ხმაურის ფონზე წარიმართა ლანჩხუთის საკრებულოს მორიგი სხდომა, რომელსაც მხოლოდ მმართველი გუნდის წევრი დეპუტატები ესწრებოდნენ. მათი მთავარი სამიზნე მუნიციპალიტეტის პირველი პირი, ალექსანდრე სარიშვილი გახდა.
ჯერ კიდევ სხდომის დასაწყისში გააკეთა „ევროპული საქართველოს“ ლანჩხუთელმა ლიდერმა და საკრებულოს წევრმა, ირაკლი მარშანიშვილმა განცხადება, რომ დედაქალაქში მიმდინარე მოვლენების გამო, ის ვერ ხედავდა საკრებულოს სხდომებზე დასწრების აუცილებლობას და თანაპარტიელ ამირან გიგინეიშვილთან ერთად სხდომათა დარბაზიდან გავიდა. ფაქტობრივად, ანალოგიური განცხადება გააკეთა ფრაქცია „ძალა ერთობაშიას“ სახელით „ნაციონალური მოძრაობის“ ლანჩხუთელმა ლიდერმა კახა ასკურავამ და საკრებულოს მუშაობას ბოიკოტი გამოუცხადა.
სხდომაზე ოპოზიციის გარეშე დარჩენილმა მმართველმა გუნდმა კი მერს ისე შეუტია, როგორც არასდროს. ამის მიზეზი ინფრასტრუქტურული საკითხები აღმოჩნდა.
ჯერ ფრაქცია „ქართული ოცნების“ თავმჯდომარის მოადგილემ ციცი ჩხაიძემ ქალაქში საპირფარეშოს პრობლემა გააჟღერა.
„ქალაქის ცენტრში ასფალტის საფარი დაიგო. ახლა რომ გამოჩნდეს ვინმე და თქვას, საპირფარეშოს ვაკეთებო, რა უნდა ქნას, ატეხოს ეს ასფალტი?! ხომ შეიძლებოდა, საკანალიზაციო მილების დაერთება ამ ასფალტის დაგებამდე მომხდარიყო?!“ _ იკითხა ჩხაიძემ.
დეპუტატს მერმა განუმარტა, რომ ქალაქში კანალიზაციის ქსელი, ფაქტობრივად, არ არსებობს და ამ საკითხის მოგვარება საკმაოდ დიდ თანხებს უკავშირდება.
„ლანჩხუთი იმ ქალაქებს შორისაა, სადაც საკანალიზაციო ქსელი თითქმის არ არსებობს, ამას მოგვარება სჭირდება და ეს საკმაოდ დიდ თანხებთანაა დაკავშირებული. როგორც ვიცი, მოსახლემ არსებულ ქსელთან დაერთება რომ მოახდინოს, ათასი ლარი უჯდება, კერძო მეწარმეს კი _ 12 ათასი. ეს სემეკის დადგენილი ტარიფია. ერთ-ერთ მეწარმეს ჰქონდა კიდეც სურვილი, რომ ქალაქში არსებული საპირფარეშო აემოქმედებინა, თუმცა, აღმოჩნდა, რომ, ჯამში, 50 ათასი ლარი უჯდებოდა ყველაფერი. სწორედ ამის გამო მან უარი თქვა _ დანახარჯს მთელი ცხოვრება ვერ ამოვიღებო.
ქალაქში საპირფარეშოს პრობლემა მართლაც უნდა მოგვარდეს, არის ალტერნატივაში საუბარი, რომ ყოფილი პოლიციის შენობასთან გაკეთდეს. ერთად მოვიფიქროთ როგორ იქნება უმჯობესი“, _ თანამშრომლობა შესთავაზა საკითხთან დაკავშირებით ალექსანდრე სარიშვილმა დეპუტატებს.
ქალაქის მაჟორიტარი დეპუტატის, გიგი გვარჯალაძის თქმით, გარდა ტუალეტისა, ქალაქის ტერიტორიაზე მიუსაფარი ძაღლების პრობლემაც საკმაოდ აქტუალურია.
„როგორც მე მაქვს ინფორმაცია, თითო ძაღლზე 86 ლარია გამოყოფილი. არაა ეს ცოტა თანხა. რას ვუკეთებთ ამ ძაღლებს, ვატყავებთ და უკან ვაბრუნებთ? ნახეთ ქალაქში რა შესახედაობის ძაღლები გამოჩნდნენ“, _ აღნიშნა ქალაქის წარმომადგენელმა საკრებულოში, რაზეც მერისგან განმარტებად მიიღო, რომ ძაღლებს უცრიან, “ბირკავენ“ და ისე აბრუნებენ უკან, საიდანაც წაიყვანეს.
პროფესიით ექიმმა დეპუტატმა რეზო კვერენჩხილაძემ კი განმარტა, რომ მხოლოდ აცრა არაა საკმარისი და სამედიცინო დაწესებულებაში ყოველდღიურად მიჰყავთ ქუჩის ძაღლებისგან დაკბენილი ბავშვები.
განსაკუთრებული ხმაური და მერზე შეტევა კი სხდომაზე მაშინ დაიწყო, როცა ჯურუყვეთის ადმინისტრაციული ერთეულის მაჟორიტარმა სპარტაკ კვაჭაძემ მერს კითხვით მიმართა გასული წლის სტიქიის თანხებთან დაკავშირებით. როგორც აღმოჩნდა, დეპუტატები გაცილებით მეტ დაფინანსებას ელოდნენ ამ კუთხით.
„მოსახლეობასთან მაქვს შეხვედრა და მაინტერესებს, რა ვუთხრა მათ 2018 წლის 17 სექტემბრის სტიქიასთან დაკავშირებით. 800 ათასი ლარით დაზარალდა სოფელი, რვა ხიდი დაზიანდა და არც ერთი არაა დაპროექტებული. რატომ ხდება ეს, კითხვები აქვს მოსახლეობას და რა თქმა უნდა, მათზე პასუხები აინტერესებთ“, _ მიმართა მერს ჯურუყვეთის მაჟორიტარმა.
გაცილებით მწვავე კრიტიკის მოსმენა მოუწია მერს საფინანსო კომისიის თავმჯდომარის ალექსანდრე მახათაძისგან, რომელიც თავის დროზე სარიშვილთან საკმაოდ დაახლოებულ კადრად იყო მიჩნეული.
„თუ ადრე კეთდებოდა პროექტები და ხალხი მუშაობდა ამაზე, საინტერესოა, ახლა რა ხდება, რა უშლით მათ ხელს?! ამ მიდგომებით მუნიციპალიტეტი დიდ თანხებს კარგავს. მთავრობა გვეუბნება, გაძლევთ ფულს და გაფინანსებთო. ჩვენ კი პროექტებს ვერ ვაწვდით მათ, რომ მუნიციპალიტეტში რამე გაკეთდეს. თუ არ შეგვიძლია მუშაობა, მაშინ რად გვინდა ამდენი ხალხი ინფრასტრუქტურაში?! ყველაფერს ნუ მათქმევინებთ, აგერ მაქ პრემიერ-მინისტრის განკარგულება, ჩვენ კი უკუღმა ვაკეთებთ. გვაქვს ეჭვი, რომ ვიღაც-ვიღაცებს აწყობთ ან არ აწყობთ ეს ყოველივე“, _ ცხარობდა მახათაძე და მერისგან ეჭვების დაკონკრეტების რჩევაც მიიღო. სარიშვილმა გაცხარებულ დეპუტატს ისიც განუმარტა, რომ ის, რაც სხვა რამის გამოა დაზიანებული, სტიქიას არ უნდა მიაწერონ.
„რას ქვია, ვიღაც-ვიღაცებს აწყობთ ან არ აწყობთ, რა ეჭვებზე საუბრობთ?! თქვით თუ რამე იცით, ნუ მალავთ, დააკონკრეტეთ თქვენი ეჭვები. 40-ზე მეტი ხიდია დაზიანებული, მათი პროექტების გაკეთება ადგილობრივ სამსახურს არ შეუძლია. სტანდარტებია შესაცვლელი. აქ ითქვა ზარალი მეტი იყო და სად არისო. ყველაფერი გვაქვს აღწერილი. ძალიან კარგად ვიცი, რეალურად სად, რა დაზიანდა. როცა ამბობთ, რომ ყველა დაზიანება სტიქიაში შევიტანოთო, არ არის მართებული. სადღაც ხიდი სხვა რამის გამო რომ გამოვიდა მწყობრიდან, ყველა სტიქიაში ხომ არ უნდა ვუჩვენოთ?! მაგალითად, სტიქიის თემაზე შუხუთის მაჟორიტართან მქონდა საუბარი. ითხოვდა, თემში 15-კილომეტრიანი სანიაღვრე არხი გაკეთებულიყო. კამათიც გვქონდა ამ საკითხზე, არ შეიძლება ამხელა არხის გაკეთება, რადგან სტიქია ამ მოცულობის მანძილზე არ ყოფილა“, _ განმარტა მერმა.
სხვა კოლეგებთან შედარებით მწვავე იყო თავის გამოსვლაში ნიგოითის თემის წარმომადგენელი საკრებულოში ზაზა წულაძე. მან მუნიციპალიტეტის პირველ პირსა და ხელისუფლების სხვა ადგილობრივ წარმომადგენლებს მეტი აქტიურობისკენ მოუწოდა.
„ცოტა თუ არ ამოვიქოქეთ, მერე ჩვენ ერთ ადგილას ამოგვქოქავს მოსახლეობა. 10 დაზიანებულ ადგილზე რომ მოვიტან ინფორმაციას, ზემდგომში ერთი ვინმეს ხუშტურების ხასიათზე არ უნდა მიდიოდეს იგი. წარმოვადგინე 10, თუმცა, გადასცეს 5 ან რვა, იქედან კი სამის დაფინანსება ჩამოვიდა. ნიგოითის თემში ჯიხეთის გზის გარდა არაფერი გაკეთებულა. სერიოზული პრობლემებია. ამოიქოქეთ! ეს თქვენც გეხებათ, ბატონო მერო. ზოგმა თბილისში ირბინეთ, ზოგმა _ ადგილებზე“, _ კრიტიკას რჩევაც დაურთო ნიგოითის მაჟორიტარმა.
კრიტიკაზე გადართულმა უმრავლესობის წევრმა დეპუტატებმა კბილი სტიქიის პრევენციის პროგრამასაც გაჰკრეს _ ხალხი დაგვცინის, რა სტიქიის პრევენციაზე ხარჯავთ ფულს, შარშანდელი სტიქია არ გამოგისწორებიათო.
კიდევ ერთმა დეპუტატმა უმრავლესობიდან ამირან ქანთარიამ კი ლანჩხუთი ბანგლადეშს შეადარა: „მოვიდა სანატრელი ზაფხული, ველოდებით ტურისტების ნაკადის ზრდას. ქალაქის ცენტრში უნდა გაიაროს ბევრმა მათგანმა და იცით, რა დროს აჩვენებს ცენტრში მდგარი საათი?! თუ არ იცით გეტყვით, რომ _ ბანგლადეშის. თვეებია გაჩერებულია ეს საათი, პატრონი უნდა ამ ყველაფერს“.
სხდომაზე, რომლის დროის ძირითადი ნაწილი საკანონმდებლო ორგანოს აღმასრულებელ რგოლზე შეტევას დაეთმო, სოფლებში საბავშვო ბაღების მშენებლობაზეც ისაუბრეს. მერის განმარტებით, ხაჯალიისა და სუფსის ბაღებზე ტენდერი 15 ივლისისთვის გამოცხადდება, უახლოეს პერიოდში იგეგმება იგივე აცანის შემთხვევაშიც.
