საპარლამენტო უმრავლესობის წევრი, ჩოხატაურისა და ლანჩხუთის მაჟორიტარი დეპუტატი ნინო წილოსანმა თქვა, რომ საქართველოს პრეზიდენტმა “დაუყონებლივ უნდა დაითხოვოს შეწყალების კომისია”.
შესაბამისი განცხადება წილოსანმა ფეისბუქის საკუთარ გვერდზე გაავრცელა, რომელშიც აღნიშნა, “პრეზიდენტის მიერ ახალგაზრდა ბიჭისა და პოლიციელის მკვლელების შეწყალება” პირადად მისთვის,”გაუგებარი და შეურაცხმყოფელია”.
და ეს ყველაფერი იმ დროს, როცა საქართველოს პრეიზდენტმა შეწყალების კომისია მიმდინარე წლის იანვარში დაითხოვა და ამდენი თვეა სწორედ იმის გარკვევა მიმდინარეობს, რატომ არ არის კომისია, ვისი მითითებით და რა კრიტერიუმებით იწყალებს პატიმრებს ზურაბიშვილი.
წილოსანის ეს პოსტი ფეისბუქის მომხარებლებს უკომენტაროდ არ დაუტოვებიათ და დეპუტატს მალევე შეახსენენს, რომ არარსებული კომისიის გაუქმებას ითხოვდა. სოციალური ქსელის მომხარებელებმა წილოსანს ისიც უთხრეს, რომ ხელფასს ხალხი უხდის და ასეთ საკითხებზე მაინც უნდა ჰქონდეს ინფორმაცია.
“კომისია ამა წლის იანვარში დაითხოვა, რა კომისიაზე წერთ?!” “კომისიაო: რა ტყუილად გიხდით ხელფასს”; “ხო კაი შეეშალა ნუ შეჭამთ ეხლა მთავარია აწი ეცოდინება, რომ კომისია არ არსებობს; ისიც ხეირია რომ პროტესტს გამოთქვამს. სხვები ჩუმად არიან გატრუნულები”; “კაი ეხლა სერიოზულად,რამე შიდა კონკურსი გაქვთ პარლამენტში რომელიც მეგა იდიოტობას იტყვის ის იგებს?”; “გადადგეს შევარდნაძე”; “ესეთ რთულ კითხვებს ნუ უსვამთ ქ-ნ დეპუტატს” _ ამ და სხვა მსგავსი ტიპის კომენტარები წილოსანის კედელზე მრავლადაა, რომელთა ნაწილს დეპუტატამაც უპასუხა:
“სამწუხაროდ, პრეზიდენტის საშტატო განრიგით არ ვინტერესდები, დაითხოვა თუ აიყვანა შემდეგ არ ააქვს მნიშვნელობა. ვინც გაუწია შუამდგომლობა ამ შეწყალებებს იმ ადამიანებს ვგულისხმობ და თავად ეს შეწყალების ფაქტი უფრო მნიშვნელოვანია ვიდრე კომისია! კომისია, ადამიანები, რა მნიშვნელობა აქვს”, _ დაწერა წილოსანმა და პოსტი ჩაასწორა, რომელშიც სიტყვა “კომისია” ბრჭყალში ჩასვა.
“დაუყოვნებლივ უნდა დაითხოვოს ის (კომისია )ადამიანები , რომლის, მსუბუქად რომ ვთქვათ, დაუდევრობითაც მოხდა ეს და აუცილებლად უნდა განხორციელდეს ცვლილება შეწყალების წესის კანონმდებლობაში”, _ წერია დეპუტატის დარედაქტირებულ პოსტში.
თუმცა, ნინო წილოსანს პოსტში ერთი სიტყვის შეცვლამ ვერ უშველა _ სოციალურ ქსელში, როგორც მის, ასევე სხვა კედლებზე ბევრი ადამიანი აკრიტიკებს. ზოგიერთი კი რჩევას აძლევს, რომ სოციალური ქსელი გააუქმოს, რადგან ეს პირველი შემთხვევა არ არის, როცა მისი პოსტები საზოგადოების მხრიდან კრიტიკის ობიექტი გახდა.
თავად ნინო წილოსანი, რომელსაც მის პოსტს მოყოლილი შეფასებების კომენტარი ვთხოვეთ, მხოლოდ იმას ამბობს, რომ “საჩქაროდ უნდა განხორციელდეს ცვლილება შეწყალების წესის კანონდებლობაში”:
“პრეზიდენტის მიერ ახალგაზრდა ბიჭისა და პოლიციელის მკვლელების შეწყალება პირადად ჩემთვის გაუგებარი და შეურაცხმყოფელია. მნიშვნელოვნად მიმაჩნია, რომ საჩქაროდ უნდა განხორციელდეს ცვლილება შეწყალების წესის კანონდებლობაში. შეწყალების დროს საზოგადოებისთვის მაქსიმალურად აღქმადი და გასაგები უნდა იყოს გადადგმული ნაბიჯი, რასაც ამ კონკრეტულ შემთხვევაში ნამდვილად ვერ ვხედავთ.
საზოგადოების აღშფოთება აღნიშნულ საკითხზე სრულიდ სამართლიანია, რადგან შეწყალების აქტი უნდა იყოს გამჭირვალე პროცესის შედეგი და არ უნდა ბადებდეს კითხვებს. ძალიან მნიშვნელოვანია დროულად დაიწყოს საკანონმდებლო პროექტზე მუშაობა ხოლო შემდეგ დროულად დაკომპლექტდეს თავად კომისია მაღალი საზოგადოებრივი ლეგიტიმაციის მქონე პირებით”, _ აღნიშნა წილოსანმა.
