ჩოხატაურის სამუსიკო სკოლა 1960 წელს დაარსდა. სამუსიკო სკოლა მუნიციპალიტეტში ერთადერთია და მასში სწავლობს 160 მოსწავლე, როგორც დაბის, ასევე, მაღალმთიანი სოფლების მცხოვრებთა შვილები.
სკოლას ჰყავს 1530 კურსდამთავრებული და დღესაც აქტიური, მდიდარი შემოქმედებითი ცხოვრებით, მუსიკალურ-ესთეტიკური აღზრდის პრინციპით, საკონცერტო ცხოვრების მრავალფეროვნებით მნიშვნელოვან კულტურულ საგანმანათლებლო კერას წარმოადგენს.
სკოლის პირველი პედაგოგები იყვნენ: ნონა თავართქილაძე, ნანა ჩხიკვაძე, ვერა ჩხიკვაძე, მურმან ბერულავა. სამუსიკო სკოლაში ფუნქციონირებს საფორტეპიანო და საორკესტრო განყოფილება (ფლეიტის კლასი). მოსწავლეები მუსიკალურ ცოდნას იღრმავებენ სხვადასხვა ჟანრში: კლასიკურ, ვოკალურ, ფოლკლორულ და საესტრადო ჯგუფებში.
სამუსიკო სკოლა დაკომპლექტებულია მაღალკვალიფიციური პედაგოგებით. სწორედ მათი თავდაუზოგავი შრომის შედეგია სხვადასხვა თემატური ღონისძიებების მოწყობა სასწავლო წლის განმავლობაში, როგორებიცაა: ვენის კლასიკოსების საღამო, 26 მაისის საქართველოს დამოუკიდებლობის დღისადმი, დედის დღისადმი, წმინდა გიორგის დღესასწაულისადმი, ბავშვთა დაცვის დღისადმი მიძღვნილი, საახალწლო კარნავალი და სხვა სარაიონო ღონისძიებები.
2013 წლიდან ყოველწლიურად, სამუსიკო მოსწავლეები საანგარიშო კონცერტზე ერთად ხელოვნების სასახლეში ნაწარმოებებს წარმატებით ასრულებენ ქუთაისის სახელმწიფო სიმფონიურ ორკესტრთან.
2014 წლიდან სამუსიკო სკოლა აქტიურად მონაწილეობს საქართველოს ხელოვანთა კავშირის კლასიკური მუსიკის რესპუბლიკურ (საერთაშორისო) ფესტივალზე “მომავლის ვარსკვლავები” (სადაც სრულდება საფორტეპიანო, საგუნდო და ვოკალური ჯგუფის ნომრები). სამუსიკო სკოლა და მოსწავლეები დაჯილდოვდნენ დიპლომებით “მაღალი პროფესიონალიზმისა და წარმატებული მოღვაწეობისათვის”. ყოველწლიურად ფესტივალზე გამარჯვებულ მოსწავლეებს იწვევენ გალა კონცერტზე ქალაქ თბილისის კონსერვატორიის დიდ საკონცერტო დარბაზში.
2014 წ. სამუსიკო სკოლა დაჯილდოვდა გურიის რეგიონის გუბერნატორის მიერ (დაბა ურეკის კულტურის სახლში), გურიის რეგიონის მუსიკალური სკოლების შემოქმედებით საღამოში აქტიური მონაწილეობისა და მაღალი პროფესიული დონის წარმოჩენისათვის”.
2016 -2019 წლებში სამუსიკო სკოლამ მონაწილეობა მიიღო საქართველოს საგუნდო საზოგადოების, ბავშვთა და ახალგაზრდული საგუნდო კოლექტივების ეროვნულ კონკურსში. პირველ ადგილზე გასული ვაჟთა გუნდი და ასევე, პირველ ადგილზე გასული (ვერცხლის მედალოსანი) გოგონათა გუნდები მიწვეულები იყვნენ ფინალურ კონცერტზე კონსერვატორიის მცირე საკონცერტო დარბაზში, საზღვარგარეთიდან საგანგებოდ მოწვეული ცნობილი მუსიკოსებისგან დაკომპლექტებული ჟიურის მიერ და დაჯილდოვდნენ სპეციალური დიპლომებით.
2018 წელს საქართველოს მუსიკალური საზოგადოების მიერ “საქართველოს სამუსიკო სკოლების მოსწავლეთა მე-7 რეგიონულ კონკურსზე” სამუსიკო სკოლას გადაეცა პირველი ხარისხის დიპლომები (საფორტეპიანო და საგუნდო ნომრებისათვის).
სამუსიკო სკოლაში სწავლების ხანგრძლივობაა 6 წელი, სადაც მოსწავლე იღებს დაწყებით კომპლექსურ სამუსიკო განათლებას, ეზიარება ქართული და მსოფლიო ხელოვნების ნიმუშებს. სკოლა ზრუნავს, მოზარდს გამოუმუშავოს პირველადი პრაქტიკული საშემსრულებლო უნარ-ჩვევები, აღზარდოს გემოვნებიანი მსმენელი და განუვითაროს პიროვნულ-ინდივიდუალური შემოქმედებითი მიდრეკილებები.
2019 წელს საზეიმოდ გაიხსნა რეაბილიტირებული სამუსიკო სკოლა (საკონცერტო დარბაზის გადიდებით, თბოიზოლაციით).
ა(ა)იპ ჩოხატაურის სახელოვნებო სკოლების გაერთიანების ადმინისტრაცია, სამუსიკო სკოლის პედკოლექტივი, მოსწავლეები და მშობლები მადლობას ვუხდით მუნიციპალიტეტის გამგეობას და საკრებულოს სამუსიკო სკოლის მიზნების, ამოცანების შესრულებისათვის მხარდაჭერასა და დაფინანსებისათვის.
