ათეული წლებია, ლანჩხუთში საკოლმეურნეო ბაზრის პრობლემაა. ადგილი, სადაც ადრე მსგავსი ტიპის ბაზრობა ეწყობოდა, ქალაქის ცენტრიდან მოშორებით, რკინიგზის სადგურის მახლობლადაა და ბოლო წლებია, მხოლოდ კვირა დღით იტვირთება, დანარჩენ დღეებში კი უფუნქციოდაა. მართალია, ქალაქის რამდენიმე ლოკაციაზე პატარ-პატარა ფართები არსებობს, სადაც მოვაჭრეები პროდუქტს ჰყიდიან, მაგრამ ეს საკმარისი რომ არ არის, იმითაც ხდება ცხადი, რომ ქალაქის ცენტრი გარევაჭრობის ადგილად იქცა და ეს სიტუაცია საკმაო დისკომფორტს ქმნის, განსაკუთრებით, სადღესასწაულო და უქმე დღეებში.
ფაქტია, რომ რთული სოციალური მდგომარეობის, სიღარიბის და უმუშევრობის მაღალი მაჩვენებლის ფონზე გარე ვაჭრობის სრულად აკრძალვა და მრავალი თვითდასაქმებულის ულუკმაპუროდ დატოვება არამართებული იქნება. თუმცა, ისიც ფაქტად რჩება, რომ ქუჩაში გაშლილ დახლებზე, მტვერსა და ანტისანიტარიაში მრავლად გვხვდება მალფუჭებადი პროდუქტი. ერთად იყიდება რძის ნაწარმი და თევზი, ხილი თუ ბოსტნეული, მჭადის ფქვილი და ასე შემდეგ. გარე მოვაჭრეების მიერ გასაყიდად გამოტანილი პროდუქტების ხარისხი, მათი შენახვისა და რეალიზაციის პირობები პირდაპირ არის კავშირში თითოეული ჩვენგანის ჯანმრთელობასთან, იქედან გამომდინარე, რომ გარე ვაჭრობა კანონგარეშე საქმიანობაა, შესაბამისად, ის საკვები პროდუქტები, რომლებიც ქუჩაში ნებართვის გარეშე იყიდება, შეუმოწმებელია და მის ხარისხზე პასუხისმგებელიც არავინაა. ასე რომ, სასწორის ერთ მხარეს თვითდასაქმებული ადამიანის ლუკმა-პური დევს, მეორე მხარეს კი _ ჩვენი ჯანმრთელობა.
ლანჩხუთში, ქალაქის ცენტრალური ნაწილი, ყოფილი უნივერმაღის შენობიდან ძველი სასტუმროს შენობის მიმდებარე ტერიტორიის ჩათვლით, ისეა გადატვირთული, რომ ქალაქის ცენტრს, ფაქტობრივად, ბაზრის ფუნქცია აკისრია. აქ ყოველდღე თავს იყრიან მოვაჭრეები, დღის ბოლოს კი საკუთარი ჯაფით მოპოვებული შემოსავალი სახლში მიაქვთ და გასაგებია, რომ ძნელად ეთმობათ თანხის გამომუშავების ეს ერთადერთი წყარო.
ქალაქის ცენტრში არსებული ამ პრობლემის მოსაგვარებლად ქმედითი ნაბიჯების გახორციელებას ლანჩხუთის მერია მიმდინარე წლის ზაფხულში შეეცადა და იმ არგუმენტით, რომ ქალაქის ცენტრალური ქუჩის ახალ განაშენიანებას გეგმავდა, გარე მოვაჭრეებს ალტერნატიული ფართი შესთავაზა სპორტული სკოლის მიმდებარე ტერიტორიაზე. თუმცა, როგორც დრომ აჩვენა, მერიის ეს მცდელობა უშედეგო აღმოჩნდა და დროის მოკლე მონაკვეთში გარე მოვაჭრეები ისევ ძველ ადგილებს დაუბრუნდნენ.
“რა ალტერნატიული ფართი?! ადგნენ და ისევ ღია ცის ქვეშ გადმოგვყარეს, თან უფრო უარეს პირობებში. არადა, რომ გეკითხათ, გარე ვაჭრობის მოსაწესრიგებლად კუთხე გამოყვეს და მოაწყვეს, თუმცა, არც დახლი დაუდგამთ და არც გადაუხურავთ იქაურობა. ავდარში ქარსა და წვიმას მიაქვს იქ ყველაფერი.
რომელიმე ჩვენგანს შთამომავლობით კი არ გვერგო აქაურობა _ გაჭირვების გამო გვიწევს ქუჩაში დგომა. არ ვართ წინააღმდეგები ჩვენც გვქონდეს სამსახურები, დღეში რამდენჯერმე ყავა მოვადუღოთ და მერე, თვის ბოლოს, “კარტაზე” დარიცხული ფული ავიღოთ. შეშლილი გვაქვს ადამიანებს სახე ზამთარ-ზაფხულ ქუჩაში დგომით, სიცხე და სიცივე არაა ჩვენთვის”, _ ამბობენ მოვაჭრეები.
ის, რომ გარე ვაჭრობის პრობლემა მოსაგვარებელია, თანხმდებიან ადგილობრივ ხელისუფლებაშიც:
“სირცხვილია ქალაქის ცენტრში უსიამოვნო სუნი და ანტისანიტარია იყოს. ალტერნატიული ფართის პრობლემა ნამდვილად არაა, უბრალოდ, მეტი აქტიურობა და მონდომება გვმართებს, რომ ბოლოს და ბოლოს, ქალაქი ქალაქს დაემსგავსოს”.
როგორც ირკვევა, დანებებას ამ კუთხით არც მუნიციპალიტეტის მერია გეგმავს, სადაც ამბობენ, რომ მოვაჭრეებისთვის ალტერნატიული ფართის მოძიება და ამ კუთხით სხვადასხვა ღონისძიებების გატარება კვლავ იგეგმება.
