“ქუჩა ნაგავსაყრელად ნუ გვიქციეთ!”

ოზურგეთში, წუწუნავას ქუჩის და ძველი ავტოსადგურის შენობას შორის ტერიტორიაზე, როგორც აქ მცხოვრებლები ამბობენ, დიდი ხანია, ყრიან სამშენებლო ნარჩენებს.    

_ ბეტონისა და აგურის ნამსხვრევებში გაჩნდნენ მორიელები, ბავშვებს სათამაშოდ ვერ ვუშვებთ. სანამ გაგრძელდება ეს ყველაფერი? მოდიან სატვირთო მანქანები, მოაქვთ ამდენი ქვა და ღორღი, სად ანგრევენ ან საიდან მოაქვთ, რომ არ დასრულდა?! იქნებ, გაარკვიოთ რაიმე _ ჩვენ ვერაფერს გავხდით. გავაჩერებთ მანქანებს და მძღოლები გვეუბნებიან, ჩვენ რას გვერჩით, გვავალებენ და მოგვაქვსო. დაგვეხმარეთ, სანამ რაღაც უბედურება მომხდარა, ზაფხულის მერე ყრიან და ყრიან. როდის ექნება დასასრული? _ გვეუბნებიან აქ მცხოვრებლები.

წუწუნავას ქუჩის მცხოვრებლები ამბობენ იმასაც, რომ თუ ეს საკითხი დიდხანს დარჩება გაურკვეველი და ეს ნაგავი, “რატომღაც მყარ ნარჩენებს რომ ეძახიან”, აქედან არ გაიტანეს, ან არ მოასწორებენ, საპროტესტო აქციას გამართავენ.

“გურია ნიუსი” ოზურგეთის სერვისცენტრის უფროსს, თენგიზ ქუტიძეს დაუკავშირდა და პრობლემის შესახებ ესაუბრა:

_ ჩვენ საქმის კურსში ვართ, მაგრამ ეს ტერიტორია არის კერძო მესაკუთრის. ხან ვის ამბობენ და ხან _ ვის. იქნებ, მათ თვითონ გაარკვიონ, ვისი საკუთრებაა მათივე ქუჩაზე მდებარე ადგილი, სადაც მყარ ნარჩენებს ყრიან. როგორ ვიცი, ადგილის ასამაღლებლად ყრიან სამშენებლო ნარჩენებს, _ გვითხრა სერვისცენტრის ხელმძღვანელმა.

როგორც “გურია ნიუსმა” გაარკვია, წუწუნავას ქუჩაზე მდებარე ეს კერძო საკუთრება, ბიზნესმენ გია ანთაძეს ეკუთვნის:

_ აქ ვგეგმავ სასაწყობე შენობის აგებას. მყარი ნარჩენები, რომელიც აქ მიგვაქვს, უნდა მოსწორდეს, რათა ადგილი ამაღლდეს. მალე დავასრულებთ. ცოტა ხნით კი, მოსახლეობას ვთხოვთ, გაგებით მოეკიდონ ამ საქმეს. ნაგავს ნამდვილად არ ვყრით და არც დავყრით, _ გვითხრა მან.