ჩოხატაურის მუნიციპალიტეტის სოფელ ბუკისციხის მცხოვრები მარინა ცინცაძე დახმარებას ითხოვს.
61 წლის ქალბატონი, რომელსაც ჯანმრთელობის პრობლემები აქვს, გაუსაძლის პირობებში მარტო ცხოვრობს, აქვს ჯანმრთელობის პრობლემები. სოციალური დახმარება წლების წინ მოუხსნეს და პენსია წამლების შესაძენად კი არა, ლუკმა-პურის საშოვნადაც კი არ ჰყოფნის.
მარინა ცინცაძე “გურია ნიუსთან” თავის გასაჭირზე საუბრობს.
“მეუღლე 15 წლის წინ დამეღუპა. შვილი მყავს გათხოვილი, მაგრამ პრობლემები აქვს და ჩემთვის ყურადღების მოქცევა არ შეუძლია. შეშას ძმისშვილი მიტოვებს და როცა შეუძლია, ფინანსურად მეხმარება.
მშობიარობის შემდეგ ჯანმრთელობა გამიუარესდა. ოსტეოართრიტი მაქვს და ერთი კილოგრამი ტვირთის აწევა არ შემიძლია, სახლსაც ძლივს ვალაგებ, გარეთ სიარულში კი ხან მეზობელი მეხმარება, ხან _ ვინ და ხან _ ვინ. ყველაფერი მტკივა. ერთი მხედველობა მივარგოდა და ახლა მასაც ვკარგავ. დამაიმედეს, რომ თვალების ოპერაციას გამიკეთებდნენ, დამაფინანსეს, დაინიშნა ოპერაციის დღეც, მაგრამ მითხრეს, რომ ოპერაცია ჩემი ჯანმრთელობის მდგომარეობის გაუარესებას გამოიწვევს, დაავადება გამირთულდება და აღარ გამიკეთეს. წვეთები დამინიშნეს, სათვალე გამომიწერეს, კიდევ დამატებით წამალი, რომელსაც ვერ შევიძენ, რადგან ფინანსური საშუალება არ მაქვს. თვალების დავსებას ყველაფერი მერჩივნა, თვალებით მაინც გამეხედა ამ ქვეყანაზე”, _ ამბობს მარინა ცინცაძე.
როგორც ქალბატონი მარინა ამბობს, სახლი თავზე ენგრევა, სოციალური დახმარება კი რის საფუძველზე მოუხსნეს, არ იცის:
“სოციალური დახმარება მომიხსნეს, შემდეგ აღმიდგინეს, მაგრამ შემოწმების შედეგად ისევ მომიხსნეს. 4 წელია მოხსნილი მაქვს და რა სიმდიდრე ნახეს ჩემს სახლში, ვერ ვხვდები. ერთხელ შესამოწმებლად რომ მოვიდნენ, ორივე ოთახში იატაკი ჩავარდნილი იყო. ვუთხარი, ყურადღება მომაქციეთ, გველებმა არ დამჭამონ-მეთქი. მიპასუხეს, რომ ჩემი მატერიალური მდგომარეობა არავის აინტერესებს და მაღალი ქულა დამიწერეს. შემდეგ თბილისში ჩავედი, ხელებში ძალა არ მაქვს.
61 წლის ქალი გარეგნულად 80 წლის მოხუცს ვგავარ, შეხვედრა მინდოდა სოციალური სააგენტოს უფროსთან, იქნებ, რომ დამინახავს, შემიცოდოს-მეთქი, მაგრამ არავინ შემიშვა. მითხრეს, ვიზუალური მდგომარეობა არავის აინტერესებსო. ვიზუალური და მატერიალური თუ არ აინტერესებთ, რის საფუძველზე გასცემენ დახმარებას?” _ კითხულობს ქალბატონი მარინა.
ცინცაძე გვიამბობს, რომ “კუხნის” გადასახურად გამგეობის მიერ გამოყოფილი შიფერის დასამაგრებლად საპენსიო სესხი აიღო, შესაბამისად, პენსიას შედარებით ნაკლებს იღებს, ვიდრე ერიცხება.
61 წლის ქალის ყოველდღიურ რაციონს კი კარტოფილი და ჩაი შეადგენს.
“სახლი თავზე მენგრევა. შიფერი მომცეს “კუხნის” გადასახურად, მაგრამ გაკეთება ხომ უნდოდა? საპენსიო სესხი ავიღე, რომ ხელოსნისთვის გადამეხადა. პენსიას 135 ლარს ვიღებ, ისიც უმეტესად გადასახადებში მიდის და ჭამა ხომ მინდა? ჩაის და კარტოფილის მეტს ვერაფერს ვყიდულობ. 3 ძირი მანდარინი მაქვს, მაგრამ იმასაც წელს არ ესხა და ისე დავრჩი. კივი მქონდა 5 ძირი, ისიც მოისპო და მოვჭერი. როცა დახმარება მართლა მჭირდება, არ მეხმარებიან და ძალით ხომ არ მოვიკლავ თავს?!” _ ამბობს ცინცაძე და აღნიშნავს, რომ დახმარების აღდგენის იმედი არ აქვს, მაგრამ თვლის, რომ ცდა ბედის მონახევრეა.
რამდენ ხანში ერთხელ ხდება ქულების გადამოწმება, რას ექცევა ყურადღება ქულების მინიჭებისას, რის საფუძველზე მოხდა ქულების მომატება მარინა ცინცაძისთვის და აქვს თუ არა შესაძლებლობა, რომ კიდევ მიიღოს სოციალურად დაუცველის სტატუსი _ ამის გარკვევას “გურია ნიუსი” სოციალური მომსახურების სააგენტოსთან შეეცადა.
როგორც სოციალური მომსახურების სააგენტოში გვითხრეს, სოციალურად დაუცველი ოჯახების გადამოწმება, დახმარების მიღების თვალსაზრისით, 4 წელში ერთხელ ხდება. გარდა ამისა, გადამოწმება ხდება გარემოების ცვლილების შემთხვევაში, როცა ოჯახის წევრი ემატება, აკლდება, საცხოვრებელ მისამართს იცვლის ან საზღვარს კვეთს 3 თვეზე მეტი ხნის განმავლობაში.
რაც შეეხება მარინა ცინცაძის მდგომარეობას, სოციალური მომსახურების სააგენტოში ადასტურებენ, რომ 2015 წლიდან ის სოციალურ შემწეობას აღარ იღებს, უახლოეს დღეებში კი, ახლად აღმოჩენილი გარემოებების გამო, ხელახლა მოხდება მისი სოციალურ-ეკონომიკური მდგომარეობის შესწავლა-შეფასება და მიენიჭება ახალი სარეიტინგო ქულა.
თუმცა, რა ცვლილებებს ეხება საქმე, რამ განაპირობა გასაჭირში მყოფი მარტოხელა ქალბატონის მდგომარეობის ცვლილება, რის გამოც სარეიტინგო ქულები მოემატა, სააგენტოში ვერ გვეუბნებიან.
“ეს ოჯახი 2015 წლის შემდეგ აღარ არის სოციალური შემწეობის მიმღები. მარინა ცინცაძე არის არა მომუშავე პენსიონერი, აქვს ჯანმრთელობის პრობლემები, იღებს სახელმწიფო პენსიას 200 ლარის ოდენობით, აქვს საცხოვრებელი სახლი, რომელიც შედგება სამი ოთახისგან. უფიქსირდება მაღალი კომუნალური გადასახადი ელექტროენერგიაზე. ახლად აღმოჩენილი გარემოებების გამო, დღეის მდგომარეობით, ეს ოჯახი არის გადამოწმებაში, უახლოეს დღეებში ხელახლა მოხდება მისი ოჯახის სოციალურ-ეკონიმიკური მდგომარეობის შესწავლა-შეფასება და მიენიჭება ახალი სარეიტინგო ქულა”, _ გვითხრეს სოციალური მომსახურების სააგენტოში.
