17:00 საათის მდგომარეობით ამომრჩეველთა აქტივობა 20,74%-ს შეადგენს, – ინფორმაციას ამის შესახებ ცენტრალური საარჩევნო კომისიის პრეს-სპიკერი ნათია იოსელიანი ავრცელებს.
მისივე ინფორმაციით, ყველაზე მაღალი აქტივობა დაფიქსირდა აჭარის რეგიონში, 30-ე მაჟორიტარულ ოლქში, ხოლო ყველაზე დაბალი კი ნაძალადევში, მე-7 მაჟორიტარულ ოლქში 16%.
„17:00 საათის მდგომარეობით ამომრჩეველთა აქტივობა 20,74%-ს შეადგენს. ყველაზე მაღალი აქტივობა დაფიქსირდა აჭარის რეგიონში, 30-ე მაჟორიტარულ ოლქში, სადაც შედის ქედის, შუახევის, ხელვაჩაურისა და ხულოს მუნიციპალიტეტები და მისული ამომრჩევლის რაოდენობა არის 30,162. ყველაზე დაბალი აქტივობა დაფიქსირდა ნაძალადევში, მე-7 მაჟორიტარულ ოლქში, 16%. თუ შევადარებთ ამომრჩევლის აქტივობას 2016 წლის არჩევნების მე-2 ტურს, 17:00-ის მონაცემებით, 2016 წელს დაფიქსირდა 30,99 პროცენტი.
საოლქო საარჩევნო კომისიებში ჯამში 5 საჩივარი შევიდა, აქედან 3 არი ზუგდიდში და ეხება პროცედურულ დარღვევებს, რაც რეგისტრაციის ფუნქციის არაჯეროვნად შესრულებას გულისხმობს, ასევე არის გადასატანი ყუთის თაობაზე საჩივარი და წილისყრის პროცედურის დარღვევაზე. ბათუმში შესულია 1 საჩივარი ხმის მიცემის პროცედურის დარღვევაზე, ხოლო ისანში ასევე 1 საჩივარი დამკვირვებლის უფლებებთან დაკავშირებით. კომისია შეისწავლის საჩივრებს და იქნება შესაბამისი რეაგირება“, – ნათქვამია ცესკოს განცხადებაში.
მაჟორიტარული არჩევნების მეორე ტური 17 ოლქში ტარდება. არჩევნების პირველ ტურში 13 ოლქში „ქართული ოცნების“ კანდიდატებმა გაიმარჯვეს. რაც შეეხება პროპორციულ სისტემას, ცესკოს ინფორმაციით, ბიულეტენების 100%-ის დათვლის შემდეგ შედეგები ასეთია: „ქართული ოცნება“ – 48,22%; „ნაციონალური მოძრაობა – გაერთიანებული ოპოზიცია“ – 27,18%; „ევროპული საქართველო“ – 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. დანარჩენ პარტიებს ამომრჩეველთა ხმების ერთ პროცენტზე ნაკლები აქვთ.
საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლებები და პროცედურების უმეტესობა დაცული იყო.
