„არც ეკას, არც ლევანისა და გედის გასვლას სიხარულით არ შევხვედრილვარ და ვფიქრობ, არც არავის გახარებია. ვიცი, რომ ამ დეპუტატის გასვლასთან დაკავშირებით პარტიის შიგნით დიდი წუხილი იყო. ჭკუის დამრიგებლად არ გამოვდგები, მაგრამ მიმაჩნია, რომ სხვაგვარად მოქცევაც შეიძლებოდა. პარტიიდან ყველა რომ გამოვიდეს და თითო-თითო აგური ჩამოანგრიოს არ არის სწორი“, _ აღნიშნა „გურია ნიუსთან“ „ქართული ოცნების“ დეპუტატმა ზაზა პაპუაშვილმა.
მისივე თქმით, „გარეთ და შიგნით სერიის მაყურებელი და მტრულად განწყობილი ადამიანი ძალიან ბევრია. სეირის მაყურებლებს „ქართული ოცნების“ დაშლის ყურების საშუალებას არ მივცემ. რაც შეეხება პარტიის შიგნით მიმდინარე პროცესებს, ვერ ვიტყვი, რომ პროცესები მარტივად მიდის, თუმცა ტრაგიკულს ვერაფერს ვხედავ იმაში, რომ დეპუტატს შორის მძაფრი დაპირისპირებაა, მთავარია, ერთმანეთის მიმართ პატივისცემა არ დავკარგოთ“, _ აღნიშნავს პაპუაშვილი.
ჩვენ დავინტერესდით, ელოდება თუ არა დეპუტატი პარტიიდან გარიცხვას ან თავად თუ აპირებს „ქართული ოცნების“ დატოვებას. პაპუაშვილი კონკრეტული გადაწყვეტილების მიღებამდე სასამართლო სისტემასთან დაკავშირებით პროცესების დასრულებას ელოდება.
“ყოველდღე ისმის კითხვა, აბა, დღეს პარტიას ვინ ტოვებს, რაც მეტ-ნაკლებად მნიშვნელოვანია. ყველაზე მთავარია, როგორ გაიწერება პროცედურები, რა პრინციპით შეირჩევიან მოსამართლეები, როგორ იქნება გათვალისწინებული მათი ბიოგრაფია, როგორ წარედგინება პარლამენტს მოსამართლეების სია და საბოლოო ჯამში, რა შედეგი დაიდება. ახლა ეს არის ჩემი საზრუნავი და საფიქრალი, მინდა, რომ ამ პროცედურებში აქტიური მონაწილეობა მივიღო“, _ ამბობს დეპუტატი.
პაპუაშვილს ვკითხეთ, რას ფიქრობს ირაკლი კობახიძის იმ განცხადებებთან დაკავშირებით, რომლებშიც პარლამენტის თავმჯდომარე ოდიოზურ მოსამართლეებს ექომაგება და ეკა ბესელიას თანამოაზრეებს „ნაციონალურ მოძრაობასთან“ აიგივებს. პაპუაშვილი ამბობს, ირაკლი კობახიძემ საჯარო განცხადებებით გამოსვლის დროს ბევრი შეცდომა დაუშვა.
„გუნდის შიგნითაც ითქვა, რომ ირაკლი კობახიძემ საჯარო გამოსვლაში ბევრი შეცდომა დაუშვა, მან გარკვეულ საკითხებთან დაკავშირებით არასწორი ფორმულირებები გააკეთა, მისი მხრიდან გარკვეული ადამიანების მიმართ შეურაცხმყოფელი განცხადებებიც ისმოდა. ამ მხრივ ბევრი რამ შეიცვლება. ვფიქრობ, პრობლემები მოგვარდება, თუ არ მოგვარდება, ყველა თავის საქციელზე აგებს პასუხს“, _ აღნიშნა პაპუაშვილმა.
