“კონფლიქტის მოგვარებაში გარეშე პირი არ უნდა მონაწილეობდეს, არამედ სოფლის მცხოვრებლები და ადგილობრივი ხელისუფლება”

ჩოხატაურის მუნიციპალიტეტის სოფელ ბუკნარში პარასკევის ლოცვა, როგორც წინა წლებში, ახლაც ჩატარდება. ამის შესახებ მთელი დღის განმავლობაში მიმდინარეობა საუბარი.

პარალელურად, დღის მეორე ნახევარში სოციალურ ქსელში გავრცელდა მოწოდება, რომ მართლმადიდებელი მრევლი შეიკრიბოს და 15 იანვარს, პარასკევის ლოცვის დროს, სოფელ ბუკნარში ჩავიდეს: „დავდგეთ ერთმანეთის გვერდით, დავიცვათ ჩვენი რელიგია და სარწმუნოება“, _ ასეთია ამ მოწოდების პათოსი.

“გურია ნიუსი“ ამ თემაზე გურიის გუბერნატორს ზურა ნასარაიას ესაუბრა:

_ დღეს კიდევ ერთხელ მოხდა საერთო აზრის ჩამოყალიბება და შეჯერდნენ იმაზე, რომ ჩატარდება პარასკევის ლოცვა ისე, როგორც ადრე ტარდებოდა. ამის შემდეგ მოხდება სოფლის მოსახლეობის მუსლიმი და მართლმადებელი თემიდან პიროვნებების არჩევა,  რომლებიც კიდევ ერთხელ გამართავენ მოლაპარაკებას. მოითხოვეს, რომ ამ შეხვედრას დაესწრონ სასულიერო პირები, ჩოხატაურის მერი და კიდევ ერთხელ მოხდეს ამ საკიტხზე შეჯერება.

_ ბატონო ზურაბ, ისინი ასევე ითხოვენ ცენტრალური ხელისუფლების წარმომადგენლებთან შეხვედრას.

_ ბოლო შეხვედრაზე გადაწყდა, რომ მოხდეს შეხვედრას დაესწრონ სასულიერო პირები და ჩოხატაურის მერი. ეს შეხვედრა გაიმართება პარასკევის ლოცვის შემდეგ. ეს იქნება ნიშანი, რომ ლოცვაში ხელი არ შეეშლება მუსლიმ მრევლს და არც ეშლებოდა არავის.

_ მაშინ კონფლიქტი რატომ წარმოიშვა?

_ იყო გარკვეული არასწორი ქმედებები, როგორც ერთი, ისე მეორე მხრიდან. შესაბამისად, კონფლიქტში ჩაერთნენ ის ადამიანები, რომლებმაც პროვოცირება გაუკეთეს ვითარების ესკალაციას. ამ ადამიანებს ლოცვაში ხელი არ ეშლებათ და არც მომავალში შეეშლებათ.

_ არის თუ არა საჭირო კერძო პირების ჩარევა ამ კონფლიქტში, როცა მისი მოგვარება ხელისუფლების საქმეა?

_ ეს უთანხმოება უნდა მოგვარდეს ამ სოფლის მოსახლეობის მიერ, ადგილობრივი ხელისუფლების დახმარებით. კონფლიქტის მოგვარების საქმეში გარეშე პირი კი არ უნდა იყოს მონაწილეობდეს, არამედ უშუალოდ სოფლის მცხოვრებლები და ადგილობრივი ხელისუფლება. სიტუაციას განმუხტავენ ის ადამიანები, რომლებიც ბუკნარში ერთად ცხოვრობენ წლების განმავლობაში.