაცხადეთ, რომ შეიძლება შეიქმნას დეფიციტი. ეს უბრალოდ დაემთხვა იმას, რომ გუშინ მოხდა უბედური შემთხვევა. ხალხნო, ღმერთმა დაგვიფაროს, ისეთი ბინძურები ვიყოთ, რომ ვიღაცის გამო რაღაცას ვიყენებდეთ. ამას მოწმობს ის, რომ აღნიშნული ინფორმაცია გამოცხადებული გვქონდა მომხდარ ტრაგედიამდე რამდენიმე დღით ადრე და არაერთ მედიასაშულებაში“, _ განაცხადა დავით ლოლიაშვილმა “ინტერპრესნიუსთან” საუბარში.
შეგახსენებთ, რომ გუშინ სისხლის ბანკმა მოქალაქეებს სისხლის ჩაბარებისკენ მოუწოდა. გავრცელებულ ინფორმაციაში ნათქვამი იყო, რომ “დიდ დიღომში მომხდარი ტრაგედიის შემდეგ მათ სისხლით უზრუნველყვეს როგორც იაშვილში გადაყვანილი ბავშვები, ასევე სხვა კლინიკის პაციენტები, რის გამოც, ახლა სისხლის მარაგის რაოდენობა მინიმუმია.”.
ამ განცხადებას ჯანდაცვის მინისტრის კრიტიკა მოჰყვა. დავით სერგეენკომ განაცხადა, რომ სისხლის ბანკი ცდილობს, უბედური შემთხვევა საკუთარი მარკეტინგისთვის გამოიყენოს.
