ბოლო დღეებია, ლანჩხუთში აქტუალურ თემად იქცა, თუ რა ბედი ელის ე. წ. ძველ საავადმყოფოს, რომელიც უკვე დახურვის რეჟიმშია და აქაური პერსონალისთვის თვეობით დაგროვილი სახელფასო დავალიანების გაცემა დაიწყო.
სახელფასო დავალიანების დაფარვის ამბავი შექმნილ ვითარებაში ბევრისგან პირველ გამარჯვებად შეფასდა.
თუმცა, ბევრის შეფასებით, ეს ყველაფერი ზღვაში წვეთია და საქმე არც ისე მარტივადაა _ მათი თქმით, მთავარია ამ სამედიცინო დაწესებულებამ, რომლის საბოლოო ბედი გაურკვეველია და დახურვის ზღვარზეა, ფუნქციონირება უნდა გააგრძელოს, რომ აქ დასაქმებული ადამიანები სამსახურის გარეშე არ დარჩნენ.
ამ სამედიცინო დაწესებულებასთან დაკავშირებით, წლების განმავლობაში მრავალი დაპირება იყო, რომ აქაურობა თანამედროვე ტექნიკით აღიჭურვებოდა და პალატები კეთილმოეწყობოდა. ბოლოს, ბიძინა ივანიშვილმაც გამოთქვა სურვილი, მძიმე მდგომარეობაში მყოფ საავადმყოფოს ფინანსურად დახმარებოდა. პრეზენტაცია 2016 წლის იანვარში, მერიის შენობის სხდომათა დარბაზში გაიმართა და ითქვა, რომ პროექტი ფონდ “ქართუს” უნდა დაეფინანსებინა 1,5 მილიონი ლარით.
მაშინდელი ინფორმაციით, გარემონტდებოდა შენობის მეორე სართული, სადაც მოეწყობოდა სამეანო-საოპერაციო, ახალშობილის რეანიმაციის, ქირურგიის, გასტეროსკოპიის, პოსტოპერაციულის და ა. შ. კაბინეტები. სტაციონარი 20 საწოლზე იქნებოდა გათვლილი. სამუშაოები 2017 წლის ბოლოსთვის უნდა დასრულებულიყო, თუმცა, ფონდმა “ქართუმ” ეს ყველაფერი რატომღაც გადაიფიქრა.
მედიკოსთა ინფორმაციით, საავადმყოფოს კეთილმოწყობის შესაძლებლობა ახლაც გამოიკვეთა, თუმცა, რეაბილიტაციის ნაცვლად, სამედიცინო დაწესებულება დახურვის საშიშროების წინაშე დადგა. როგორც ირკვევა, შეიქმნა რეგიონული საავადმყოფოების დაფინანსების “გლობალ ფონდი” და ლანჩხუთში ძველი საავადმყოფოს რეაბილიტაციაც სწორედ ამ ფონდმა უნდა დააფინანსოს. თუმცა, აქ ერთ უხერხულობას წააწყდნენ _ როგორც აღმოჩნდა, საავადმყოფოს მთელი ქონება იპოთეკითაა დატვირთული ყოფილი მესაკუთრის მიერ და მას ყადაღა ადევს.
რაც შეეხება ყოფილ მესაკუთრეებს, საავადმყოფოს ბოლოს, “ნაციონალური მოძრაობის” ხელისუფლებაში ყოფნის დროს, კომპანია “ადითი” ფლობდა, რომელიც ისრაელის სამედიცინო საინვესტიციო კომპანია “აიჰოპის” შვილობილია. “აიჰოპს” ეკონომიკის სამინისტროსთან გაფორმებული ხელშეკრულების მიხედვით, საქართველოს 27 რაიონში უნდა აეშენებინა საავადმყოფოების ქსელი 1000-მდე საწოლით.
“ეს არის თვისობრივად ახალი ხელშეკრულება, რის მიხედვითაც კომპანიას გადაეცემა უძრავი ქონება მხოლოდ აუდიტორულად დამოწმებული წინასწარ განსაზღვრული ინვესტიციის გახორციელების შემდეგ. პროექტი დაიწყება მაისში და პირველი შედეგები უკვე გვექნება ამა წლის ბოლოს”, _ ამბობდა “ნაციონალური მოძრაობის” ხელისუფლების პრემიერ მინისტრი ნიკა გილაური.
თუმცა, “აიჰოპმა” აღებული ვალდებულებები ვერ შეასრულა და 2010 წლის ივლისში, კომპანია “100 ახალი საავადმყოფოს” პროექტს, საქართველოს მთავრობის გადაწყვეტილებით, ჩამოაშორეს.
შემდეგ მთავრობამ ჯანდაცვის სისტემის დასარეგულირებლად საზოგადოებას ახალი პროექტი შესთავაზა. 2010 წლის სექტემბერში, ეკონომიკისა და მდგრადი განვითარების სამინისტრომ შპს “ჯანმრთელობა 2010”-ის სახელმწიფო საკუთრებაში არსებული 100% წილი საჯარო აუქციონზე გამოიტანა.
მაშინ “ადითმა” საავადმყოფოები საქართველოს რამდენიმე ქალაქში შეიძინა _ მათ შორის, ჩოხატაურსა და ლანჩხუთში.
აუქციონის პირობების თანახმად, მყიდველი ვალდებული იყო, 30 თვის განმავლობაში არანაკლებ 2 მლნ. 175 ათასი აშშ დოლარის ინვესტიცია შემდეგი გრაფიკის მიხედვით გაეხორციელებინა _ ყოველ 6-თვიან პერიოდში არანაკლებ 435 ათასი აშშ დოლარი (ერთ საწოლზე _ არანაკლებ 15 ათასი აშშ დოლარი).
იმავდროულად, “ჯანმრთელობა 2010”-ის ახალი მეპატრონე ვალდებული ხდებოდა, ლანჩხუთში 25 საწოლზე გათვლილი ზოგადი პროფილის საავადმყოფო გაეკეთებინა.
ახალი მეპატრონე იმ ვალდებულებასაც იღებდა, რომ ახლად შექმნილ საავადმყოფოებს არანაკლებ 7 წლის განმავლობაში სამედიცინო პროფილს შეუნარჩუნებდა. გამოცხადდა ტენდერი, სადაც გამარჯვებული ფირმებიდან, ერთ-ერთი იყო შპს “ადითი”, რომელიც, როგორც უკვე აღვნიშნეთ, მთავრობის მიერ დისკვალიფიცირებული “აიჰოპის” შვილობილი კომპანია გახლდათ.
ირკვევა, რომ ლანჩხუთში მხოლოდ ე. წ. ძველი საავადმყოფო არ არის იპოთეკით დატვირთული პანამის ოფშორში დარეგისტრირებული კომპანია “ჰუპა ვორლდვაიდ ლიმიტედის” სასარგებლოდ, სესხის უზრუნველსაყოფად, ჩადებულია ლანჩხუთის ყოფილი ტუბსაავადმყოფოს შენობაც და მიწის ნაკვეთიც!
საგულისხმოა, რომ გასული წლის გაზაფხულზე, პანდემიის პირველი ტალღის ფონზე, ლანჩხუთში გაჩნდა იდეა, რომ ტუბსაავადმყოფოს ტერიტორიაზე ინფექციური საავადმყოფო გაკეთებულიყო. თუმცა, როგორც ჩანს, ეს შეუძლებელია. დახურული სამედიცინო ცენტრის ფართზე ახლის გახსნა კი არა, მოქმედი საავადმყოფოს ფუნქციონირებას ექმნება საფრთხე, რადგან ორივეს ქონებას ყადაღა ადევს.
დოკუმენტაციით, ირკვევა, რომ 2010 წლის 11 თებერვალს შპს “ფთიზიატრი XXI” საჯარო რეესტრში ირეგისტრირებს მფლობელობაში არსებულ 3 600 კვმ. მიწის ნაკვეთს და მასზე განთავსებულ 672,9 კვ.მ. შენობას. ერთ თვეში ქონება სახელმწიფო საკუთრებაში გადადის. იმავე წლის მაისში მთლიანი ქონება შპს “ჯანმრთელობა 2010”-ის ბალანსზე მოხვდა, რომელიც იგივე “ადითია”, თუმცა, ამ დროს ეს სახელწოდება არ აქვს. უბრალოდ, ორივეს (შპს “ჯანმრთელობა 2010”-ისა და შპს “ადითის”) პარტნიორი ჰოსპიტალური ოპერირების საერთაშორისო საწარმოა.
შპს “ჯანმრთელობა 2010”-ის სახელით, იმავე წელს, ქონება დატვირთეს იპოთეკით და დაეუფლნენ საბანკო სესხს. შემდგომში შექმნეს “ადითი”, რომლითაც ოპერირებდნენ. ქონების გარეშე დარჩენილი შპს “ფთიზიატრი XXI”-ის ლიკვიდაცია კი 2012 წელს მოხდა.
