საქართველოს ბუნება ყოველგვარ პირობას ქმნის სასოფლო-სამეურნეო და სამკურნალო აურაცხელი სიუხვისთვის. მისი წარმოებისთვის მხოლოდ ცოდნა და თავდადებული შრომაა საჭირო. ასევე, ქართული ბუნება უნიკალურია მეფუტკრეობის დარგის აღმავლობისთვის _ ჩვენთან ყველა პირობაა იმისთვის, რომ მრავალი კილოგრამი ფუტკრის რძე დამზადდეს.
დადგენილია, რომ საქართველოში, ქართული ფუტკრის სადედე რძეს საუკეთესო მაჩვენებლები გააჩნია და თვისობრივად განსხვავდება სხვა ქვეყნის მიერ წარმოებული რძისგან. ეს გამოწვეულია ყვავილისა და ნექტრის ნაირსახეობრივი მცენარეული საფარით. ამიტომ მასზე მოთხოვნილება საზღვარგარეთის ქვეყნებიდან დღითი დღე იზრდება. თუმცა, წარმოებული ფუტკრის პროდუქტების, მათ შორის, სადედე რძის რეალიზაციის, სერტიფიცირების და საექსპორტოდ მისი რეალიზაციის საკითხი დღემდე მოსაგვარებელია, რის გამოც ფუტკრის მიერ წარმოებული შრომა სათანადოდ დაუფასებელი რჩება.
ფუტკრის სადედე რძე წარმოადგენს არაჟანისმაგვარ მოთეთრო-მოყვითალო ფერის და მომჟავო, თავისებური გემოს მქონე ნივთიერებას. მას 8-15 დღის ახალგაზრდა ფუტკრები გამოიმუშავებენ. ის ნამდვილად სასწაულმოქმედი თვისებების მქონე, ბიოლოგიურად აქტიური ნატურალური პროდუქტია, რომელიც სამეფო ჟელეს სახელითაა ცნობილი.
ფუტკრის რძის მოხმარების მხრივ, იაპონია მსოფლიოში პირველ ადგილზეა და საშუალოდ 200-240 ტონას მოიხმარს ყოველწლიურად, რომლის უმეტესობა ჩინეთიდან, ტაივანიდან შეაქვს. იქ ბავშვებსაც კი აძლევენ ყოველდღე, რაც ძალიან უწყობს ხელს მათ ფიზიკურ და გონებრივ განვითარებას.
თანამედროვე მედიცინისთვის ცნობილია სადედე რძის ფარმაკოლოგიური მოქმედება გულსისხლძარღვთა სისტემის მუშაობაში _ იგი ახდენს სისხლძარღვთა გაფართოებას, არტერიული წნევის რეგულირებას, მაღლა წევს დაბალ წნევას, ახდენს ანტისპაზმურ მოქმედებას, აუმჯობესებს იმუნურ სისტემას, ამცირებს ქოლესტერინის შემცველობას სისხლში, აჩქარებს ბავშვებში ზრდის პროცესს, ამცირებს სისხლში შაქრის დონეს, ხელს უწყობს ჰემოგლობინის ზრდას, აახალგაზრდავებს ორგანიზმს, აუმჯობესებს მეხსიერებას და მხედველობას.
ფუტკრის რძე გამოიყენება კეთილთვისებიანი და ავთვისებიანი სიმსივნეების, გინეკოლოგიური დაავადებების, უშვილობის, კლიმაქსური სინდრომის, იმპოტენციის, წინამდებარე ჯირკვლის ადენომის, ქრონიკული პროსტატის, გულის ასთმის, ჰიპერტონიის, ჰიპოტონიის, გასტრიტის, კუჭის და თორმეტგოჯა ნაწლავის წყლულის, ბუასილის, შაქრიანი დიაბეტი, ეპილეფსიიის, ალკოჰოლიზმის, ნერვული სისტემის დაავადების, თავის ტკივილის საწინააღმდეგოდ. ტოქსიკური ნივთიერების და რადიაქტიური მოქმედების დროს, ხელს უწყობს სისხლის განახლების პროცესს.
როგორ უნდა განვსაზღვროთ ფუტკრის რძის მიღების წესები და დოზა?
მზადდება ფუტკრის რძის და თაფლის 1%-2%-იანი ნარევი. გარკვეული დროით აძლევენ ავადმყოფს _ 5-10 წუთით ენის ქვეშ ყოფნით შეიწოვება სისხლში. დოზები დამოკიდებულია ასაკზე, დაავადების სახესა და ფორმაზე, წონაზე.
ევროპაში ფუტკრის რძეს იღებენ 1-2 გრამს დღეში, ორჯერადად 1-2 თვის მანძილზე, ჭამამდე ნახევარი საათით ადრე. ორკვირიანი შესვენების შემდეგ კურსს იმეორებენ.
უნდა ვიცოდეთ, რომ არ შეიძლება ფუტკრის რძის გამოყენება მწვავე ინფექციის, თირკმელზედა ჯირკვლების დაზიანებისა და ალერგიის შემთხვევაში. არ უნდა დავივიწყოთ, რომ ყოველგვარი ფარმაკოლოგიური საშუალება რძის მიღების ჯერადობას, დოზებს და მკურნალობის ხანგრძლივობას მხოლოდ მკურნალი ექიმი საზღვრავს. ასეთი სიფრთხილე საჭიროა რძის მაღალი აქტიურობის გამო.
მეფუტკრეების საყურადღებოდ აღვნიშნავ, რომ ფუტკრის სადედე რძის შეგროვება მეტად შრომატევადი პროცესია, მოითხოვს მაღალ პროფესიონალურ გამოცდილებას. ამასთან ერთად ჯანსაღი, ძლიერი ოჯახების ყოლას და უხვი საკვები პროდუქტების გათვალისწინებას. სადედე რძის მიღებისას დაცული უნდა იქნას სანიტარულ-ჰიგიენური მოთხოვნები და შენახვის და ტრანსპორტირების წესები.
ამჟამად ცნობილია, რომ მედიცინაში არ არსებობს ფუტკრის რძეზე უფრო აქტიური პრეპარატები. ცოცხალი ორგანიზმის გაახალგაზრდავების და გამრავლების სტიმულირებისთვის უნიკალური შემადგენლობის წყალობით, ფუტკრის რძეს ოცდამეერთე საუკუნის ჯადოსნურ წამალს უწოდებენ.
ჯანვერდ ცეცხლაძე,
გურიის მეფუტკრეთა კავშირის თავმჯდომარე
