24 სექტემბრისთვის ჩანიშნულ საკრებულოს რიგგარეშე სხდომაზე ლანჩხუთელ დეპუტატებს, დღის წესრიგის შესაბამისად, მხოლოდ ერთ საკითხზე მოუხდათ მსჯელობა. როგორც გაირკვა, მერიის დაკვეთით გამართული ეს სხდომა მხოლოდ მიმდინარე წლის მთავარ საფინანსო დოკუმენტში შესატანი ცვლილების თაობაზე მსჯელობას მოიცავდა.
უნდა აღინიშნოს, რომ მუნიციპალიტეტის 2019 წლის ბიუჯეტში ცვლილების შეტანის თაობაზე ადმინისტრაციული წარმოების დასაწყებად დეპუტატებისგან თანხმობის მიღებამ, რიგ საკითხებში მხოლოდ ოპოზიციის კრიტიკა დაიმსახურა და რამდენიმეწუთიანი მსჯელობის შემდეგ განხილვისთვის კომისიებსა და ფრაქციებში გადაინაცვლა.
დეპუტატების წინაშე განმარტებები ზემოთ ნახსენებ ცვლილებებთან დაკავშირებით მერიის საფინანსო სამსახურის უფროსმა, როლანდ ლაშხიამ გააკეთა. როგორც მისი მოხსენებიდან გაირკვა, მთავრობამ უკვე გამოყო 110 150 ლარი იმედო დუნდუას სახელობის მინისტადიონზე ინფრასტრუქტურული სამუშაოების გასახორციელებლად და სწორედ ეს თანხა უნდა აისახოს ბიუჯეტში.
საფინანსო სამსახურის უფროსმა შიდა მონაცვლეობის ხარჯზე ბიუჯეტში გასახორციელებელ ცვლილებებზეც ისაუბრა. გაირკვა, რომ მერია წარმომადგენლობითი ხარჯების გაზრდას გეგმავს ოთხი ათასი ლარით; ქალთა საფეხბურთო სკოლის დასაფინანსებლად კი ბიუჯეტიდან სამი ათასი ლარი უნდა გამოიყოს. გარდა ამისა, მერიის სოციალური სამსახური გეგმავს მრავალშვილიანი ოჯახების დახმარების პროგრამიდან 10 ათასი ლარი ოპერაციისთვის განკუთვნილ თანხებში გადაამისამართოს.
აღმოჩნდა, რომ დეფიციტური ბიუჯეტი აქვს სპორტულ ცენტრს და აქ დასაქმებულთა ხელფასების სრულად დასაფინანსებლად დამატებით თანხებია საჭირო. როგორც ლაშხიამ განმარტა, წარმოდგენილი ბიუჯეტის ცვლილება სპორტული ცენტრის დაფინანსების 3 100 ლარით გაზრდას ითვალისწინებს. თუმცა, ირკვევა, რომ ეს თანხა სულაც არაა საკმარისი წლის ბოლომდე ცენტრში სახელფასო დეფიციტის აღმოსაფხვრელად.
ბიუჯეტში დაგეგმილ ცვლილებებთან დაკავშირებით კრიტიკული შენიშვნებით საკრებულოს ოპოზიციონერი წევრი კახა ასკურავა აქტიურობდა _ მან რიგ საკითხებთან დაკავშირებით ლაშხიასგან უფრო დეტალური განმარტებები ითხოვა.
დეპუტატი ჯერ მერიის წარმომადგენლობით ხარჯების ოთხი ათასი ლარით გაზრდის აუცილებლობით დაინტერესდა. საფინანსო სამსახურის უფროსი აქ ზოგადი პასუხით შემოიფარგლა და თქვა, რომ ეს თანხა, დარჩენილ დროში, გარკვეული დელეგაციების მიღებას უნდა მოხმარდეს.
ასკურავა იმითაც დაინტერესდა, თუ რამ გამოიწვია სპორტულ ცენტრში სახელფასო დეფიციტი: “თავად სპორტული ცენტრის ხელმძღვანელობას არ ჰქონდა სწორად გათვლილი საბიუჯეტო წელი, შტატების დამატება მოხდა თუ რა?!”
საფინანსო სამსახურის უფროსმა სპორტულ ცენტრში შექმნილი მდგომარეობა, ძირითადად, რამდენიმე თვის წინ ჩატარებულ რეორგანიზაციას დაუკავშირა. თუმცა, არ გამორიცხა, რომ მიზეზი, გარკვეულწილად, ხელმძღვანელობის მხრიდან არასწორი გათვლებიც იყოს. ლაშხიას თქმით, მერიის აუდიტის სამსახური შესულია აქ საქმის შესასწავლად.
დღის წესრიგით გათვალისწინებულ საკითხთან დაკავშირებით გამოთქმული შენიშვნების შემდეგ ასკურავას კრიტიკა საკრებულოს მუშაობის ხარისხსაც მიწვდა.
“მუშაობის ეს რიტმი და მსგავს საკითხებზე რიგგარეშე სხდომების მოწვევა ჩვენს სისუსტეზე მეტყველებს. რიგგარეშე სხდომის მოწვევა, წესით, რაღაც განსაკუთრებულ საკითხებზე უნდა ხდებოდეს. აქ მოსვლასა და სხდომაზე დასწრებაზე არაა საუბარი, უბრალოდ, საკრებულოს მუშაობის ხარისხს ვგულისხმობ”, _ დასძინა ასკურავამ.
ლაშხია-ასკურავას პოლემიკის ამოწურვის შემდეგ ჯერი კენჭისყრაზე მიდგა და დეპუტატებმაც ერთსულოვნად მისცეს დასტური ბიუჯეტში შესატან ცვლილებაზე ადმინისტრაციული წარმოების დაწყებას.
