ოზურგეთელი მოზაიკოსი, ლალი თავართქილაძე, რომელმაც საქართველოში ახლახან წარმატებით დაასრულა საერთაშორისო პროექტი: „ყველანი ერთად, მსოფლიოში ბავშვთა შიმშილის დასაძლევად“, ახლა ამავე პროექტის კორდინატორმა, პროფესიით ბიბლიოთეკარმა და მსოფლიო კულტურის უსაზღვრო მცოდნემ და ტრფიალმა, არგენტინელმა მაგალი ორტეგამ მიიწვია ახალ პროექტზე, „ MOZAIKA TO@ das“. პროექტი , მსოფლიო პანდემიის ჟამს, ადამიანთა გამხნევებისა და მათი თანადგომისთვის გახორციელდება.
_ მოწვევის ტექსტი ძალზე გულთბილია. მაგალი ორტეგა იწვევს მოზაიკოსებს სხვადასხვა ქვეყნიდან, რათა ახალი პროექტის გახორციელებაში მიიღონ მონაწილეობა და ამ მძიმე პერიოდში თითოეულ ადამიანს ჩვენი ხელოვნებით გავუგზავნოთ იმედი და სიყვარული. მაგალი ორტეგას მორიგი ნაბიჯი, ზოგადსაკაცობრიო იდეალებისადმი ერთგულებითაა ნაკარნახევი, რადგან ახლა, მსოფლიო პანდემიის ჟამს, არაფერია უფრო საშური ნაბიჯი, ვიდრე სოლიდარობა ყველას მიმართ. ხელოვნება ბოლოს ჟამთააღმწერლად რჩება, რომ ისტორიის ნამდვილობა უფრო სარწმუნო იქნეს შთამომავლობისთვის – თქვა ლალი თავართქილაძემ ჩვენთან საუბარში.
„გურია ნიუსი“ წარმატებებს უსურვებს ნიჭიერ ხელოვანს, მოზაიკოსს, ქალბატონ ლალი თავართქილაძეს ამ ახალი და შინაარსით დატვირთული პროექტის საქართველოში გახორციელების საქმეში.
