„საბრალო ჩემო ქვეყანა, ვის ხელში ხარ ჩავარდნილი – ამათი ბოგინი დასასრულს უახლოვდება!“ – ასე გამოეხმაურა საქართველოს ყოფილი პრეზიდენტი მიხეილ სააკაშვილი უმრავლესობის ლიდერის, ირაკლი კობახიძისთვის თავისუფლების საპარლამენტო ორდენის გადაცემას.
სააკაშვილის თქმით, ეს ორდენი თავის დროზე მისი ინიციატივით დაწესდა, რომელიც მიენიჭებოდათ გმირებს.
„ორდენი ჩემი ინიციატივით იქნა დაწესებული.
ჩემს წარმოდგენაში ეს ორდენები უნდა მინიჭებოდათ ქართველ გმირებს, ვინც განსაკუთრებული წვლილი შეიტანა საქართველოს თავისუფლების განმტკიცებაში
და ასევე უცხოელ მოღვაწეებს, ისეთი როგორც მაგალითად, ჯონ მაკკეინი იყო ან კონდოლიზა რაისი.
საბრალო ჩემო ქვეყანა, ვის ხელში ხარ ჩავარდნილი – ამათი ბოგინი დასასრულს უახლოვდება!
დღეს კიდევ ღარიბაშვილმა თქვა, რომ თურმე „ვარდების რევოლუციის“ შემდეგ ქართული ეკონომიკა საბოლოოდ გაპარტახდა.
ესე იგი, მაშინ 4-ჯერ რომ გაიზარდა, ეს იყო გაპარტახება და ახლა ამათ დროს არამხოლოდ არ გაზრდილა, 6%-ით შემცირდა და ეს არის აყვავება?
სასწრაფოდ, ამასაც მიეცით გაბახებული თავისუფლების “ორდენი”!
ოღონდ, აბა თქვენ თვითონ გადაწყვიტეთ, ვის უფრო მეტი ბანტი ეკუთვნის – ღარიბაშვილს თუ კობახიძეს“, _ აცხადებს მიხეილ სააკაშვილი.
